LIVE TV
ഇന്ത്യൻ വാഹന വിപണിയിൽ വീണ്ടും ഉണർവ്. 2026 ഓഗസ്റ്റിൽ രാജ്യത്തെ വാഹന റീട്ടെയിൽ വിൽപ്പന 17.51 ശതമാനം ഉയർന്ന് 24.23 ലക്ഷം യൂണിറ്റിലെത്തി. ഫെഡറേഷൻ ഓഫ് ഓട്ടോമൊബൈൽ ഡീലേഴ്സ് അസോസിയേഷൻസിന്റെ (FADA) കണക്കുകൾ പ്രകാരം ഓഗസ്റ്റ് മാസത്തിലെ ഏറ്റവും ഉയർന്ന വാഹന റീട്ടെയിൽ വിൽപ്പനയാണിത്. അതേസമയം, പെട്രോൾ വാഹനങ്ങളെ മറികടന്ന് CNG, ഹൈബ്രിഡ്, ഇലക്ട്രിക് വാഹനങ്ങളുടെ സംയുക്ത വിഹിതം ഉയർന്നത് വിപണിയിലെ മാറുന്ന ഉപഭോക്തൃ താൽപര്യത്തിന്റെ ശക്തമായ സൂചനയായി.
കഴിഞ്ഞ വർഷം ഓഗസ്റ്റിൽ 20.62 ലക്ഷം യൂണിറ്റായിരുന്ന മൊത്തം വാഹന റീട്ടെയിൽ വിൽപ്പനയാണ് ഇത്തവണ 24.23 ലക്ഷമായി ഉയർന്നത്. എന്നാൽ ജൂലൈയിലെ 25.91 ലക്ഷം യൂണിറ്റുമായി താരതമ്യം ചെയ്യുമ്പോൾ ഓഗസ്റ്റിൽ വിൽപ്പന 6.48 ശതമാനം കുറഞ്ഞു. മൺസൂൺ കാലാവസ്ഥയും ഈ വർഷത്തെ ഉത്സവ കലണ്ടറിലുണ്ടായ വ്യത്യാസവുമാണ് മാസാന്തര ഇടിവിന് പ്രധാന കാരണങ്ങൾ.
ഇരുചക്ര വാഹനങ്ങളാണ് ഓഗസ്റ്റിലെ വളർച്ചയ്ക്ക് പ്രധാന പിന്തുണ നൽകിയത്. 17.14 ലക്ഷം ഇരുചക്ര വാഹനങ്ങൾ വിറ്റഴിച്ചതോടെ ഈ വിഭാഗം 19.69 ശതമാനം വളർച്ച രേഖപ്പെടുത്തി. പാസഞ്ചർ വാഹന വിൽപ്പന 16.14 ശതമാനം ഉയർന്ന് 4.02 ലക്ഷം യൂണിറ്റിലെത്തി. ഓഗസ്റ്റിൽ ആദ്യമായാണ് പാസഞ്ചർ വാഹന റീട്ടെയിൽ വിൽപ്പന നാല് ലക്ഷം കടക്കുന്നത്. കമർഷ്യൽ വാഹന വിൽപ്പന 14.45 ശതമാനം ഉയർന്ന് 90,769 യൂണിറ്റായപ്പോൾ, മൂന്നുചക്ര വാഹന വിൽപ്പന 8.64 ശതമാനം വർധിച്ച് 1.22 ലക്ഷം യൂണിറ്റിലെത്തി. ട്രാക്ടർ വിൽപ്പനയിൽ 0.84 ശതമാനം മാത്രമാണ് വളർച്ച.
ഇതിനിടെ ഇലക്ട്രിക് വാഹന വിപണി ശ്രദ്ധേയമായ മുന്നേറ്റമാണ് നടത്തിയത്. ഓഗസ്റ്റിൽ 2.98 ലക്ഷം ഇലക്ട്രിക് വാഹനങ്ങൾ റീട്ടെയിൽ ആയി വിറ്റു. കഴിഞ്ഞ വർഷത്തെ അപേക്ഷിച്ച് 52.9 ശതമാനമാണ് വളർച്ച. മൊത്തം വാഹന റീട്ടെയിൽ വിപണിയിലെ EV വിഹിതം 12.3 ശതമാനമായി ഉയർന്നു. കഴിഞ്ഞ വർഷം ഇത് 9.5 ശതമാനമായിരുന്നു.
പാസഞ്ചർ വാഹന വിപണിയിലാണ് മറ്റൊരു നിർണായക മാറ്റം പ്രകടമായത്. CNG, ഹൈബ്രിഡ്, ഇലക്ട്രിക് വാഹനങ്ങൾ ചേർന്ന് പാസഞ്ചർ വാഹന വിൽപ്പനയുടെ 41.95 ശതമാനം സ്വന്തമാക്കി. പെട്രോൾ വാഹനങ്ങളുടെ വിഹിതം 40.85 ശതമാനമായിരുന്നു. അതായത്, ആദ്യമായി ഈ മൂന്ന് വിഭാഗങ്ങളുടെയും സംയുക്ത വിഹിതം പെട്രോൾ വാഹനങ്ങളെ മറികടന്നു. CNG വാഹനങ്ങൾക്ക് 25.28 ശതമാനവും ഹൈബ്രിഡുകൾക്ക് 9.04 ശതമാനവും ഇലക്ട്രിക് വാഹനങ്ങൾക്ക് 7.63 ശതമാനവുമാണ് വിഹിതം.
ഗ്രാമീണ വിപണിയും വാഹന വിൽപ്പനയിലെ വളർച്ചയ്ക്ക് കരുത്തേകി. ഗ്രാമീണ മേഖലയിൽ വാഹന റീട്ടെയിൽ വിൽപ്പന 19.79 ശതമാനം ഉയർന്നപ്പോൾ നഗര മേഖലയിൽ വളർച്ച 15.17 ശതമാനമായിരുന്നു. പാസഞ്ചർ വാഹനങ്ങളിൽ ഗ്രാമീണ വളർച്ച 24.99 ശതമാനത്തിലെത്തിയത് പ്രത്യേകിച്ചും ശ്രദ്ധേയമാണ്. നഗര വിപണിയിലെ വളർച്ച 10.93 ശതമാനം മാത്രമായിരുന്നു.
എന്നാൽ ഓഗസ്റ്റിലെ 17.5 ശതമാനം വളർച്ചയെ മാത്രം അടിസ്ഥാനമാക്കി വാഹന വിപണി അതിവേഗം മുന്നേറുകയാണെന്ന് വിലയിരുത്താനാകില്ലെന്ന് FADA മുന്നറിയിപ്പ് നൽകുന്നു. കഴിഞ്ഞ വർഷം GST നിരക്കുകളുമായി ബന്ധപ്പെട്ട പ്രതീക്ഷകളെ തുടർന്ന് നിരവധി ഉപഭോക്താക്കൾ വാഹന വാങ്ങൽ മാറ്റിവെച്ചിരുന്നു. അതിനാൽ ഇത്തവണത്തെ കണക്കിൽ കഴിഞ്ഞ വർഷത്തെ കുറഞ്ഞ വിൽപ്പനയുടെ അടിസ്ഥാനപ്രഭാവവും (low-base effect) കാര്യമായി പ്രതിഫലിക്കുന്നുണ്ട്. യഥാർത്ഥ വിപണി വളർച്ച എത്രത്തോളം ശക്തമാണെന്ന് വരാനിരിക്കുന്ന ഉത്സവ സീസണിലെ വിൽപ്പന കണക്കുകൾ വ്യക്തമാക്കുമെന്നാണ് FADAയുടെ വിലയിരുത്തൽ.
Content Haighlights: India’s Auto Retail Sales Surge 17.5% in August to Record 24.23 Lakh Units; CNG, Hybrid and EVs Overtake Petrol in Passenger Vehicle Market
