LIVE TV
ഫുട്ബോള് ലോകകപ്പില് നാണക്കേടോടെയാണ് യുറഗ്വായ് ടീം നാട്ടിലേക്ക് മടങ്ങുന്നത്. ഗ്രൂപ്പുഘട്ടം പോലും കടക്കാനാകാതെയുള്ള മടക്കം വലിയ പ്രതിസന്ധിയാണുണ്ടാക്കുന്നത്. 2010 ലോകകപ്പിന് ശേഷം ടീമിന് കാര്യമായ നേട്ടമുണ്ടാക്കാന് കഴിഞ്ഞിട്ടില്ല. ഇത്തവണ ഗ്രൂപ്പുഘട്ടം പിന്നിടുമെന്ന് യുറഗ്വായ് ഉറപ്പിച്ചിരുന്നെങ്കിലും അവരുടെ പ്രതീക്ഷകള് അസ്തമിച്ചു. രണ്ടുകളിയില് സമനില വഴങ്ങിയ ടീം അവസാന മത്സരത്തില് സ്പെയിനോട് തോറ്റു. ഇതോടെ മൂന്നുമത്സരങ്ങള് സമനില വഴങ്ങിയ കേപ് വെര്ദെയും രണ്ടെണ്ണം ജയിക്കുകയും ഒരുമത്സരം സമനിലയാവുകയും ചെയ്ത സ്പെയിന് മുന്നേറുകയുമായിരുന്നു. സൗദിയും ഗ്രൂപ്പില്നിന്ന് പുറത്തായി. താരതമ്യേന ദുര്ബലരും ലോകകപ്പില് അരങ്ങേറ്റക്കാരുമായ കേപ് വെര്ദെ നോക്കൗട്ടിലെത്തിയത് യുറഗ്വായ്ക്ക് കനത്ത തിരിച്ചടിയായി.
ഇതോടെ കടുത്ത പണിഷ്മെന്റാണ് യുറഗ്വായ് ഫുട്ബോള് അസോസിയേഷന് കൊടുത്തത്. താരങ്ങള്ക്ക് നാട്ടിലേക്ക് മടങ്ങാന് തയ്യാറാക്കിയ ചാര്ട്ടേഡ് വിമാനം റദ്ദാക്കി. എല്ലാ താരങ്ങളും ഇനി സാധാരണ കൊമേഴ്ഷ്യല് വിമാനത്തില് നാട്ടിലേക്കോ അല്ലെങ്കില് ക്ലബ്ബിനൊപ്പം ചേരാനോ മടങ്ങും. ചില താരങ്ങള് അവധിയാഘോഷത്തിന് ശേഷമാകും ക്ലബ്ബിലേക്ക് മടങ്ങുക.
അതേസമയം, ലോകകപ്പില് രണ്ടുതവണ ജേതാക്കളായ യുറഗ്വായിയുടെ ഭാവിയെക്കുറിച്ചും ആശങ്കയുണ്ട്. കോച്ച് മാഴ്സലോ ബിയേല്സ ടീം വിട്ടേക്കും. പുതിയ കോച്ചിനെ നിയമിക്കുകയും വരാനിരിക്കുന്ന മത്സരങ്ങളിലേക്ക് ടീമിനെ ഒരുക്കുകയെന്ന ലക്ഷ്യവും യുറഗ്വായ് ഫുട്ബോള് അസോസിയേഷന് മുന്നിലെ വെല്ലുവിളിയാണ്.
content highlights: Humiliated in the World Cup; Football Association cancels team's return flight
