LIVE TV
ന്യൂഡല്ഹി: പ്രധാനമന്ത്രി നരേന്ദ്ര മോദിക്കെതിരായ 'ഭീകരവാദി' പരാമര്ശത്തില് കോണ്ഗ്രസ് അധ്യക്ഷന് മല്ലികാര്ജുന് ഖര്ഗെയ്ക്ക് നോട്ടീസയച്ച് തെരഞ്ഞെടുപ്പ് കമ്മീഷന്. കേന്ദ്രമന്ത്രിമാര് നല്കിയ പരാതിയിലാണ് ഖര്ഗെയ്ക്ക് തെരഞ്ഞെടുപ്പ് കമ്മീഷന് നോട്ടീസയച്ചത്. 24 മണിക്കൂറിനകം മറുപടി നല്കണമെന്നാണ് നോട്ടീസിലെ ആവശ്യം. തമിഴ്നാട് നിയമസഭാ തെരഞ്ഞെടുപ്പില് എഐഎഡിഎംകെ ബിജെപിയുമായി സഖ്യം ചേര്ന്നതിനെ വിമര്ശിക്കുന്നതിനിടെയായിരുന്നു ഖര്ഗെ നരേന്ദ്രമോദിയെ ഭീകരവാദിയെന്ന് വിളിച്ചത്. അണ്ണാദുരൈയുടെ ചിത്രം ഉപയോഗിക്കുന്ന എഐഎഡിഎംകെ എങ്ങനെ നരേന്ദ്ര മോദിയെപ്പോലെ ഒരു ഭീകരവാദിയുമായി കൈകോര്ക്കുന്നു എന്നും നീതിയിലും സമത്വത്തിലും വിശ്വസിക്കാത്ത ബിജെപി ജനാധിപത്യത്തെ ദുര്ബലപ്പെടുത്തുകയാണ് എന്നുമാണ് മല്ലികാര്ജുന് ഖര്ഗെ പറഞ്ഞത്.
പരാമര്ശം വിവാദമായതോടെ ഖര്ഗെ വിശദീകരണവുമായി രംഗത്തെത്തിയിരുന്നു. താന് പ്രധാനമന്ത്രിയെ വ്യക്തിപരമായി ഭീകരവാദിയെന്ന് വിളിച്ചിട്ടില്ലെന്നും അദ്ദേഹം ജനങ്ങളെയും രാഷ്ട്രീയ പാര്ട്ടികളെയും ഭയപ്പെടുത്തുന്നയാളാണ് എന്നാണ് ഉദ്ദേശിച്ചതെന്നുമാണ് ഖര്ഗെ വിശദീകരിച്ചത്. കേന്ദ്ര അന്വേഷണ ഏജന്സികളെ ഉപയോഗിച്ച് മോദി രാഷ്ട്രീയ എതിരാളികളെ നിരന്തരം ഭീഷണിപ്പെടുത്തുന്ന പശ്ചാത്തലത്തിലാണ് താന് അത്തരമൊരു വാക്ക് ഉപയോഗിച്ചതെന്നും ഖര്ഗെ പറഞ്ഞു.
നരേന്ദ്രമോദിയെ ഭീകരവാദിയെന്ന് വിളിച്ചതിന് പിന്നാലെ ഖര്ഗെയ്ക്കെതിരെ രൂക്ഷ വിമര്ശനവുമായി ബിജെപി നേതാക്കള് രംഗത്തെത്തിയിരുന്നു. പ്രധാനമന്ത്രിക്കെതിരായ പരാമര്ശത്തില് ഖര്ഗെ മാപ്പുപറയണമെന്നാണ് കേന്ദ്രമന്ത്രി പീയുഷ് ഗോയല് ആവശ്യപ്പെട്ടത്. കോണ്ഗ്രസ് ഇത്രയും തരംതാഴ്ന്ന നിലയിലേക്ക് അധഃപതിച്ചതില് ലജ്ജ തോന്നുന്നുവെന്നും ജനങ്ങളാല് തെരഞ്ഞെടുക്കപ്പെട്ട പ്രധാനമന്ത്രിയെ ഭീകരവാദിയെന്ന് വിളിച്ച ഖര്ഗെയുടെ പ്രസ്താവനയെ അപലപിക്കുന്നു എന്നുമാണ് പീയുഷ് ഗോയല് പറഞ്ഞത്. മോദിയെയും രാജ്യത്തെ ജനങ്ങളെയും അധിക്ഷേപിച്ച ഖര്ഗെ മാപ്പുപറയണമെന്നും അദ്ദേഹം ആവശ്യപ്പെട്ടു.
Content Highlights: Election Commission notice to Mallikarjun Kharge for remark against Narendra Modi
