LIVE TV
സിബി മലയില്-ലോഹിതദാസ് കൂട്ടുകെട്ടില് മോഹന്ലാല് നായകനായ, മലയാളത്തിലെ ക്ലാസിക് സിനിമകളിലൊന്നായ കിരീടം ഇപ്പോള് റീറിലീസിനൊരുങ്ങുകയാണ്. 1989ല് തിയേറ്ററുകളിലെത്തിയ ചിത്രം ഡോള്ബി അറ്റ്മോസില് 4കെ ദൃശ്യഭംഗിയില് റീറിലീസിന് തയ്യാറാവുകയാണ്. സിനിമയുടെ ട്രെയ്ലർ പുറത്തുവന്നു.
ചിത്രം ജൂലൈയിൽ പുറത്തിറങ്ങും. കൃപാ ഫിലിംസിന്റെ ബാനറില് എന്. കൃഷ്ണകുമാറും (കിരീടം ഉണ്ണി) ദിനേശ് പണിക്കരും ചേര്ന്നാണ് കിരീടം നിര്മിച്ചത്. മോഹന്ലാല് എന്ന നടനെ അതുവരെ കാണാത്ത തലത്തിലേക്ക് ഉയര്ത്തിയ സിനിമ, കിരീടം എന്ന് കേള്ക്കുമ്പോള് സേതുമാധവനെ ആദ്യവും ലാലിനെ പിന്നീടും ഓര്ക്കുന്ന തലത്തിലേക്ക് ഉയര്ത്തപ്പെട്ട സിനിമ. മനുഷ്യരിലെ നിസഹായതയെ ആഴത്തില് പ്രതിഫലിപ്പിക്കാനറിയുന്ന, ലോഹിതദാസ് എന്ന മനുഷ്യമനസിന്റെ ഉള്പ്പെരുപ്പറിയുന്ന മാസ്റ്റര് സ്റ്റോറി ടെല്ലറുടെ, സിബി മലയില് എന്ന മാസ്റ്റര് ക്രാഫ്റ്റ്മാന്റെ, ജോണ്സണ് എന്ന സംഗീത മാന്ത്രികന്റെ സിനിമ.
സേതുമാധവനും അച്യുതന് നായരുമായി മോഹന്ലാല്- തിലകന് ഓണ്സ്ക്രീന് രസതന്ത്രം സൃഷ്ടിച്ച മനോഹര ഭാവമുഹൂര്ത്തങ്ങളിലൂടെ പ്രേക്ഷക മനസില് ഇന്നും നൊമ്പരമായി മാറിയ സിനിമ. ഒരു കുടുംബത്തിന്റെ സ്വപ്നങ്ങളാകെ തകര്ത്ത്, ഒരു ചെറുപ്പക്കാരനെ കുറ്റവാളിയും ഗുണ്ടയുമാക്കി അയാളുടെ ശിരസില് ഉറച്ചുപോയ മുള്ക്കിരീടം ആണ് ലോഹിതദാസ് സിബി മലയില് കൂട്ടുകെട്ടിലൂടെ കിരീടം എന്ന മികച്ച ക്ലാസിക്കായി മാറിയത്.
അത്രയേറെ പ്രാധാന്യമുള്ള ഗാനങ്ങളും അതിനൊത്ത ദൃശ്യഭംഗിയും ചേര്ന്ന മലയാളത്തിന്റെ എക്കാലത്തെയും ക്ലാസിക് വീണ്ടും സ്ക്രീനില് എത്തുമ്പോള് അകാലത്തില് പൊലിഞ്ഞ തിലകന്, മാമുക്കോയ, ഒടുവില് ഉണ്ണികൃഷ്ണന്, മുരളി, കൊച്ചിന് ഹനീഫ, തിക്കുറിശ്ശി, കവിയൂര് പൊന്നമ്മ, ഫിലോമിന, ശ്രീനാഥ്, മോഹന്രാജ് (കീരിക്കാടന് ജോസ്), കുണ്ടറ ജോണി, കനകലത തുടങ്ങിയവരെ ഒന്നുകൂടി കാണാന് സാധിക്കുന്നതിലെ സന്തോഷവും, ഒപ്പം മനസില് ഒരുനോവും പ്രേക്ഷകന് സമ്മാനിക്കും എന്ന് ഉറപ്പാണ്. ജഗതി ശ്രീകുമാര്, ജഗദീഷ്, പാര്വതി, മണിയന്പിള്ള രാജു, ഉഷ, യദു കൃഷ്ണന്, കൊല്ലം തുളസി, പൂജപ്പുര രാധാകൃഷ്ണന് തുടങ്ങിയവരുടെ മികച്ച പ്രകടനം കാഴ്ചവച്ച സിനിമയുടെ ഛായാഗ്രാഹണം നിര്വഹിച്ചത് എസ്. കുമാറാണ്. ഹൈസിന് ഗ്ലോബല് വെഞ്ചേഴ്സ് ആണ് ഇന്ത്യയില് ചിത്രം വിതരണത്തിന് എത്തിക്കുന്നത്.
Content Highlights: The trailer for the re-release of Kireedam has been unveiled, sparking excitement among Mohanlal fans. The classic Malayalam film is set to return to theaters amid expectations of new re-release box office records.
