LIVE TV
കോടതി എന്ന് കേള്ക്കുമ്പോള് തന്നെ മനസ്സില് തെളിയുന്ന ചില കാഴ്ചകളുണ്ട്. ജഡ്ജിയുടെ മുന്നില് നിരന്നിരിക്കുന്ന അഭിഭാഷകര്, കറുത്ത കോട്ടും ഗൗണും ധരിച്ച് വാദിക്കുന്നവര്, കഴുത്തില് കെട്ടിയിരിക്കുന്ന വെള്ള ബാന്ഡുകള്… കോടതിമുറിയിലെ ഈ കാഴ്ചയ്ക്ക് കാലങ്ങളായി വലിയ മാറ്റമൊന്നും സംഭവിച്ചിട്ടില്ല. എന്തുകൊണ്ടായിരിക്കും അഭിഭാഷകരുടെ കോട്ടിന് കറുപ്പ് നിറം ? അതുപോലെ വെള്ള ഷര്ട്ടിനും കഴുത്തിലെ വെള്ള ബാന്ഡിനും പിന്നിലെന്താണ്? ചരിത്രവും പാരമ്പര്യവും നിയമവ്യവസ്ഥയുടെ ചില പ്രത്യേക ആശയങ്ങളും ഇതിന് പിന്നിലുണ്ട്.
അഭിഭാഷകരുടെ വേഷത്തിന്റെ പ്രധാന ഭാഗമായി കറുപ്പ് നിറം മാറിയെങ്കിലും ഇതിന് പിന്നില് നൂറ്റാണ്ടുകള് പഴക്കമുള്ള ചരിത്രമുണ്ട്. ബ്രിട്ടീഷ് നിയമവ്യവസ്ഥയില് ജഡ്ജിമാരുടെയും അഭിഭാഷകരുടെയും വേഷത്തിന് പ്രത്യേക പ്രാധാന്യം ലഭിച്ചിരുന്നു. പിന്നീട് ബ്രിട്ടീഷ് ഭരണകാലത്ത് ഇന്ത്യയിലും ഈ രീതികള് എത്തി. എന്നാല് കറുപ്പ് തിരഞ്ഞെടുക്കപ്പെട്ടതിന് ചരിത്രത്തില് മറ്റൊരു പ്രധാന കാരണവും പറയപ്പെടുന്നുണ്ട്.
ഇംഗ്ലണ്ടിലെ നിയമവ്യവസ്ഥയില് കറുത്ത മേല്കുപ്പായം വ്യാപകമായി ഉപയോഗിക്കപ്പെടാനുളള കാരണമായി 17-ാം നൂറ്റാണ്ടില് ബ്രട്ടീഷ് രാജകുടുംബത്തില് നിലനിന്നിരുന്ന ദുഃഖാചരണത്തിലേക്കും ചരിത്രവിവരങ്ങള് വിരല് ചൂണ്ടുന്നുണ്ട്. ചാള്സ് രണ്ടാമന്റെ മരണവുമായി ബന്ധപ്പെട്ട് 1685 ല് ജഡ്ജിമാരും അഭിഭാഷകരും കറുത്ത വേഷം ധരിച്ചുവെന്നും പിന്നീട് അത് നിയമവ്യവസ്ഥയുടെ സ്ഥിരം വേഷമായി മാറിയെന്നുമുള്ള ചരിത്രവാദമുണ്ട്.
എന്നാല് കറുത്ത നിയമവേഷത്തിന്റെ ചരിത്രം ഇത്ര ലളിതമായ ഒരു സംഭവത്തിലേക്ക് മാത്രം ചുരുക്കാനാകില്ല. ഇംഗ്ലീഷ് നിയമവ്യവസ്ഥയില് അതിന് മുമ്പുതന്നെ പ്രത്യേക വേഷരീതികള് നിലനിന്നിരുന്നതായി പറയപ്പെടുന്നു.
നിയമവ്യവസ്ഥയില് കറുപ്പ് ഗൗരവത്തിന്റെയും അച്ചടക്കത്തിന്റെയും ഔദ്യോഗികതയുടെയും പ്രതീകമായാണ് കാണപ്പെടുന്നത്. കോടതിയില് വ്യക്തിപരമായ വേഷഭംഗിയേക്കാളും ഫാഷനേക്കാളും പ്രാധാന്യം നല്കുന്നത് സ്ഥാനത്തിനും നിയമത്തിനുമാണ്. എല്ലാവരും ഏകദേശം ഒരേ രീതിയിലുള്ള വേഷം ധരിക്കുന്നതിലൂടെ കോടതിമുറിയില് വ്യക്തിയേക്കാള് നിയമത്തിനും നീതിന്യായ സംവിധാനത്തിനുമാണ് പ്രാധാന്യം എന്ന ആശയവും പ്രകടമാകുന്നു. അതുകൊണ്ടുതന്നെ അഭിഭാഷകന്റെ കറുത്ത കോട്ട് ഒരു സാധാരണ വസ്ത്രമല്ല. അത് അയാളുടെ പ്രൊഫഷന്റെ ഔദ്യോഗിക അടയാളം കൂടിയാണ്.
കറുത്ത കോട്ടിനൊപ്പം കഴുത്തില് കാണുന്ന രണ്ട് വെള്ള തുണിക്കഷണങ്ങള് ശ്രദ്ധിച്ചിട്ടുണ്ടാകും. ഇവയെ 'Advocate's Bands' എന്നാണ് വിളിക്കുന്നത്. ഇവയ്ക്കും ചരിത്രപരമായ പാരമ്പര്യമുണ്ട്. ചില ചരിത്ര വിവരങ്ങളനുസരിച്ച് ഈ വെള്ള ബാന്ഡുകള് പുരാതനകാലത്തെ നിയമത്തിന്റെ പ്രതീകങ്ങളുമായി ബന്ധിപ്പിക്കപ്പെടുന്നു. കറുപ്പും വെള്ളയും ചേര്ന്ന ഈ വേഷം കോടതിയുടെ ഗൗരവവും ഔദ്യോഗികതയും കൂടുതല് പ്രകടമാക്കുന്നു.
ഇന്ത്യയില് അഭിഭാഷകരുടെ കോടതിവേഷത്തിന് വ്യക്തമായ ചട്ടങ്ങളുണ്ട്. Advocates Act, 1961 പ്രകാരം അഭിഭാഷകരുടെ വേഷം സംബന്ധിച്ച ചട്ടങ്ങള് രൂപപ്പെടുത്താനുള്ള അധികാരം Bar Council of Indiaയ്ക്കുണ്ട്. അതിന്റെ അടിസ്ഥാനത്തില് ബാര് കൗണ്സില് ഓഫ് ഇന്ത്യ റൂള്സ്, അഭിഭാഷകര് കോടതിയില് ധരിക്കേണ്ട വേഷം വ്യക്തമാക്കുന്നു.
ചട്ടപ്രകാരം പുരുഷ അഭിഭാഷകര്ക്ക് കറുത്ത കോട്ട്, വെള്ള ഷര്ട്ട്, വെള്ള ബാന്ഡുകള്, ആവശ്യമായിടത്ത് അഭിഭാഷകന്റെ ഗൗണ് എന്നിവ ഉള്പ്പെടുന്ന വേഷമാണ് നിര്ദേശിച്ചിരിക്കുന്നത്. സ്ത്രീ അഭിഭാഷകര്ക്കും കറുത്ത ജാക്കറ്റ്/കോട്ട്, വെള്ള ബാന്ഡുകള് തുടങ്ങിയവയ്ക്കൊപ്പം സാരി, സല്വാര്-കുര്ത്ത തുടങ്ങിയ ചില വേഷങ്ങള് അനുവദിച്ചിട്ടുണ്ട്.
ബാര് കൗണ്സില് ഓഫ് ഇന്ത്യയുടെ ചട്ടപ്രകാരം സുപ്രീം കോടതിയിലും ഹൈക്കോടതിയിലും ഹാജരാകുമ്പോള് അഭിഭാഷകരുടെ ഗൗണ് സംബന്ധിച്ച നിബന്ധന കൂടുതല് കര്ശനമാണ്. മറ്റു കോടതികളില് ചില സാഹചര്യങ്ങളില് ഗൗണ് നിര്ബന്ധമല്ല. കൂടാതെ വേനല്ക്കാലത്ത് ചില കോടതികളില് കറുത്ത കോട്ടിന്റെ കാര്യത്തിലും ഇളവുകള് നല്കാറുണ്ട്.ചൂടേറിയ കാലാവസ്ഥ കണക്കിലെടുത്ത് സംസ്ഥാന ഹൈക്കോടതികളും ചില സമയങ്ങളില് ഡ്രസ് കോഡില് ഇളവുകള് നല്കാറുണ്ട്.
ജഡ്ജിമാരുടെ വേഷത്തിനും ഇതേ നിയമപാരമ്പര്യത്തിന്റെ സ്വാധീനമുണ്ട്. കോടതിയിലെത്തുന്ന വ്യക്തികളുടെ വ്യക്തിപരമായ തിരിച്ചറിയലിനേക്കാള് അവരുടെ ഔദ്യോഗിക സ്ഥാനത്തിനും കോടതിയുടെ അധികാരത്തിനുമാണ് പ്രാധാന്യം നല്കുന്നതെന്ന ആശയം വേഷത്തിലൂടെ പ്രകടമാകുന്നു. അതുകൊണ്ടാണ് സിനിമകളില് പോലും ഒരു ജഡ്ജിയെയോ അഭിഭാഷകനെയോ കാണിക്കുമ്പോള് കറുത്ത കോട്ടും വെള്ള ബാന്ഡുകളും കാണുന്നത്. വര്ഷങ്ങളായി ജനങ്ങളുടെ മനസ്സില് നിയമവ്യവസ്ഥയുടെ ദൃശ്യപ്രതീകമായി തന്നെ ഈ വേഷം മാറിയിട്ടുണ്ട്.
Content Highlights :Where did the decision to adopt the colour black for lawyers' attire originate? History, tradition, and certain specific concepts of the legal system lie behind it.
