LIVE TV
ജംഷഡ്പൂര്‍: ജാര്‍ഖണ്ഡിലെ ഗംഭാരിയ പൊലീസ് സ്റ്റേഷനില്‍ 20കാരി പീഡനത്തിനിരയായ സംഭവത്തില്‍ മൂന്ന് പേര് അറസ്റ്റില്‍. രണ്ട് കോണ്‍സ്റ്റബിള്‍മാരും ഒരു സബ് ഇന്‍സ്‌പെക്ടറുമാണ് അറസ്റ്റിലായിരിക്കുന്നത്. പ്രധാന പ്രതിയായ വയര്‍ലെസ് ഓപ്പറേറ്റര്‍ നീരജ് ലാഖ്‌റ, എസ്‌ഐ മനോജ് കുമാര്‍ സാഹു, കോണ്‍സ്റ്റബിള്‍ സന്തോഷ് റായ് എന്നിവരുടെ അറസ്റ്റാണ് രേഖപ്പെടുത്തിയിരിക്കുന്നത്. ഒക്ടോബര്‍ 29ന് നടന്ന സംഭവത്തിന് പിന്നാലെ ശനിയാഴ്ച നീരജിനെ അറസ്റ്റ് ചെയ്തിരുന്നു. ഞായറാഴ്ചയാണ് മറ്റ് രണ്ട് അറസ്റ്റുകള്‍ രേഖപ്പെടുത്തിയത്. സംഭവത്തില്‍ അന്വേഷണം പുരോഗമിക്കുകയാണെന്നും കുറ്റക്കാരെന്ന് കണ്ടെത്തുന്നവര്‍ക്ക് എതിരെ ശക്തമായ നടപടിയുണ്ടാകുമെന്നും എസ്പി മനോജ് സ്വര്‍ഗിയാരിയും വ്യക്തമാക്കി. പെണ്‍കുട്ടിയുടെ പരാതിയിലാണ് നടപടി. സംസ്ഥാനത്തെ സരൈയ്‌ക്കേല - ഖാര്‍സാവന്‍ ജില്ലയിലാണ് സംഭവം.
അന്വേഷണത്തിന്റെ ഭാഗമായി 15 പൊലീസ് ഉദ്യോഗസ്ഥരെ സസ്‌പെന്‍ഡ് ചെയ്തിട്ടുണ്ട്. സസ്‌പെന്‍ഡ് ചെയ്യപ്പെട്ടവരില്‍ രണ്ട് സബ് ഇന്‍സ്‌പെക്ടര്‍മാരും ഒരു ഹവീധാരും കോണ്‍സ്റ്റബിളും ഉള്‍പ്പെടും. ആദ്യഘട്ടത്തില്‍ അഞ്ച് പൊലീസ് ഉദ്യോഗസ്ഥരെയാണ് സസ്‌പെന്‍ഡ് ചെയ്തിരുന്നത്. സരൈയ്‌ക്കേല എസ്ഡിപിഒ അനുഭവ് ഭരദ്വാജിന്റെ നേതൃത്വത്തിലുള്ള പ്രത്യേക അന്വേഷണ സംഘത്തിന്റെ കണ്ടെത്തലുകളുടെ അടിസ്ഥാനത്തിലാണ് അറസ്റ്റ്.
Seraikela, Jharkhand | In a case involving the rape of a woman within the premises of the Gamharia police station, the Superintendent of Police (SP) has suspended 15 police personnel. During the course of the investigation, the accused, Neeraj Lakra (a wireless operator at Gamharia Police Station), was arrested and remanded to judicial custody. A Special Investigation Team (SIT)—led by the Sub-Divisional Police Officer (SDPO), Seraikela—has conducted further investigations. As a result, Sub-Inspector Manoj Kumar Sahu and Constable Santosh Kumar Rai (both from Gamharia Police Station) have been arrested and are being sent to judicial custody. The investigation into other aspects of the case remains ongoing.
— ANI (@ANI) November 2, 2026
ഭര്‍ത്താവില്‍ നിന്നും ഗാര്‍ഹിക പീഡനം നേരിട്ടുവെന്ന പരാതിയുമായി സ്റ്റേഷനിലെത്തിയതാണ് യുവതി. ഈ പരാതിയില്‍ നടപടി സ്വീകരിക്കാമെന്ന് യുവതിക്ക് ഉറപ്പ് നല്‍കിയ സ്റ്റേഷന്‍ ഡ്യൂട്ടി ഓഫീസര്‍, ഭര്‍ത്താവ് വീണ്ടും ആക്രമിക്കാനുള്ള സാധ്യത മുന്‍നിര്‍ത്തി, ഒരു ദിവസത്തേക്ക് സ്റ്റേഷനില്‍ തങ്ങാന്‍ യുവതിയോട് ആവശ്യപ്പെട്ടു. തുടര്‍ന്ന് യുവതിയെ ഒരു മുറിയിലാക്കി, പൂട്ടി. ഇതിനിടെ ഇവിടെയെത്തിയ വയര്‍ലെസ് ഓപ്പറേറ്ററായ ഉദ്യോഗസ്ഥനാണ് തന്നെ ഉപദ്രവിച്ചതെന്നാണ് യുവതിയുടെ പരാതി. റൂമിലുണ്ടായിരുന്ന കത്തി ഉപയോഗിച്ച് യുവതി നടത്തിയ പ്രതിരോധത്തില്‍ ഈ പൊലീസുകാരന് പരിക്കേറ്റിട്ടുണ്ടെന്നാണ് വിവരം. ഇക്കാര്യം ഔദ്യോഗികമായി സ്ഥിരീകരിച്ചിട്ടില്ല.
കൃത്യവിലോപം, ജാഗ്രതയില്ലായ്മ, പൊലീസിന്റെ സത്‌പേരിന് കളങ്കം സൃഷ്ടിക്കുക തുടങ്ങിയ കുറ്റങ്ങള്‍ ചുമത്തിയാണ് 15 ഉദ്യോഗസ്ഥരെ സസ്‌പെന്‍ഡ് ചെയ്തിരിക്കുന്നത്.
Content Highlights: Jharkhand Police Station Incident three arrested
