LIVE TV
സൂപ്പര് സ്ട്രൈക്കര് ക്രിസ്റ്റ്യാനോ റൊണാള്ഡോയ്ക്ക് ഗോള് നേടാനാകാത്ത ദിനത്തിലും, യുവേഫ നേഷന്സ് ലീഗിലെ ഉദ്ഘാടന മത്സരത്തില് വെയ്ല്സിനെ 1-0 ന് തോല്പ്പിച്ച് പോര്ച്ചുഗല്. ഫിഫ ലോകകപ്പിലെ തിരിച്ചടിക്ക് ശേഷം വീണ്ടും ടീമിലേക്ക് തിരഞ്ഞെടുക്കപ്പെട്ട 41-കാരനായ ക്രിസ്റ്റ്യാനോയ്ക്ക് ഏഴ് തവണ ഗോളിനായി ശ്രമിച്ചെങ്കിലും ലക്ഷ്യത്തിലെത്തിക്കാനായില്ല. അല് നസ്ര് ടീമിലെ അദ്ദേഹത്തിന്റെ സഹതാരം ജാവോ ഫെലിക്സ് 22-ാം മിനിറ്റില് നേടിയ ഗോളാണ് പോര്ച്ചുഗലിന് വിജയം സമ്മാനിച്ചത്. 67 മിനിറ്റിനു ശേഷം ക്രിസ്റ്റ്യാനോയെ ഗ്രൗണ്ടില് നിന്ന് തിരിച്ചുവിളിച്ചു. വെയ്ല്സിന്റെ 5 ഷോട്ടുകള്ക്കെതിരെ ആകെ 22 ഷോട്ടുകള് ഉതിര്ത്ത് പോര്ച്ചുഗല് തങ്ങളുടെ ആക്രമണ മികവ് കാണിക്കുകയും അര്ഹിച്ച വിജയം സ്വന്തമാക്കുകയും ചെയ്തു.
പോര്ച്ചുഗലിന്റെ ഇതിഹാസ സ്ട്രൈക്കര്ക്ക് മോശം ദിവസമായിരുന്നു. 36-ാം മിനിറ്റില് ലഭിച്ച ഫ്രീ കിക്ക് ഉയര്ത്തിവിടാന് അദ്ദേഹത്തിനായില്ല, തൊട്ടടുത്ത മിനിറ്റില് അടിച്ച വോളി ലക്ഷ്യം കാണാതെ പുറത്തുപോവുകയും ചെയ്തു. 40-ാം മിനിറ്റില് ക്രിസ്റ്റ്യാനോ ലക്ഷ്യത്തിലേക്ക് ഷോട്ട് ഉതിര്ത്തുവെങ്കിലും ഡാനി വാര്ഡ് അത് തടഞ്ഞു. 49-ാം മിനിറ്റില് റൂബന് നെവസിന്റെ ക്രോസ് ഗോളാക്കി മാറ്റാനുള്ള അവസരം അദ്ദേഹം പാഴാക്കി. ഒടുവില് 59-ാം മിനിറ്റില് ക്രിസ്റ്റ്യാനോ പന്ത് വലയിലെത്തിച്ചെങ്കിലും, അത് ഓഫ്സൈഡ് വിധിച്ചതിനാല് ഗോള് അനുവദിക്കപ്പെട്ടില്ല.
ഗ്രൂപ്പ് ഡിയില് നടന്ന നോര്വേ-ഡെന്മാര്ക്ക് മത്സരത്തില്, എര്ലിങ് ഹാളണ്ട് നേടിയ ഇരട്ട ഗോളുകളാണ് 2026 ഫിഫ ലോകകപ്പ് ക്വാര്ട്ടര് ഫൈനലിസ്റ്റുകളായ നോര്വേയ്ക്ക് വിജയം നല്കിയത്. 14-ാം മിനിറ്റില് ഓസ്കാര് ബോബ് നേടിയ ഗോളില് നോര്വേ മുന്നിലെത്തി.
അന്തോണിയോ നുസ നല്കിയ അസിസ്റ്റില് നിന്നായിരുന്നു ഹാളണ്ടിന്റെ ആദ്യ ഗോള്. മാഞ്ചെസ്റ്റര് സിറ്റി സ്ട്രൈക്കറായ ഹാളണ്ട് ഗോള്കീപ്പറിന്റെ കാലുകള്ക്കിടയിലൂടെ പന്ത് വലയിലേക്ക് അടിച്ചുകയറ്റി. തുടര്ന്ന് മിഖായെല് ഡാംസ്ഗാര്ഡ് (25-ാം മിനിറ്റ്), റാസ്മസ് ഹോയ്ലണ്ട് (60-ാം മിനിറ്റ്) എന്നിവരിലൂടെ ഡെന്മാര്ക്ക് തിരിച്ചുവിളിച്ചെങ്കിലും, നോര്വേയ്ക്കായി വിജയഗോള് നേടിയത് ഹാളണ്ട് തന്നെയായിരുന്നു. ഒരു കോര്ണറിന് ശേഷം ലഭിച്ച ലോ പാസ് ഗോള് പോസ്റ്റിന് സമീപത്ത് വെച്ച് ഒട്ടും സമയം കളയാതെ ഹാളണ്ട് വലയിലാക്കി. ഈ രണ്ട് ഗോളുകളോടെ, ബ്രസീലിന്റെ റൊണാള്ഡോ, സ്വീഡന്റെ സ്ലാറ്റന് ഇബ്രാഹിമോവിച്ച് എന്നിവരുടെ 62 ഗോളുകള് എന്ന റെക്കോര്ഡ് ഹാളണ്ട് മറികടന്നു. നോര്വേയ്ക്കായി 56 മത്സരങ്ങളില് നിന്ന് ഹാളണ്ടിന് 64 ഗോളുകളുണ്ട്. അതേസമയം ജര്മനി-നെതര്ലന്ഡ്സ് മത്സരം സമനിലയായി (1-1). ഇഞ്ചുറി ടൈം ഗോളിലാണ് നെതര്ലന്ഡ്സ് സമനില കണ്ടെത്തിയത്. ജര്മനിക്കുവേണ്ടി ഫെലിക്സ് നാംചയും നെതര്ലന്ഡ്സിനുവേണ്ടി കോഡി ഗാക്പോയും ഗോളടിച്ചു.
content highlights: UEFA Nations League: Portugal Wins, Erling Haaland Scores Brace
