LIVE TV
യുഎഇയിൽ വേനൽച്ചൂട് കഠിനമായതോടെ ദുബായിലെ പ്രമുഖ ഔട്ട്ഡോർ ടൂറിസം കേന്ദ്രങ്ങളുടെ പ്രവർത്തനങ്ങൾ താൽക്കാലികമായി അവസാനിപ്പിച്ചു. ഉയർന്ന താപനിലയിൽ നിന്ന് സന്ദർശകരെയും ജീവനക്കാരെയും സംരക്ഷിക്കുന്നതിനും വിപുലമായ നവീകരണ പ്രവർത്തനങ്ങൾക്കുമായാണ് ഇവ അടച്ചിടുന്നത്. വരും മാസങ്ങളിൽ ചൂട് കുറഞ്ഞ് രാജ്യം ശൈത്യകാലത്തിലേക്ക് നീങ്ങുമ്പോൾ, പുതിയ സീസണോടെ ഈ വിനോദ കേന്ദ്രങ്ങൾ ഒക്ടോബറോടെ വീണ്ടും തുറക്കും.
കുടുംബങ്ങളുടെ പ്രിയപ്പെട്ട വിനോദകേന്ദ്രമായ ഗ്ലോബൽ വില്ലേജിന്റെ മുപ്പത്തിയൊന്നാം സീസൺ ഒക്ടോബർ പകുതിയോടെ ആരംഭിക്കുമെന്നാണ് പ്രതീക്ഷിക്കുന്നത്. വസന്തകാലം വരെ നീളുന്ന ആറ് മാസത്തെ പുത്തൻ ഷോപ്പിംഗ്-കലാവിരുന്ന് അനുഭവങ്ങളാണ് ഇത്തവണയും ഒരുങ്ങുന്നത്. നൂറ് ദശലക്ഷത്തിലധികം പൂക്കളുള്ള ലോകത്തിലെ ഏറ്റവും വലിയ പ്രകൃതിദത്ത പുഷ്പോദ്യാനമായ ദുബായ് മിറക്കിൾ ഗാർഡന്റെ പതിനഞ്ചാം സീസൺ സെപ്റ്റംബർ അവസാനത്തോടെയോ ഒക്ടോബർ ആദ്യത്തോടെയോ പൊതുജനങ്ങൾക്കായി തുറന്നുനൽകും. മിറക്കിൾ ഗാർഡൻ അടഞ്ഞു കിടക്കുന്ന ഈ വേനൽക്കാലത്തും, തൊട്ടടുത്തുള്ള എയർ കണ്ടീഷൻ ചെയ്ത ഇൻഡോർ സംവിധാനമായ 'ദുബായ് ബട്ടർഫ്ലൈ ഗാർഡൻ' സന്ദർശകർക്ക് തുറന്നുനൽകിയിട്ടുണ്ട്. വന്യജീവികളുടെ സുരക്ഷയും ആവാസവ്യവസ്ഥയും പരിപാലിക്കുന്നതിനായി താൽക്കാലികമായി അടച്ച ദുബായ് സഫാരി പാർക്കിന്റെ എട്ടാം സീസണും ഒക്ടോബറോടെ പുനരാരംഭിക്കും.
പൂർണ്ണമായും ഔട്ട്ഡോർ സംവിധാനങ്ങളെ ആശ്രയിച്ചു പ്രവർത്തിക്കുന്ന ഈ മെഗാ ടൂറിസം കേന്ദ്രങ്ങളിൽ കഠിനമായ വേനൽച്ചൂടിൽ സന്ദർശകർക്ക് സുഖകരമായി ചെലവഴിക്കാൻ സാധിക്കില്ല എന്നതിനാലാണ് ഈ താൽക്കാലിക ഇടവേള. കൃത്യമായ ഉദ്ഘാടന തീയതികൾ ഔദ്യോഗികമായി പ്രഖ്യാപിക്കുന്നത് ഒക്ടോബറിന് തൊട്ടുമുമ്പായിരിക്കുമെങ്കിലും, ഈ അടച്ചിടൽ കാലയളവ് പുത്തൻ പവലിയനുകൾ നിർമ്മിക്കാനും വിപുലമായ നവീകരണ ജോലികൾ പൂർത്തിയാക്കാനുമാണ് അധികൃതർ വിനിയോഗിക്കുന്നത്. യുഎഇയുടെ മനോഹരമായ ശൈത്യകാല കാലാവസ്ഥ തിരിച്ചെത്തുമ്പോൾ സന്ദർശകർക്ക് കൂടുതൽ മനോഹരമായ അനുഭവങ്ങൾ സമ്മാനിക്കാൻ ഈ വിനോദ കേന്ദ്രങ്ങൾ ഒരുങ്ങും.
Content Highlights: As temperatures continue to rise across the UAE, authorities have announced a temporary halt to outdoor tourism activities in certain areas. The measure is aimed at ensuring public safety and protecting visitors from heat-related risks during the peak summer season.
