LIVE TV
ഗൾഫ് മേഖലയിലെ വ്യാപാര ബന്ധങ്ങൾ സാധാരണ നിലയിലേക്ക് മടങ്ങുന്നതിന്റെ സൂചനയായി ഇറാനും ഖത്തറും തമ്മിലുള്ള നാവിക വ്യാപാരം പുനരാരംഭിച്ചു. ഏതാണ്ട് അഞ്ച് മാസത്തെ വിലക്കിന് ശേഷമാണ് ഇരുരാജ്യങ്ങളും തമ്മിലുള്ള കപ്പൽ ഗതാഗതം വീണ്ടും തുടങ്ങിയത്. ദോഹയിലെ ഇറാൻ എംബസിയും ഖത്തർ അധികൃതരും തമ്മിൽ നടത്തിയ നിരന്തര ചർച്ചകൾക്കും ഏകോപനത്തിനും ഒടുവിലാണ് സർവീസുകൾ ആരംഭിച്ചത്.
ഇറാന്റെ 'ദയ്യർ' തുറമുഖവും ഖത്തറിന്റെ 'അൽ റുവൈസ്' തുറമുഖവും തമ്മിലുള്ള കപ്പൽ ഗതാഗതമാണ് ഇപ്പോൾ പുനരാരംഭിച്ചിരിക്കുന്നത്. ഗൾഫ് മേഖലയിലെ പ്രാദേശിക വ്യാപാരത്തിൽ നിർണ്ണായക പങ്കുവഹിക്കുന്ന തുറമുഖങ്ങളാണിവ. കഴിഞ്ഞ നാല് മാസത്തോളം നീണ്ടുനിന്ന പശ്ചിമേഷ്യൻ സംഘർഷത്തിനിടയിൽ ഇറാന്റെ ദയ്യർ തുറമുഖത്തിന് നേരെ പലതവണ ആക്രമണങ്ങൾ ഉണ്ടാവുകയും വലിയ നാശനഷ്ടങ്ങൾ സംഭവിക്കുകയും ചെയ്തിരുന്നു.
മേഖലയിലെ സംഘർഷങ്ങൾക്ക് അറുതി വരുത്തിക്കൊണ്ട് കഴിഞ്ഞ മാസം ഇറാനും അമേരിക്കയും തമ്മിൽ ഒപ്പുവെച്ച താൽക്കാലിക കരാറിന്റെ പശ്ചാത്തലത്തിലാണ് ഈ പുതിയ നീക്കം. ഗൾഫ് മേഖലയിലെ കപ്പൽ ഗതാഗതം യുദ്ധത്തിന് മുമ്പുള്ള അവസ്ഥയിലേക്ക് മാറ്റാൻ ഈ കരാർ വ്യവസ്ഥ ചെയ്യുന്നുണ്ട്. എങ്കിലും ഗൾഫിലേക്കുള്ള കപ്പലുകളുടെ വരവും പോക്കും ഇപ്പോഴും ചില തർക്കങ്ങൾക്കും വെല്ലുവിളികൾക്കും വിധേയമാണ്.
ഇറാനും മറ്റ് ഗൾഫ് രാജ്യങ്ങളും തമ്മിലുള്ള വാണിജ്യ ബന്ധം ക്രമേണ വീണ്ടെടുക്കുന്നതിന്റെ മറ്റ് സൂചനകളും പുറത്തുവരുന്നുണ്ട്. ഗൾഫ് മേഖലയിലെ ഏറ്റവും വലിയ തുറമുഖമായ യുഎഇയിലെ ജബൽ അലി പോർട്ട് വഴി ഇറാനിയൻ ഉത്പ്പന്നങ്ങൾ വീണ്ടും ക്ലിയറൻസ് നേടിത്തുടങ്ങിയതായി ഇറാന്റെ ട്രേഡ് പ്രൊമോഷൻ ഓർഗനൈസേഷൻ അടുത്തിടെ വ്യക്തമാക്കിയിരുന്നു. ഗൾഫിന്റെ ഇരുതീരങ്ങളും തമ്മിലുള്ള വ്യാപാര വിനിമയം പഴയ പടിയാകുന്നതിന്റെ വലിയ തെളിവായിട്ടാണ് വിപണി വിദഗ്ദ്ധർ ഇതിനെ കാണുന്നത്.
Content Highlights: Iran and Qatar have restarted maritime trade following a five-month hiatus. The resumption of shipping services is expected to boost bilateral trade, improve the movement of goods, and strengthen economic cooperation between the two countries.
