LIVE TV
ഒമാനിലെ റുസൈലിൽ കെട്ടിടത്തിൽ നിന്ന് വീണ് നാല് വയസ്സുകാരിയായ മലയാളി ബാലിക മരിച്ചു. തൃശൂർ പിലാക്കാട് സ്വദേശി പ്രദീപും ഭാര്യ ദിവ്യയും താമസിച്ചിരുന്ന റൂമിൽ നിന്ന് താഴേക്ക് വീണാണ് ഇവരുടെ ഏക മകളായ ദക്ഷ പ്രദീപ് മരിച്ചത്. തിങ്കളാഴ്ച രാവിലെ 11 മണിയോടെയായിരുന്നു ഈ ദാരുണ സംഭവം നടന്നത്.
ഇവർ താമസിച്ചിരുന്ന കെട്ടിടത്തിന് സമീപമുള്ള ഒരു സൂപ്പർമാർക്കറ്റിലെ ജീവനക്കാരനാണ് പ്രദീപ്. സംഭവ സമയത്ത് അമ്മ ദിവ്യ ഭർത്താവിന്റെ അടുത്തേക്ക് മാറിയ നേരത്താണ് കുട്ടി ജനൽ വഴി അബദ്ധത്തിൽ താഴേക്ക് വീണതെന്നാണ് പ്രാഥമിക വിവരം. അടുത്തിടെയാണ് ദിവ്യയും മകൾ ദക്ഷയും സന്ദർശന വിസയിൽ ഒമാനിൽ എത്തിയത്. സന്തോഷത്തോടെ ഒത്തുചേർന്ന കുടുംബത്തിന് മുന്നിലാണ് നിമിഷ നേരം കൊണ്ട് ഈ വൻ ദുരന്തം സംഭവിച്ചത്.
അപകടവിവരമറിഞ്ഞ് ഒമാൻ പൊലീസ് ഉടൻ തന്നെ സംഭവസ്ഥലത്തെത്തി തുടർനടപടികൾ പൂർത്തിയാക്കി മൃതദേഹം ആശുപത്രി മോർച്ചറിയിലേക്ക് മാറ്റി. മസ്കറ്റ് കെഎംസിസി റുസൈൽ ഏരിയ കെയർ വിങ് ഭാരവാഹികളുടെ നേതൃത്വത്തിൽ ഔദ്യോഗിക നിയമനടപടികൾ വേഗത്തിലാക്കാനും മൃതദേഹം എത്രയും പെട്ടെന്ന് നാട്ടിലേക്ക് കൊണ്ടുപോകാനുമുള്ള ശ്രമങ്ങൾ നടന്നുവരികയാണ്.
Content Highlights: A Malayali girl, who had recently travelled to Oman on a visit visa to join her father, lost her life after falling from a building. The incident has shocked the expatriate community, and authorities are investigating the circumstances surrounding the tragedy.
