LIVE TV
കൊച്ചി: കെ എം ഷാജഹാനെതിരെ പരാതി നല്‍കി പി വി ശ്രീനിജിന്‍ എംഎല്‍എ. സിപിഐഎം എംഎല്‍എമാരെ സംശയ നിഴലില്‍ നിര്‍ത്തും വിധം വാസ്തവ വിരുദ്ധമായ വീഡിയോ നിര്‍മിച്ചെന്ന് ചൂണ്ടിക്കാട്ടിയാണ് ഷാജഹാനും യൂട്യൂബ് ചാനലിനുമെതിരെ ശ്രീനിജിന്‍ എംഎല്‍എ പരാതി നല്‍കിയത്. മുഖ്യമന്ത്രി, ഡിജിപി എന്നിവര്‍ക്കാണ് എംഎല്‍എ പരാതി നല്‍കിയിരിക്കുന്നത്. ഫേസ്ബുക്കിലൂടെ എംഎല്‍എ തന്നെയാണ് പരാതി നല്‍കിയ വിവരം അറിയിച്ചത്.
ഫേസ്ബുക്ക് പോസ്റ്റിന്റെ പൂര്‍ണരൂപം
2025 സെപ്റ്റംബര്‍ 16 ആം തീയതി പ്രതിപക്ഷം എന്ന യു ട്യൂബ് ചാനലിലൂടെ കെ എം ഷാജഹാന് എന്ന വ്യക്തി എറണാകുളം ജില്ലയിലെ 4 സിപിഐഎം എം എല്‍ എ മാരെ സംശയ നിഴലില്‍ നിര്‍ത്തും വിധം ഒരു വിഡിയോ ചെയ്തിരുന്നു. വാസ്തവ വിരുദ്ധമായ ഈ വീഡിയോക്ക് എതിരെയും ഇത് ചെയ്ത യു ട്യൂബ് ചാനലിന് എതിരെയും അതിന്റെ അവതാരകന്‍ ആയ കെ എം ഷാജഹാന് എതിരെയും ബഹുമാനപ്പെട്ട മുഖ്യമന്ത്രിക്കും ഡി ജി പി ക്കും പരാതി നല്‍കിയ വിവരം ഇതിനാല്‍ അറിയിക്കുന്നു.
അപവാദ പ്രചാരണം ചൂണ്ടിക്കാട്ടി സിപിഐഎം നേതാവ് കെ ജെ ഷൈന്‍ നല്‍കിയ പരാതിയില്‍ കെ എം ഷാജഹാനെതിരെ പൊലീസ് കേസെടുത്തിരുന്നു. ഷാജഹാന് പുറമേ പ്രാദേശിക കോണ്‍ഗ്രസ് നേതാവ് ഗോപാലകൃഷ്ണനെതിരെയും പൊലീസ് കേസെടുത്തിരുന്നു. സ്ത്രീത്വത്തെ സമൂഹമാധ്യമങ്ങളിലൂടെ അപമാനിച്ചുവെന്ന വകുപ്പുകള്‍പ്പെടെ ചുമത്തിയായിരുന്നു കേസെടുത്തത്.
സൈബര്‍ ഇടങ്ങളില്‍ തനിക്കെതിരെ ഉന്നയിക്കപ്പെട്ട ആരോപണങ്ങളില്‍ പ്രതികരിച്ച് കെ ജെ ഷൈന്‍ രംഗത്ത് വന്നിരുന്നു. കോണ്‍ഗ്രസാണ് പിന്നിലെന്ന് വ്യക്തമാക്കുന്ന രീതിയിലായിരുന്നു കെ ജെ ഷൈന്‍ പ്രതികരിച്ചത്. തനിക്കെതിരെ ബോംബ് വരുന്നുവെന്ന സൂചന സുഹൃത്തായ കോണ്‍ഗ്രസ് പ്രവര്‍ത്തകന്‍ നല്‍കിയിരുന്നുവെന്ന് ഷൈന്‍ റിപ്പോര്‍ട്ടറിനോട് പറഞ്ഞിരുന്നു. കോണ്‍ഗ്രസ് ക്യാമ്പില്‍ നിന്നാണ് ഈ ആരോപണങ്ങള്‍ വന്നതെന്നും അവര്‍ വ്യക്തമാക്കിയിരുന്നു.
Content Highlights- P V Sreenijin mla filed complaint against k m shajahan
