LIVE TV
കഴിഞ്ഞ ദിവസത്തെ കനത്ത ഇടിവിന് പിന്നാലെ ആഭ്യന്തര വിപണിയിൽ ശക്തമായ തിരിച്ചു വരവ്. നിഫ്റ്റി 50 ,23,928.95 നിലവാരത്തിൽ നേട്ടത്തോടെ വ്യാപാരം ആരംഭിച്ചു. സെൻസെക്സ് 550 പോയിന്റിലേറെ ഉയർന്നപ്പോൾ, നിഫ്റ്റി വീണ്ടും 24,000 എന്ന നിർണായക നിലവാരവും തൊട്ടു. വിലയിടിവിനെ അവസരമാക്കി നിക്ഷേപകർ വൻതോതിൽ ഓഹരികൾ വാങ്ങിയതാണ് വിപണിക്ക് ഇന്ന് കരുത്ത് പകർന്ന പ്രധാന ഘടകമായി മാറിയത്.
ഈ വാല്യൂ ബയിങ്ങിനു പിന്നാലെ വിദേശ സ്ഥാപന നിക്ഷേപകരുടെ വാങ്ങലും വിപണിയിലെ ആത്മവിശ്വാസം വർധിപ്പിച്ചു. റിയൽറ്റി, കൺസ്യൂമർ ഡ്യൂറബിൾസ്, ഫിനാൻഷ്യൽസ് ഉൾപ്പെടെയുള്ള നിരവധി മേഖലകളിലെ ഓഹരികൾ നേട്ടം രേഖപ്പെടുത്തി. വ്യാപകമായ വാങ്ങൽ പ്രവണത വിപണിയുടെ മൊത്തത്തിലുള്ള മുന്നേറ്റത്തിന് പിന്തുണ നൽകിയിട്ടുണ്ട്.
ആഗോള വിപണികളിൽ നിന്നുള്ള അനുകൂല സൂചനകളും ഇന്ത്യൻ വിപണിക്ക് കരുത്തായി. പശ്ചിമേഷ്യയിലെ സംഘർഷങ്ങളെ നിക്ഷേപകർ ഇപ്പോഴും നിരീക്ഷിക്കുന്നുണ്ടെങ്കിലും, ക്രൂഡ് ഓയിൽ വിലയിൽ വലിയ കുതിപ്പ് ഇല്ലാത്തത് ആശങ്കകൾ കുറച്ചു. അതിനാൽ നിലവിൽ നിക്ഷേപകർ പൂർണമായും ഭയപ്പെടേണ്ട സാഹചര്യമില്ലെന്നാണ് വിപണി നിരീക്ഷകർ വിലയിരുത്തുന്നത്.
എറ്റേണൽ, സൺ ഫാർമ, ഭാരതി എയർടെൽ, ഏഷ്യൻ പെയിന്റ്സ്, എൽ&ടി, ടൈറ്റൻ തുടങ്ങിയ ഓഹരികൾ മികച്ച നേട്ടം രേഖപ്പെടുത്തിയപ്പോൾ ഐടി മേഖലയിൽ വ്യാപകമായ വിൽപ്പനയെത്തുടർന്ന് സൂചിക സമ്മർദത്തിലായി. പ്രത്യേകിച്ച് പ്രമുഖ ഐടി കമ്പനികളുടെ ഓഹരികൾ താഴ്ന്നതോടെ നിക്ഷേപകർ കരുതലോടെയാണ് നീങ്ങിയത്.
വിപണി തുടക്കത്തിൽ തിരിച്ചുവരവിന്റെ സൂചന നൽകിയിട്ടുണ്ടെങ്കിലും ആഗോള രാഷ്ട്രീയ സാഹചര്യങ്ങളും ക്രൂഡ് ഓയിൽ വിലയിലെ നീക്കങ്ങളും വരും ദിവസങ്ങളിൽ ഇന്ത്യൻ ഓഹരി വിപണിയുടെ ദിശ നിർണയിക്കുന്ന പ്രധാന ഘടകങ്ങളാകുമെന്നാണ് വിപണി വിദഗ്ധരുടെ വിലയിരുത്തൽ.
ജിയോജിത് ഇൻവെസ്റ്റ്മെന്റ്സിന്റെ ചീഫ് മാർക്കറ്റ് സ്ട്രാറ്റജിസ്റ്റ് ആനന്ദ് ജെയിംസിന്റെ അഭിപ്രായത്തിൽ, നിഫ്റ്റി 24,600 വരെ കുതിച്ചുയർന്നതും തുടർന്ന് അതിവേഗം താഴ്ന്നതുമായ സാഹചര്യം വിലയിരുത്തുമ്പോൾ വിപണി ഇപ്പോൾ നിർണായക ഘട്ടത്തിലാണ്. ഇനി നിഫ്റ്റി 22,900 ലക്ഷ്യമിട്ട് വലിയ ഇടിവിലേക്ക് നീങ്ങാനോ, അല്ലെങ്കിൽ വീണ്ടും 24,400 നിലവാരത്തിലേക്ക് തിരിച്ചുകയറാനോ സാധ്യതയുണ്ടെന്ന് അദ്ദേഹം പറയുന്നു.
ആദ്യഘട്ടത്തിൽ നിഫ്റ്റി 24,041 മുതൽ 24,229 വരെയുള്ള നിലവാരങ്ങൾ ലക്ഷ്യമിടാം, അതേസമയം നിഫ്റ്റിക്ക് 23,936 നിലവാരത്തിന് മുകളിൽ സ്ഥിരത പുലർത്താൻ കഴിയാതെ വന്നാൽ, വിപണി വീണ്ടും ഇടിവിലേക്ക് നീങ്ങുകയും ആദ്യഘട്ടത്തിൽ 23,641 വരെ താഴാൻ സാധ്യതയുണ്ടെന്നും അദ്ദേഹം മുന്നറിയിപ്പ് നൽകുന്നു.അതേസമയം, ഭൗമരാഷ്ട്രീയ സാഹചര്യം, ക്രൂഡ് ഓയിൽ വിലയിലെ മാറ്റങ്ങൾ, വിദേശ നിക്ഷേപകരുടെ തുടർനീക്കങ്ങൾ എന്നിവയാണ് വരും ദിവസങ്ങളിൽ ഇന്ത്യൻ ഓഹരി വിപണിയുടെ ദിശ നിർണയിക്കുന്ന പ്രധാന ഘടകങ്ങളാകുകയെന്ന് വിദഗ്ധർ ചൂണ്ടിക്കാട്ടുന്നു.
Content Highlights: Sensex rises 550 pts, Nifty above 24,050: Value buying among four key factors behind partial market rebound
