LIVE TV
ഒരു പുതിയ കാര് വാങ്ങുമ്പോള് ആളുകള് ആദ്യം പരിഗണിക്കുന്നത് അതിന്റെ ഡിസൈന്, നിറം, മറ്റ് സവിശേഷതകള് എന്നിവയാണ്. ചിലര്ക്ക് വെളള നിറമാണ് ഇഷ്ടം. ചിലര് കറുപ്പും ചുവപ്പും നീലയും ഒക്കെ സെലക്ട് ചെയ്യാറുണ്ട്. ഈ നിറങ്ങളില് വച്ച് കറുപ്പ് ഒരു പ്രീമിയം നിറമായി കണക്കാക്കപ്പെടുന്നു. ചില പഠനങ്ങള് കാണിക്കുന്നത് കാറിന്റെ നിറങ്ങളും വാഹന അപകടവും തമ്മില് ബന്ധമുണ്ടെന്നാണ്.
മറ്റ് നിറങ്ങളിലുള്ള കാറുകളെ അപേക്ഷിച്ച് കറുത്ത കാറുകളാണ് അപകടങ്ങളില് പെടാനുള്ള സാധ്യത കൂടുതലെന്നാണ് പറയപ്പെടുന്നത്. ഇത് കാറിന്റെ എന്തെങ്കിലും കുറവോ ഡ്രൈവറുടെ പിഴവോ അല്ല. മറിച്ച് കാറിന്റെ നിറവും അതുമായി ബന്ധപ്പെട്ട ദൃശ്യപരതയും മൂലമാണ്.
റോഡ് സുരക്ഷയില് കാറിന്റെ നിറവും ഒരു പ്രധാന പങ്ക് വഹിക്കുന്നു. ദശലക്ഷക്കണക്കിന് റോഡ് അപകടങ്ങളെ ഉള്പ്പെടുത്തി നടത്തിയ ഒരു ഓസ്ട്രേലിയന് പഠനം വെളിപ്പെടുത്തുന്നത് വെളുത്ത കാറുകളേക്കാള് കറുത്ത കാറുകള് കാഴ്ചയില് ദൃശ്യമാകുന്നത് കുറവാണെന്നും ഇത് അപകട സാധ്യത വര്ദ്ധിപ്പിക്കുന്നുവെന്നുമാണ്. പ്രത്യേകിച്ച് അതിരാവിലെയും രാത്രിയും അല്ലെങ്കില് മോശം കാലാവസ്ഥയിലും കറുത്ത കാറുകള് ദൂരെ നിന്ന് കാണാന് പ്രയാസമാണ്.
ഇതിനു പിന്നിലെ പ്രധാന കാരണം വെളിച്ചമാണ്. കറുപ്പ് നിറം പ്രകാശത്തെ പ്രതിഫലിപ്പിക്കുന്നതിനു പകരം ആഗിരണം ചെയ്യുന്നു. അതുകൊണ്ടാണ് ഇരുണ്ടതോ മങ്ങിയതോ ആയ അന്തരീക്ഷത്തില്, കറുത്ത കാറുകള് അവയുടെ ചുറ്റുപാടുകളുമായി ഇഴുകിച്ചേരുന്നത്. മറുവശത്ത് വെള്ള, മഞ്ഞ അല്ലെങ്കില് ഇളം നിറങ്ങളിലുള്ള കാറുകള് കൂടുതല് പ്രകാശത്തെ പ്രതിഫലിപ്പിക്കുന്നതിനാല് അവ ദൂരെ നിന്ന് എളുപ്പത്തില് ദൃശ്യമാകും.
രാത്രിയിലാണ് ഈ പ്രശ്നം കൂടുതല് രൂക്ഷമാകുന്നത്. റോഡില് വെളിച്ചക്കുറവുണ്ടെങ്കില് ഇരുണ്ട കാര് കണ്ടെത്താന് മറ്റ് ഡ്രൈവര്മാര്ക്ക് കൂടുതല് സമയമെടുത്തേക്കാം. ചിലപ്പോള്, ഒന്നോ രണ്ടോ സെക്കന്ഡ് പോലും അപകടം ഒഴിവാക്കുന്നതില് നിര്ണായകമാകും. ഒരു വാഹനം കണ്ണില്പെടാതെ വരുമ്പോള് ഡ്രൈവര്ക്ക് ബ്രേക്ക് ചെയ്യാനോ ദിശ മാറ്റാനോ ഉള്ള സമയം കുറയുന്നു. ഇത് അപകട സാധ്യത വര്ദ്ധിപ്പിക്കുന്നു.
കറുപ്പ് മാത്രമല്ല ചാരനിറത്തിലുള്ളതും വെള്ളിനിറത്തിലുള്ളതുമായ കാറുകളും കൂടുതല് അപകടസാധ്യതയുള്ളതായി കണക്കാക്കപ്പെടുന്നു. കാരണം ഈ നിറങ്ങള് പലപ്പോഴും റോഡിന്റെയും മൂടല്മഞ്ഞിന്റെയും മേഘങ്ങളുടെയും നിറങ്ങളുമായി ഇഴചേര്ന്നുപോകുന്നു. വെള്ള, മഞ്ഞ, ഓറഞ്ച്, സ്വര്ണ്ണം തുടങ്ങിയ നിറങ്ങള് മിക്കവാറും എല്ലാ കാലാവസ്ഥയിലും വെളിച്ചത്തിലും വ്യക്തമായി ദൃശ്യമാകുന്നതിനാല് അവ കൂടുതല് സുരക്ഷിതമാണെന്ന് കണക്കാക്കപ്പെടുന്നു. അതുകൊണ്ടാണ് സ്കൂള് ബസുകളിലും നിര്മ്മാണ വാഹനങ്ങളിലും നിരവധി അടിയന്തര സേവനങ്ങളിലും തിളക്കമുള്ള നിറങ്ങള് ഉപയോഗിക്കുന്നത്.
Content Highlights : Are black cars more likely to have accidents? Why?
