LIVE TV
കോട്ടയം: മോഹന്ലാലിനെ നായകനാക്കി മേജര് രവി സംവിധാനം ചെയ്ത കര്മ്മയോദ്ധ സിനിമയുടെ തിരക്കഥയെ മുന്നിര്ത്തിയുള്ള നിയമതര്ക്കത്തില് മേജര് രവിക്ക് തിരിച്ചടി. തിരക്കഥ പുതുപ്പള്ളി സ്വദേശിയും തിരക്കഥാകൃത്തുമായ റെജി മാത്യുവിന്റേതാണെന്ന് കോട്ടയം കൊമേഷ്യല് കോടതിയുടെ വിധിച്ചു.
റെജി മാത്യുവിന് മേജര് രവി 30 ലക്ഷം രൂപയും സിനിമയുടെ പകര്പ്പകാശവും നല്കണമെന്നും കോടതി ഉത്തരവിട്ടു. 13വര്ഷം നീണ്ട കോടതി നടപടികള്ക്ക് ശേഷമാണ് വിധി.
തന്റെ കഥയും തിരക്കഥയും സംഭാഷണവും അനുമതിയില്ലാതെ ഉപയോഗിച്ച് നിര്മ്മിച്ചതാണെന്ന റെജി മാത്യുവിന്റെ പരാതിയിലാണ് കോടതി നടപടി. 2012ലാണ് ചിത്രം പുറത്തിറങ്ങിയത്. ചിത്രത്തിന്റെ റിലീസിന് ഒരു മാസം മുന്പാണ് റിലീസ് തടയണമെന്നാവശ്യപ്പെട്ട് റെജി മാത്യു കോടതിയെ സമീപിച്ചത്.
അഞ്ച് ലക്ഷം രൂപ കെട്ടിവെച്ച ശേഷം സിനിമ റിലീസ് ചെയ്യാന് കോടതി അനുവദിക്കുകയായിരുന്നു. കഥ, തിരക്കഥ, സംഭാഷണം എന്നിവ സംബന്ധിച്ച് തര്ക്കമുണ്ട് എന്ന് രേഖപ്പെടുത്തി സിനിമ റിലീസ് ചെയ്യാനായിരുന്നു കോടതി അനുവദിച്ചത്. എന്നാല് തിരക്കഥാകൃത്തുക്കളുടെ സ്ഥാനത്ത് ഷാജി, സുമേഷ് എന്നിവരുടെ പേര് ചേര്ത്തായിരുന്നു സിനിമ റിലീസ് ചെയ്തത്.
ഇതിനെ മുന്നിര്ത്തി കോടതി ഉത്തരവ് ലംഘിച്ചെന്ന് കാണിച്ച് 40 ലക്ഷം രൂപ നഷ്ടപരിഹാരം ആവശ്യപ്പെട്ടാണ് റെജി മാത്യു കോടതിയെ സമീപിച്ചത്. തിരക്കഥയും സംഭാഷണവും തന്റേതാണെന്ന് പ്രഖ്യാപിക്കണമെന്നും ആവശ്യപ്പെട്ടിരുന്നു.
കേസില് മേജര് രവിയായിരുന്നു ഒന്നാം പ്രതി. നിര്മ്മാതാവ് ഹനീഫ് മുഹമ്മദ്, ഷാജി എസ് വി, സുമേഷ് റോബിന് എന്നിവരും പ്രതികളായിരുന്നു. കഥ തന്റേതാണെന്നായിരുന്നു കേസില് മേജര് രവിയുടെ വാദം. സിനിമ രചയിതാക്കളായ മറ്റുപലരോടും ചര്ച്ച ചെയ്ത കൂട്ടത്തില് റെജി മാത്യുവിനോടും കഥ പറഞ്ഞുവെന്നുമായിരുന്നു മേജര് രവി വാദിച്ചത്.
