LIVE TV
ശ്രീനഗർ: ഇന്ത്യൻ പതാകയുടെ നിറമുള്ള റിബ്ബൺ മുറിച്ച് ഉദ്ഘാടനം ചെയ്യാൻ വിസമ്മതിച്ച് ജമ്മു കശ്മീർ മുഖ്യമന്ത്രി ഒമർ അബ്ദുള്ള. ശ്രീനഗറിലെ കാശ്മീർ ഹാത്തിൽ രണ്ട് ദിവസം നീണ്ടുനിൽക്കുന്ന കൈത്തറി കരകൗശല പ്രദർശന മേള ഉദ്ഘാടനത്തിനെത്തിയതായിരുന്നു ഒമർ അബ്ദുള്ള.
ഉദ്ഘാടനത്തിനെത്തിയപ്പോഴാണ് സംഘാടകർ തയ്യാറാക്കിവെച്ചിരിക്കുന്ന റിബ്ബണിന് ഇന്ത്യൻ പതാകയുടെ നിറമാണെന്ന കാര്യം ഒമർ അബ്ദുള്ളയുടെ ശ്രദ്ധയിൽ പെടുന്നത്. ഉടൻ തന്നെ ആ റിബ്ബൺ മുറിക്കാൻ സാധിക്കില്ലെന്ന് അദ്ദേഹം പറഞ്ഞു. തുടർന്ന് ഇരു ഭാഗത്ത് നിന്നും റിബ്ബൺ അഴിച്ചെടുത്ത് മാറ്റിയ ശേഷം അദ്ദേഹം അകത്തേക്ക് പ്രവേശിക്കുകയായിരുന്നു. സംഭവത്തിന്റെ ദൃശ്യങ്ങൾ സാമൂഹിക മാധ്യമങ്ങളിൽ പ്രചരിക്കുന്നുണ്ട്.
റിബ്ബൺ മുറിച്ചില്ലെങ്കിലും കശ്മീർ ഹാത്തിലെ മറ്റു പരിപാടികളൊക്കെ നിശ്ചയിച്ച പ്രകാരം നടന്നു. സംഭവത്തിൻ്റെ വീഡിയോ പ്രചരിച്ചതോടെ നിരവധി പേരാണ് ഒമർ അബ്ദുള്ളയുടെ നടപടിയെ പ്രശംസിച്ചു കൊണ്ട് രംഗത്തെത്തുന്നത്. മൂവർണ്ണക്കൊടിയുടെ നിറത്തിലുള്ള പതാക ഉദ്ഘാടനത്തിനായി എത്തിച്ചതിനേയും ചിലർ വിമർശിക്കുന്നുണ്ട്.
Content Highlights: Jammu and Kashmir Chief Minister Omar Abdullah refuses to inaugurate by cutting the ribbon in the colours of the Indian flag
