Get the latest news at
your fingertips!
Download our app now
LIVE TV
Search
ബെംഗളൂരു: കർണാടക മുഖ്യമന്ത്രി സിദ്ധരാമയ്യയും ഉപമുഖ്യമന്ത്രി ഡി കെ ശിവകുമാറും തമ്മിൽ നടന്ന പ്രഭാതഭക്ഷണ കൂടിക്കാഴ്ച അവസാനിച്ചു. കൂടിക്കാഴ്ചയ്ക്ക് ശേഷം ഇരുനേതാക്കളും ഐക്യത്തിൻ്റെ സന്ദേശമാണ് നൽകിയത്. 'ഐക്യം തുടരും. ഞങ്ങൾ ഒരുമിച്ച് ഐക്യത്തോടെ മുന്നോട്ട് പോകും. ഞങ്ങൾക്കിടയിൽ എന്തെങ്കിലും തരത്തിലുള്ള ഭിന്നതയില്ല എന്നായിരുന്നു' പ്രഭാതഭക്ഷണ കൂടിക്കാഴ്ചയ്ക്ക് ശേഷം ഇരുനേതാക്കളുടെയും പ്രതികരണം.
ഹൈക്കാമാൻഡിൻ്റെ നിർദ്ദേശം അനുസരിക്കുമെന്നാണ് കൂടിക്കാഴ്ചയ്ക്ക് ശേഷം കർണാടക മുഖ്യമന്ത്രി സിദ്ധരാമയ്യ വ്യക്തമാക്കി. ഡി കെ ശിവകുമാറുമായി ഒരു അഭിപ്രായ ഭിന്നതയുമില്ലെന്നും ആശയക്കുഴപ്പം സൃഷ്ടിക്കുന്നത് മാധ്യമങ്ങളാണെന്നും സിദ്ധരാമയ്യ പറഞ്ഞു. തെറ്റായ ആരോപണങ്ങൾ സൃഷ്ടിക്കുകയാണെന്നും സിദ്ധരാമയ്യ കുറ്റപ്പെടുത്തി. 2028ലെ നിയമസഭാ തെരഞ്ഞെടുപ്പിൻ്റെ തന്ത്രങ്ങൾ തങ്ങൾ സംസാരിച്ചുവെന്നും സിദ്ധരാമയ്യ വ്യക്തമാക്കി. 'രണ്ട് ദിവസം മുമ്പ് കെ സി വേണുഗോപാൽ വിളിച്ചെന്നും ഡി കെ ശിവകുമാറിനെ പ്രഭാതഭക്ഷണത്തിന് വിളിക്കണമെന്ന് നിർദ്ദേശിച്ചെന്നും സിദ്ധരാമയ്യ വെളിപ്പെടുത്തി. വേണുഗോപാൽ ഡി കെയോടും ഇത് പറഞ്ഞു. ഡി കെ അദ്ദേഹത്തിൻ്റെ വീട്ടിലേയ്ക്ക് എന്നെയും ക്ഷണിച്ചും. എന്തായാലും എൻ്റെ വീട്ടിൽ തന്നെ പ്രഭാതഭക്ഷണ യോഗം ചേരാൻ തീരുമാനിക്കുകയായിരുന്നു' എന്നും സിദ്ധരാമയ്യ വ്യക്തമാക്കി.
ഇതിനിടെ മഞ്ഞുരുക്കത്തിൻ്റെ സൂചന നൽകുന്നതായിരുന്നു ഡി കെ ശിവകുമാറിൻ്റെ പ്രതികരണം. നേതൃവിഷയംഹൈക്കമാൻഡ് തീരുമാനിക്കുമെന്ന് ഡി കെ ശിവകുമാർ വ്യക്തമാക്കി. ദേശീയ നേതൃത്വം എന്ത് പറയുന്നോ അത് തങ്ങൾ അനുസരിക്കും. ഇവിടെ ഗ്രൂപ്പില്ല. ഞങ്ങൾ യോജിച്ചാണ് പ്രവ‍ർത്തിക്കുന്നത്. എന്താണോ മുഖ്യമന്ത്രി പറയുന്നത്, ഞാൻ അതിനൊപ്പമാണ് ഞങ്ങൾ ഒരുമിച്ച് പ്രവർത്തിക്കുമെന്നും കർണാടക ഉപമുഖ്യമന്ത്രി കൂട്ടിച്ചേ‍ർത്തു. 'ഞങ്ങൾ പാ‍ർട്ടിയുടെ യഥാർത്ഥ യോദ്ധാക്കളാണ്. പാർട്ടി രാജ്യത്ത് ബുദ്ധിമുട്ടേറിയ ഘട്ടത്തിലൂടെ കടന്ന് പോയ്ക്കൊണ്ടിരിക്കുകയാണ്. പക്ഷെ കർണാടകയിൽ ഞങ്ങൾ ആത്മവിശ്വാസത്തിലാണ്. 2028ൽ ഞങ്ങൾ വിജയം ആവ‍‍ർത്തിക്കും രാഹുൽ ഗാന്ധിയുടെയും മല്ലികാ‍ർജ്ജുൻ ഖർഗെയുടെയും നേതൃത്വത്തിൽ മുന്നോട്ട് പോകും. സംസ്ഥാനത്തെ മുഴുവൻ ജനങ്ങളും ഞങ്ങളെ പിന്തുണയ്ക്കുകയും അനുഗ്രഹിക്കുകയും വലിയ ഭൂരിപക്ഷം നൽകുകയും ചെയ്യും. എന്തെല്ലാം വാഗ്ദാനങ്ങൾ നൽകിയോ അത് പൂർത്തീകരിക്കുക എന്നത് ഞങ്ങളുടെ കടമയാണ്. ഞങ്ങൾ ഇപ്പോൾ നന്നായി ഭരിക്കുന്നുണ്ട്, അത് തുടരുക തന്നെ ചെയ്യും. വരാനിരിക്കുന്ന നിയമസഭാ സമ്മേളനത്തെക്കുറിച്ചും പ്രതിപക്ഷത്തെ എങ്ങനെ നേരിടണമെന്നതിനെക്കുറിച്ചും ഞങ്ങൾ സംസാരിച്ചു' എന്നായിരുന്നു ഡി കെ ശിവകുമാറിൻ്റെ പ്രതികരണം.
സംസ്ഥാനത്ത് ഉരുതിരിഞ്ഞ് വരുന്ന രാഷ്ട്രീയ സാഹചര്യങ്ങളുടെ അടിസ്ഥാനത്തിൽ ഇരുനേതാക്കളും ഹൈക്കമാൻഡുമായി പിന്നീട് കൂടിക്കാഴ്ച നടത്തുമെന്നാണ് കർണാടകയിൽ നിന്നുള്ള റിപ്പോർട്ടുകൾ.
നേരത്തെ കൂടിക്കാഴ്ച കഴിഞ്ഞതിന് പിന്നാലെ സിദ്ധരാമയ്യയുമായുള്ള സംഭാഷണം ഗുണപരരമായിരുന്നുവെന്ന് ഡി കെ ശിവകുമാർ ട്വീറ്റ് ചെയ്തിരുന്നു. മുഖ്യമന്ത്രി സിദ്ധരാമയ്യയെ ഔദ്യോഗിക വസതിയായ കാവേരിയിലെത്തി കണ്ടു. കർണാടകയുടെ മുൻഗണനകളും മുന്നോട്ടുള്ള വഴികളും സംബന്ധിച്ച് ഗുണപരമായ ഒരു ച‍ർച്ച നടന്നു എന്നായിരുന്നു എക്സിൽ കുറിച്ചത്. രാവിലെ ചെറിയൊരു സംഭാഷണത്തോടെ ഉപമുഖ്യമന്ത്രി ഡി കെ ശിവകുമാറിനൊപ്പം പ്രഭാതഭക്ഷണം കഴിച്ചു എന്ന് സിദ്ധരാമയ്യ ട്വീറ്റ് ചെയ്തിരുന്നു.
ഒരു വർഷം കൂടി മുഖ്യമന്ത്രിയായി തുടരാനും 2027ൽ സ്ഥാനം ഒഴിയാനുമുള്ള ഫോർമുല ഡി കെ ശിവകുമാറിന് മുന്നിൽ സിദ്ധരാമയ്യ അവതരിപ്പിക്കുമെന്ന് നേരത്തെ റിപ്പോർട്ടുകളുണ്ടായിരുന്നു. മുഖ്യമന്ത്രി പദവിയിൽ എട്ട് വർഷമെന്ന റെക്കോർഡ് പൂർത്തീകരിക്കാൻ അനുവദിക്കണമെന്നും സിദ്ധരാമയ്യ ഡി കെ ശിവകുമാറിനോട് ആവശ്യപ്പെടുമെന്നായിരുന്നു റിപ്പോർട്ട്. 2028ൽ നടക്കുന്ന നിയമസഭാ തെരഞ്ഞെടുപ്പിൽ ഡി കെ ശിവകുമാറിനെ മുഖ്യമന്ത്രി സ്ഥാനാർത്ഥിയായി ഉയർത്തിക്കാണിക്കാമെന്നും ഡി കെ ശിവകുമാറിന് ഇപ്പോഴുണ്ടായിരിക്കുന്ന അസംതൃപ്തി പരിഹരിക്കാൻ ഡി കെ പക്ഷത്തെ കൂടുതൽ എംഎൽഎമാർക്ക് മന്ത്രിസ്ഥാനം നൽകാനും സിദ്ധരാമയ്യ തയ്യാറാകുമെന്നും റിപ്പോർട്ടുകളുണ്ടായിരുന്നു.
ഹൈക്കമാൻഡിൻ്റെ നിർ‌ദ്ദേശാനുസരണം ഇന്ന് രാവിലെ സിദ്ധരാമയ്യയും ഡി കെ ശിവകുമാറും പ്രഭാതഭക്ഷണ യോഗത്തിൽ കൂടിക്കാഴ്ച നടത്തിയത്. മുഖ്യമന്ത്രി സ്ഥാനവുമായി ബന്ധപ്പെട്ട് ഉണ്ടായിരിക്കുന്ന ത‍ർക്കങ്ങൾ പരിഹരിക്കാനാണ് ഇരുവരും തമ്മിലുള്ള കൂടിക്കാഴ്ചയ്ക്ക് ഹൈക്കമാൻഡ് മുൻകൈ എടുത്തത്. 2023ൽ കോൺഗ്രസ് അധികാരത്തിൽ വന്നതിന് പിന്നാലെ ആദ്യ രണ്ടര വർഷം സിദ്ധരാമയ്യയുടെ പിന്നീട് ഡി കെ ശിവകുമാറും മുഖ്യമന്ത്രിമാരാകുമെന്ന് കരാറുണ്ടായിരുന്നു എന്നാണ് ഡി കെ ശിവകുമാറിൻ്റെ നിലപാട്. എന്നാൽ അങ്ങനെയൊരു കരാറില്ല, അഞ്ച് വർഷവും ഭരിക്കുമെന്ന നിലപാടിലാണ് സിദ്ധരാമയ്യ. ഇതിനിടെ മുഖ്യമന്ത്രി പദവിയിൽ മൂന്ന് വർഷം പൂർത്തിയാക്കാൻ അനുവദിക്കണമെന്ന നിലപാടിലാണ് മുഖ്യമന്ത്രി സ്ഥാനം ഇപ്പോൾ ഒഴിയാൻ സിദ്ധരാമയ്യ വിമുഖത കാണിക്കുന്നതെന്നും റിപ്പോർട്ടുകളുണ്ടായിരുന്നു.
Content Highlights: D K Shivakumar and Siddaramaiah discussed and settled the issues at breakfast met
