LIVE TV
കോഴിക്കോട്: വടകരയില് ഡിസിസി സെക്രട്ടറിയുടെ വീട്ടിലെത്തി ആത്മഹത്യാശ്രമം നടത്തിയ വയോധികന് മരണത്തിന് കീഴടങ്ങി.
തിരുവള്ളൂര് സ്വദേശി ഇബ്രാഹിംകുട്ടി ഹാജി(71)യാണ് മരിച്ചത്. 75 ശതമാനം പൊള്ളലേറ്റ ഇബ്രാഹിമിനെ കോഴിക്കോട് മെഡിക്കല് കോളേജ് ആശുപത്രിയില് പ്രവേശിപ്പിച്ചിരുന്നു. ഡിസിസി സെക്രട്ടറി സുധീറിന്റെ വീട്ടിലെത്തി പെട്രോള് ഒഴിച്ചാണ് ഇബ്രാഹിംകുട്ടി ആത്മഹത്യാശ്രമം നടത്തിയത്.
ഇന്ന് രാവിലെ 10.30 ഓടെയായിരുന്നു സംഭവം. സുധീറിന്റെ വീട്ടിലെത്തിയ ഇബ്രാഹിം കയ്യില് കരുതിയ പെട്രോള് ശരീരത്തിലേക്ക് ഒഴിച്ച് തീ കൊളുത്തുകയായിരുന്നു. വീട്ടുകാരും നാട്ടുകാരും ഓടിക്കൂടിയാണ് തീ അണച്ചത്. ഉടന് തന്നെ വടകര ജില്ലാ ആശുപത്രിയില് എത്തിച്ചു. എന്നാല് പരിക്ക് ഗുരുതരമായതിനാല് കോഴിക്കോട് മെഡിക്കല് കോളേജിലേക്ക് മാറ്റി.
ഇബ്രാഹിമിന് സാമ്പത്തിക പ്രതിസന്ധിയുള്ളതായി വിവരം വന്നിരുന്നു. സുധീറിന്റെ നേതൃത്വത്തില് പ്രവര്ത്തിക്കുന്ന സഹകരണസംഘമായ കടത്തനാട് ലേബര് കോണ്ട്രാക്ട് സൊസൈറ്റിയില് ഇബ്രാഹിം പണം നിക്ഷേപിച്ചിരുന്നു. പല തവണ പണം പിന്വലിക്കുന്നതിനായി സമീപിച്ചിട്ടും പണം തിരികെ നല്കിയിരുന്നില്ല. ഇതാണോ ജീവനൊടുക്കിയതിന് പിന്നിലെന്നാണ് സംശയം.
(ജീവിതത്തിലെ വിഷമസന്ധികള്ക്ക് ആത്മഹത്യയല്ല പരിഹാരം. സമ്മര്ദ്ദങ്ങള് അതിജീവിക്കാന് സാധിച്ചേക്കില്ലെന്ന ആശങ്കയുണ്ടാകുമ്പോള് മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാന് ശ്രമിക്കുക. 1056 എന്ന നമ്പറില് വിളിക്കൂ, ആശങ്കകള് പങ്കുവെയ്ക്കൂ)
Content Highlights: elderly man died himself at congress leader's house in vadakara
