LIVE TV
അപ്പിളിന്റെ കന്നി ഫോൾഡബിൾ സ്മാർട്ട്ഫോൺ ഐഫോൺ ഡ്യൂവോ യുഎഇ വിപണിയിൽ പ്രീ-ഓർഡറിനെത്തി. 256 ജിബി ശേഷിയുള്ള അടിസ്ഥാന മോഡലിന് 8499 ദിർഹമാണ് ( ഏകദേശം 219167 രൂപ) പ്രാരംഭ വില. യുഎഇ സമയം ഇന്ന് വെെകീട്ട് (ഒക്ടോബർ 16) നാല് മണി മുതലാണ് ആപ്പിൾ ഓൺലെെൻ സ്റ്റോറിലൂടെ ബുക്കിങ് തുടങ്ങിയത്. ബുക്ക് ചെയ്യുന്ന ഉപഭോക്താക്കൾക്ക് ഒക്ടോബർ 23 മുതൽ ഡെലിവറി ലഭ്യമാകുമെന്ന് കമ്പനി വ്യക്തമാക്കി. പുറത്ത് 5.4 ഇഞ്ചും ഉള്ളിൽ നിവർത്തുമ്പോൾ 7.6 ഇഞ്ചുമുള്ള റെറ്റിന എക്സ്ഡിആർ ഡിസ്പ്ലേയാണ് ഫോണിന്റെ പ്രധാന ആകർഷണം. 120 ഹെർട്സ് പ്രൊമോഷൻ റീഫ്രഷ് നിരക്കുള്ള ഈ സ്ക്രീനുകൾക്ക് 3000 നിറ്റ്സ് വരെ ഔട്ട്ഡോർ തെളിച്ചമുണ്ട്. ഉൾവശത്തെ ഫോൾഡിങ് സ്ക്രീനിലെ മടക്കുകൾ കുറയ്ക്കാനും വെളിച്ച പ്രതിഫലനം ഒഴിവാക്കാനുമായി നാനോ-ടെക്ചർ ഫിനിഷാണ് ഉപയോഗിച്ചിരിക്കുന്നത്.
നാല് സ്റ്റോറേജ് വകഭേദങ്ങളിലാണ് ഐഫോൺ ഡ്യുവോ വിപണിയിൽ എത്തുന്നത്. 512 ജിബി പതിപ്പിന് 9349 ദിർഹവും (₹241086) 1 ടിബി പതിപ്പിന് 11,049 ദിർഹവുമാണ് (₹284924) നിരക്ക്. ഏറ്റവും ഉയർന്ന 2 ടിബി പതിപ്പിന് 13,599 ദിർഹവുമാണ് (₹350682) വരുന്നത്. ഇതോടെ ആപ്പിൾ വിപണിയിലെത്തിച്ചതിൽ വെച്ച് ഏറ്റവും വിലയേറിയ ഉപഭോക്തൃ സ്മാർട്ട്ഫോണായി ഐഫോൺ ഡ്യുവോ മാറി. രണ്ട് വർഷത്തെ ആപ്പിൾ കെയർ പ്ലസ് സുരക്ഷ ആവശ്യമുള്ളവർ 1349 ദിർഹം (₹34787) അധികമായി നൽകുകയും വേണം. ഉയർന്ന വില കണക്കിലെടുത്ത് പഴയ ഫോണുകൾ മാറ്റി വാങ്ങാൻ എക്സ്ചേഞ്ച് ഓഫറുകളും പ്രഖ്യാപിച്ചിട്ടുണ്ട്. പഴയ മോഡലുകളുടെ പ്രവർത്തനക്ഷമത അനുസരിച്ച് 160 ദിർഹം മുതൽ 3260 ദിർഹം വരെ ട്രേഡ്-ഇൻ ബോണസ് ലഭിക്കും. പ്രമുഖ യുഎഇ ബാങ്കുകളുമായി സഹകരിച്ച് തവണ വ്യവസ്ഥിയിലുള്ള പേയ്മെന്റ് സൗകര്യങ്ങളും ആപ്പിൾ ഒരുക്കിയിട്ടുണ്ട്.
2 നാനോമീറ്റർ സാങ്കേതികവിദ്യയിൽ നിർമ്മിച്ച ഏറ്റവും പുതിയ എ20 പ്രോ പ്രോസസറാണ് ഫോണിലുള്ളത്. ഒപ്പം ആപ്പിൾ ഇന്റലിജൻസ് എഐ ഫീത്തറുകൾക്കായി പ്രത്യേക ന്യൂറൽ എൻജിനും ഒരുക്കിയിരുന്നു. ഒരൊറ്റ ചാർജിൽ പുറത്തെ സ്ക്രീൻ മാത്രം ഉപയോഗിച്ചാൽ 44 മണിക്കൂറും വലിയ സ്ക്രീൻ ഉപയോഗിച്ചാൽ 31 മണിക്കൂറും വീഡിയോ പ്ലേബാക്ക് ലഭിക്കുമെന്ന് ആപ്പിൾ സാക്ഷ്യപ്പെടുത്തുന്നു. ഗ്രേഡ് അഞ്ച് ടെെറ്റാനിയം ഫ്രെയിം, സെറാമിക് ഷീൽഡ് രണ്ട് സംരക്ഷണം, നൂറിലധികം സൂഷ്മ ഘടകങ്ങൾ ചേർത്തുവെച്ച കരുത്തുറ്റ ഹിഞ്ച് എന്നിവ ഐഫോൺ ഡ്യുവോ ഈടുറ്റതാക്കുന്നു. വെള്ളവും പൊടിയും പ്രതിരോധിക്കാൻ ഐപി68 റേറ്റിങ്ങുമുണ്ട്.
ക്യാമറ വിഭാഗത്തിൽ പിന്നിലായി രണ്ട് 48 മെഗാപിക്സൽ ഫ്യൂഷൻ സെൻസറുകളാണുള്ളത്. 2x ഒപ്റ്റിക്കൽ സൂം, സെക്കൻഡിൽ 120 ഫ്രെയിം ശേഷിയുള്ള 4K ഡോൾബി വിഷൻ വീഡിയോ റെക്കോർഡിങ് എന്നിവ ഇതിലുണ്ട്. ഫോൾഡിങ് സ്ക്രീനിന്റെ സുഗമമായ കാഴ്ചയെ തടസ്സപ്പെടുത്താത്ത വിധം ഡിസ്പ്ലേയ്ക്കുള്ളിൽ ഒളിപ്പിച്ച 12 മെഗാപിക്സൽ ക്യാമറയാണ് വീഡിയോ കോളുകൾക്കായി നൽകിയിട്ടുള്ളത്. ഐഒഎസ് 27 പ്ലാറ്റ്ഫോമിൽ പ്രവർത്തിക്കുന്ന ഫോണിൽ രണ്ട് ആപ്പുകൾ ഒരേസമയം സ്ക്രീനിൽ പ്രവർത്തിക്കാനുള്ള സ്പിലിറ്റ്-സ്ക്രീൻ മൾട്ടിടാസ്കിങ് സംവിധാനവും ആപ്പിൾ പെൻസിൽ പിന്തുണയുമുണ്ട്. ഫിസിക്കൽ സിം കാർഡ് സ്ലോട്ടുകൾ പൂർണ്ണമായി ഒഴിവാക്കി ഇ-സിം മാത്രമാണ് ഇതിൽ ഉള്ളത്. പവർ ബട്ടണിലാണ് ടച്ച് ഐഡി ഫിംഗർപ്രിന്റ് സ്കാനർ ഉൾപ്പെടുത്തിയിരിക്കുന്നത്. ദുബായ് മാൾ, മാൾ ഓഫ് ദി എമിറേറ്റ്സ്, യാസ് മാൾ എന്നിവിടങ്ങളിലെ ആപ്പിൾ ഔദ്യോഗിക സ്റ്റോറുകളിലും പ്രധാന റീട്ടെയിൽ ഔട്ട്ലെറ്റുകളിലും നിന്നും ഒക്ടോബർ 23 മുതൽ ഫോൺ നേരിട്ട് വാങ്ങാൻ സാധിക്കും.
Content Highlights: Apple’s first foldable iPhone, the iPhone Duo, is available for pre-order in the UAE from October 16, 2026, starting at AED 8,499, with retail availability scheduled for October 23.
