LIVE TV
രുചികരവും ആരോഗ്യത്തിന് ഗുണപ്രദവുമായതിനാല് ബദാമിനെ സൂപ്പര്ഫുഡ് എന്നാണ് വിളിക്കുന്നത്. നിങ്ങളുടെ ഹൃദയത്തിനും, തലച്ചോറിനും, ശരീരഭാരം കുറയ്ക്കുന്നതിനും ബദാം സഹായിക്കുന്നു. ബദാം ദിവസവും ആഹാരത്തില് ഉള്പ്പെടുത്തിയാല് ഉണ്ടാകുന്ന ആരോഗ്യ ഗുണങ്ങള് ധാരാളമാണ്.
ബദാം കുടല് ബാക്ടീരിയകള് നന്നായി പ്രവര്ത്തിക്കാന് സഹായിക്കുന്നു. ബദാമും ബദാം തൊലിയും പ്രീബയോട്ടിക് ആയി കണക്കാക്കപ്പെടുന്നു. കാരണം അവ കുടലില് ഗുണകരമായ ബാക്ടീരിയകള് വളരാന് സഹായിക്കുന്നു. കുടലിലെ ബാക്ടീരിയകള് വളരുമ്പോള്, അവ കൂടുതല് ബ്യൂട്ടറേറ്റ് (കുടല് സൂക്ഷ്മാണുക്കള് പ്രോസസ്സ് ചെയ്യുമ്പോള് ഉത്പാദിപ്പിക്കപ്പെടുന്ന ഒരു തരം ഫാറ്റി ആസിഡാണ് ബ്യൂട്ടൈറേറ്റ്) ഉത്പാദിപ്പിക്കുന്നു. ബ്യൂട്ടറേറ്റിന് ആരോഗ്യത്തില് നല്ല സ്വാധീനമുണ്ട്. മാത്രമല്ല ചില ഉപാപചയ രോഗങ്ങള് തടയാനും ചികിത്സിക്കാനും പോലും ഇത് സഹായിച്ചേക്കാം.
ബദാം ഹൃദയത്തെ പല തരത്തില് സംരക്ഷിക്കുന്നു. ഇവ 'നല്ല' ഹൃദയ സംരക്ഷണ ഹൈ-ഡെന്സിറ്റി ലിപ്പോപ്രോട്ടീന് (HDL) കൊളസ്ട്രോള് നിലനിര്ത്തുകയോ വര്ദ്ധിപ്പിക്കുകയോ ചെയ്യും. അതേസമയം 'മോശം' ലോ-ഡെന്സിറ്റി ലിപ്പോപ്രോട്ടീന് (LDL) അളവ് കുറയ്ക്കുമെന്നും തെളിയിക്കപ്പെട്ടിട്ടുണ്ട്.
ഉയര്ന്ന രക്തസമ്മര്ദ്ദം അല്ലെങ്കില് രക്താതിമര്ദ്ദം, ഹൃദയം, രക്തക്കുഴല് സംവിധാനം എന്നിവയുള്പ്പെടെയുള്ള അവയവങ്ങളില് അധിക സമ്മര്ദ്ദം ചെലുത്തുന്നു. ബദാമും മറ്റ് നട്സും രക്തക്കുഴലുകളുടെ പ്രവര്ത്തനം മെച്ചപ്പെടുത്തുന്നു. അതായത് അവ രക്തക്കുഴലുകള് വിശ്രമിക്കാനും ധമനികളുടെ കാഠിന്യം കുറയ്ക്കാനും സഹായിക്കുന്നു.
ഭക്ഷണത്തില് ബദാം ഉള്പ്പെടുത്തിയ ഉയര്ന്ന കൊളസ്ട്രോള് ഉള്ള ആളുകള്ക്ക് എല്ഡിഎല് കൊളസ്ട്രോള് അളവ് കുറയുകയും ബദാം കഴിക്കാത്തവരെ അപേക്ഷിച്ച് എച്ച്ഡിഎല് കൊളസ്ട്രോള് അളവ് നിലനിര്ത്തുകയും ചെയ്തതായി ഗവേഷണങ്ങള് തെളിയിച്ചിട്ടുണ്ട്. ബദാം കഴിക്കുന്നവര്ക്ക് വയറിലെയും കാലിലെയും കൊഴുപ്പ് കുറഞ്ഞതായും കണ്ടെത്തിയിട്ടുണ്ട്.
ബദാമില് വിറ്റാമിന് ഇ പോലുള്ള ആന്റിഓക്സിഡന്റുകള് അടങ്ങിയിട്ടുണ്ട്. വിറ്റാമിന് ഇ നിങ്ങളുടെ ശരീരത്തെ ഫ്രീ റാഡിക്കലുകളില് നിന്ന് സംരക്ഷിക്കുന്നു. ഫ്രീറാഡിക്കലുകള് കോശങ്ങള്ക്കും കലകള്ക്കും അവയവങ്ങള്ക്കും ദോഷം ചെയ്യും. ഈ കേടുപാടുകള് അകാല വാര്ദ്ധക്യത്തിനും രോഗത്തിനും കാരണമാകും. മാത്രമല്ല വിറ്റാമിന് ഇ പ്രതിരോധശേഷിയെ സഹായിക്കുന്നു. വീക്കം കുറയ്ക്കുന്നു. രക്തക്കുഴലുകളുടെ വികസത്തിന് സഹായിക്കുന്നു, രക്തയോട്ടം മെച്ചപ്പെടുത്തുന്നു, അല്ഷിമേഴ്സ് ഉള്പ്പെടെയുള്ള ന്യൂറോഡീജനറേറ്റീവ് അവസ്ഥകളില് നിന്നുള്ള സംരക്ഷണവുമായി ബന്ധപ്പെട്ടിരിക്കുന്നു.
ബദാമില് ആരോഗ്യകരമായ പോഷകങ്ങള് അടങ്ങിയിട്ടുണ്ട്. മോണോസാച്ചുറേറ്റഡ്, പോളിഅണ്സാച്ചുറേറ്റഡ് കൊഴുപ്പുകളുടെ മികച്ച ഉറവിടങ്ങളാണ് ബദാം. ഇവ ആരോഗ്യകരമായ കൊഴുപ്പുകളാണ്. അപൂരിത കൊഴുപ്പുകള് നിങ്ങളുടെ എല്ഡിഎല് കൊളസ്ട്രോള് കുറയ്ക്കാന് സഹായിക്കും.
ബദാമില് വലിയ അളവില് കാണപ്പെടുന്ന മറ്റൊരു പോഷകമാണ് മഗ്നീഷ്യം. നാഡികളുടെയും പേശികളുടെയും പ്രവര്ത്തനത്തില് മഗ്നീഷ്യം ഒരു പങ്കു വഹിക്കുന്നു. ഹൃദയമിടിപ്പ് സ്ഥിരമായി നിലനിര്ത്തുന്നു. എല്ലുകളെ ആരോഗ്യത്തോടെ നിലനിര്ത്താന് സഹായിക്കുന്നു. ആരോഗ്യകരമായ രോഗപ്രതിരോധ സംവിധാനത്തെയും സഹായിക്കുന്നു.
ശരീരഭാരം നിയന്ത്രിക്കാന് ശ്രമിക്കുകയാണെങ്കില് കഴിക്കാന് ഏറ്റവും നല്ല നട്സുകളില് ഒന്നാണ് ബദാം . ബദാം ബോഡി മാസ് ഇന്ഡക്സ് (ബിഎംഐ), അരക്കെട്ടിന്റെ ചുറ്റളവ്, മധ്യഭാഗത്തിനും അവയവങ്ങള്ക്കും ചുറ്റും അടിഞ്ഞുകൂടുന്ന കൊഴുപ്പ് എന്നിവ മെച്ചപ്പെടുത്തുമെന്ന് തെളിയിക്കപ്പെട്ടിട്ടുണ്ട്.
കൂടാതെ, ബദാം നിങ്ങളുടെ വിശപ്പ് നിയന്ത്രിക്കാന് സഹായിക്കുന്നു. തല്ഫലമായി, മറ്റ് ഭക്ഷണങ്ങള് കഴിക്കുന്നത് കുറവാണെന്ന് നിങ്ങള് കണ്ടെത്തിയേക്കാം. രക്തത്തിലെ പഞ്ചസാരയുടെ അളവ് നിയന്ത്രിക്കാനും വിശ്രമവേളയില് കൂടുതല് ഊര്ജ്ജം ഉപയോഗിക്കാനും ബദാം സഹായിക്കും.
ആര്ത്തവവിരാമം സംഭവിച്ചിട്ടുള്ളവരാണെങ്കില് ഭക്ഷണത്തില് ബദാം ഉള്പ്പെടുത്തുന്നത് നന്നായിരിക്കും. ആര്ത്തവവിരാമത്തിനു ശേഷമുള്ള പഠനത്തില് പങ്കെടുത്തവരില് നടത്തിയ ഗവേഷണത്തില്, ബദാം ഭക്ഷണത്തില് ഉള്പ്പെടുത്തിയവര്ക്ക് 16 ആഴ്ചകള്ക്കുശേഷം ചുളിവുകള് കുറയുകയും ചര്മ്മത്തിന്റെ നിറം മെച്ചപ്പെടുകയും ചെയ്തതായി കണ്ടെത്തി.
മറ്റ് നട്സുകളുമായി താരതമ്യപ്പെടുത്തുമ്പോള്, ബദാമില് മറ്റ് പോഷകങ്ങള്ക്കൊപ്പം ഏറ്റവും ഉയര്ന്ന അളവില് അല്ലെങ്കില് ഏതാണ്ട് ഏറ്റവും ഉയര്ന്ന അളവില് നാരുകള്, പ്രോട്ടീന്, മോണോസാച്ചുറേറ്റഡ്, പോളിഅണ്സാച്ചുറേറ്റഡ് കൊഴുപ്പുകള്, മഗ്നീഷ്യം, കാല്സ്യം, ഇരുമ്പ്, ഫോളേറ്റ് എന്നിവ അടങ്ങിയിട്ടുണ്ട്.
100 ഗ്രാം അസംസ്കൃത ബദാമില്
കലോറി: ഏകദേശം 600
കൊഴുപ്പ്: 51.1 ഗ്രാം
ഫൈബര്: 10.8 ഗ്രാം
പ്രോട്ടീന്: 21.4 ഗ്രാം
ബയോട്ടിന്: 57 മൈക്രോഗ്രാം
കാല്സ്യം: 254 മില്ലിഗ്രാം (മി.ഗ്രാം)
ഫോസ്ഫറസ്: 503 മില്ലിഗ്രാം
മഗ്നീഷ്യം: 258 മില്ലിഗ്രാം
ചെമ്പ്: 0.91 മില്ലിഗ്രാം
ബദാം കഴിക്കുന്നതിന് അപകടസാധ്യതകള് കുറവാണ്. ബദാം അലര്ജിയുള്ളവരില് ബദാം ഗുരുതരവും ജീവന് ഭീഷണിയുമായ പ്രതിപ്രവര്ത്തനങ്ങള്ക്ക് കാരണമാകും. നിങ്ങള്ക്ക് അലര്ജിയുണ്ടെങ്കില് ബദാം കഴിക്കരുത്. കൂടുതല് കഴിക്കുന്നതും അപകടകരമാണ്.
(ഈ ലേഖനം വിവരങ്ങള് നല്കുന്നതിന് വേണ്ടി മാത്രമുള്ളതാണ്. ആരോഗ്യസംബന്ധമായ പ്രശ്നങ്ങള്ക്ക് ഒരു ഡോക്ടറുടെ സേവനം തേടേണ്ടത് വളരെ അത്യാവശ്യമാണ്)
Content Highlights : Almonds are a superfood rich in antioxidants, calcium, riboflavin, magnesium and many other nutrients.
