LIVE TV
പെട്ടെന്ന് ഒരു നിമിഷത്തേക്ക് കൈകാലുകള്‍ക്ക് തളര്‍ച്ച തോന്നുക, കാഴ്ച മങ്ങുക, സംസാരിക്കാന്‍ പ്രയാസം തുടങ്ങിയ ലക്ഷണങ്ങള്‍ അനുഭവപ്പെടുക. എന്നാല്‍ ഏതാനും നിമിഷങ്ങള്‍ക്കുള്ളില്‍ ഈ പ്രയാസങ്ങളെല്ലാം സ്വയം മാറി സാധാരണ നിലയിലാവുന്ന അവസ്ഥ. പലരും നിസ്സാരമായ ക്ഷീണമോ അസ്വസ്ഥതയോ ആയി കരുതി തള്ളിക്കളയാറുണ്ട്. എന്നാല്‍ ഇത് വളരെ ഗൗരവത്തോടെ കാണേണ്ട ഒന്നാണ്. ട്രാന്‍സിയന്റ് ഇസ്‌കെമിക് അറ്റാക്ക് (ടി.ഐ.എ) അഥവാ മിനി സ്ട്രോക്ക് എന്നാണ് ഈ അവസ്ഥയെ വൈദ്യശാസ്ത്രത്തില്‍ വിശേഷിപ്പിക്കുന്നത്.
മസ്തിഷ്‌കത്തിലേക്ക് വരാനിരിക്കുന്ന വലിയൊരു ആഘാതത്തിന്റെ അവസാന നിമിഷത്തെ മുന്നറിയിപ്പാണ് ട്രാന്‍സിയന്റ് ഇസ്‌കെമിക് അറ്റാക്കുകള്‍. ഇതിനെ കൃത്യസമയത്ത് തിരിച്ചറിഞ്ഞ് ചികിത്സ തേടിയാല്‍ ഭാവിയിലുണ്ടാകാവുന്ന വലിയ മസ്തിഷ്‌കാഘാതങ്ങളെയും ജീവഹാനിയെയും പൂര്‍ണ്ണമായി തടയാന്‍ സാധിക്കുന്നതാണ്.
തലച്ചോറിലെ ഏതെങ്കിലും ഒരു ഭാഗത്തേക്കുള്ള രക്തയോട്ടം താല്‍ക്കാലികമായി തടസ്സപ്പെടുമ്പോഴാണ് ട്രാന്‍സിയന്റ് ഇസ്‌കെമിക് അറ്റാക്കുകള്‍ ഉണ്ടാകുന്നത്. തലച്ചോറിലെ രക്തധമനികളില്‍ ചെറിയ രക്തക്കട്ടകള്‍ അടിയുന്നതോ ധമനികള്‍ ഇടുങ്ങുന്നതോ ആണ് ഇതിന് പ്രധാന കാരണം. സാധാരണയായി ഇതിന്റെ ലക്ഷണങ്ങള്‍ ഏതാനും മിനിറ്റുകള്‍ മുതല്‍ ഒരു മണിക്കൂര്‍ വരെ നീണ്ടുനില്‍ക്കുന്നതാണ്. 24 മണിക്കൂറിനുള്ളില്‍ പൂര്‍ണ്ണമായും ഇവ അപ്രത്യക്ഷമാകുകയും ചെയ്യും. തലച്ചോറിന്റെ കോശങ്ങള്‍ക്ക് സ്ഥിരമായ കേടുപാടുകള്‍ സംഭവിക്കുന്നതിന് മുന്‍പ് രക്തയോട്ടം സ്വയം പുനഃസ്ഥാപിക്കപ്പെടുമ്പോഴാണ് ഈ ലക്ഷണങ്ങള്‍ അപ്രത്യക്ഷമാകുന്നത്.
ട്രാന്‍സിയന്റ് ഇസ്‌കെമിക് അറ്റാക്കും (ടി.ഐ.എ) സ്‌ട്രോക്കും തമ്മില്‍ പ്രധാനമായും വ്യത്യാസം എന്തെന്നാല്‍ അവ ഉണ്ടാകുമ്പോഴുള്ള ആഘാതത്തിലും സ്വഭാവത്തിലുമാണ്. ട്രാന്‍സിയന്റ് ഇസ്‌കെമിക് അറ്റാക്ക് തലച്ചോറിലേക്കുള്ള രക്തയോട്ടത്തിലെ തടസ്സം കേവലം താല്‍ക്കാലികം മാത്രമാണെങ്കില്‍, സ്‌ട്രോക്കില്‍ രക്തധമനി പൂര്‍ണ്ണമായി അടയുകയോ പൊട്ടുകയോ ചെയ്യുന്നു. ഇതിന്റെ ഫലമായി സ്ട്രോക്ക് തലച്ചോറിലെ കോശങ്ങളെ എന്നെന്നേക്കുമായി നശിപ്പിക്കുകയും ശരീരഭാഗങ്ങള്‍ക്ക് സ്ഥിരമായ തളര്‍ച്ച (തളര്‍വാതം) ഉണ്ടാക്കുകയും ചെയ്യുന്നു. എന്നാല്‍ ട്രാന്‍സിയന്റ് ഇസ്‌കെമിക് അറ്റാക്ക് തലച്ചോറിന് സ്ഥിരമായ കേടുപാടുകള്‍ ഉണ്ടാക്കുന്നില്ല. അതിനാല്‍ ട്രാന്‍സിയന്റ് ഇസ്‌കെമിക് അറ്റാക്കിനെ ഒരു രോഗമായി കാണുന്നതിനേക്കാള്‍ ഭാവിയിലുണ്ടാകാവുന്ന വലിയൊരു മസ്തിഷ്‌കാഘാതത്തിന്റെ പ്രാരംഭ മുന്നറിയിപ്പ് സൂചനയായി തിരിച്ചറിഞ്ഞ് അടിയന്തര ചികിത്സ തേടുകയാണ് വേണ്ടത്.
ട്രാന്‍സിയന്റ് ഇസ്‌കെമിക് അറ്റാക്കിന്റെ ലക്ഷണങ്ങള്‍ സാധാരണയായി ഒരു വ്യക്തിയില്‍ പെട്ടെന്നാണ് അനുഭവപ്പെടുക. ഇവ എളുപ്പത്തില്‍ തിരിച്ചറിയാന്‍ എഫ്.എ.എസ്.ടി (FAST) എന്ന സൂത്രവാക്യം ഓര്‍മ്മയില്‍ സൂക്ഷിക്കാം:
Face (മുഖം): ചിരിക്കാന്‍ ശ്രമിക്കുമ്പോള്‍ മുഖത്തിന്റെ ഒരു വശം കോടിപ്പോവുകയോ തളരുകയോ ചെയ്യുക.
A - Arms (കൈകള്‍): രണ്ട് കൈകളും ഉയര്‍ത്താന്‍ ശ്രമിക്കുമ്പോള്‍ ഒരു കൈ തളര്‍ന്ന് താഴേക്ക് പതിക്കുക അല്ലെങ്കില്‍ കൈയില്‍ ശക്തിയില്ലാത്തതുപോലെ തോന്നുക.
S - Speech (സംസാരശേഷി): സംസാരിക്കുമ്പോള്‍ വാക്കുകള്‍ കുഴഞ്ഞുപോവുക, ഉദ്ദേശിക്കുന്ന കാര്യം വ്യക്തമായി പറയാന്‍ സാധിക്കാതിരിക്കുക അല്ലെങ്കില്‍ മറ്റുള്ളവര്‍ പറയുന്നത് മനസ്സിലാക്കാന്‍ പ്രയാസം നേരിടുക.
T - Time (സമയം): മേല്‍പ്പറഞ്ഞ ലക്ഷണങ്ങളില്‍ ഏതെങ്കിലും ഒന്നോ അതിലധികമോ കണ്ടാല്‍ അല്പം പോലും സമയം പാഴാക്കാതെ ഉടന്‍ തന്നെ അടിയന്തര വൈദ്യസഹായം ഉറപ്പാക്കുക.
അതുകൊണ്ട് ട്രാന്‍സിയന്റ് ഇസ്‌കെമിക് അറ്റാക്ക് ഒരു മെഡിക്കല്‍ എമര്‍ജന്‍സിയാണ്.ലക്ഷണങ്ങള്‍ സ്വയം അപ്രത്യക്ഷമായി എന്നതുകൊണ്ട് ട്രാന്‍സിയന്റ് ഇസ്‌കെമിക് അറ്റാക്ക് അപകടമുക്തമാണെന്ന് കരുതരുത്. ട്രാന്‍സിയന്റ് ഇസ്‌കെമിക് അറ്റാക്ക് അനുഭവപ്പെടുന്ന മൂന്നില്‍ ഒരാള്‍ക്ക് ഭാവിയില്‍ വലിയ സ്ട്രോക്ക് ഉണ്ടാകാന്‍ സാധ്യതയുണ്ടെന്ന് പഠനങ്ങള്‍ വ്യക്തമാക്കുന്നു. ഇതില്‍ പകുതിയോളം സ്‌ട്രോക്കുകളും ട്രാന്‍സിയന്റ് ഇസ്‌കെമിക് അറ്റാക്ക് ഉണ്ടായി ആദ്യത്തെ 48 മണിക്കൂറിനുള്ളിലോ ഏതാനും ആഴ്ചകള്‍ക്കുള്ളിലോ ആണ് സംഭവിക്കുന്നത്. അതുകൊണ്ട് തന്നെ ലക്ഷണങ്ങള്‍ മാറിയാലും ഒരു നിമിഷം പോലും വൈകാതെ സ്ട്രോക്ക് കെയര്‍ സൗകര്യമുള്ള ആശുപത്രിയിലെത്തി അത്യാഹിത വിഭാഗത്തില്‍ വിദഗ്ദ്ധ പരിശോധന നടത്തേണ്ടത് അത്യാവശ്യമാണ്.
അമിത രക്തസമ്മര്‍ദ്ദം (ഹൈപ്പര്‍ ടെന്‍ഷന്‍): രക്തധമനികളുടെ ഭിത്തികളെ ബലഹീനമാക്കുന്ന ഏറ്റവും പ്രധാന ഘടകമാണിത്.
ഉയര്‍ന്ന കൊളസ്‌ട്രോള്‍ (ഹൈപ്പര്‍ ലിപിഡെമിയ): രക്തധമനികളില്‍ കൊഴുപ്പ് അടിഞ്ഞുകൂടി രക്തയോട്ടം തടസ്സപ്പെടുന്നു.
പ്രമേഹം (ഡയബെറ്റിസ്): രക്തത്തിലെ അമിത ഗ്ലൂക്കോസ് അളവ് രക്തധമനികളെ കേടുവരുത്തുന്നു.
ഹൃദ്രോഗങ്ങള്‍: ക്രമരഹിതമായ ഹൃദയമിടിപിന് കാരണമാകുന്ന ഏട്രിയല്‍ ഫിബ്രിലേഷന്‍ പോലെയുള്ള രോഗാവസ്ഥകള്‍ ഹൃദയത്തില്‍ രക്തക്കട്ടകള്‍ രൂപപ്പെടാനും അത് തലച്ചോറിലേക്ക് പ്രവഹിക്കാനും കാരണമാകുന്നു.
ജീവിതശൈലി ഘടകങ്ങള്‍: പുകവലി, അമിതമായ മദ്യപാനം, വ്യായാമമില്ലായ്മ, അമിതവണ്ണം, അസന്തുലിതമായ ഭക്ഷണം.
പ്രായവും ജനിതക ഘടകങ്ങളും: 55 വയസ്സിന് മുകളിലുള്ളവരിലും കുടുംബത്തില്‍ സ്ട്രോക്ക് പാരമ്പര്യമുള്ളവരിലും രോഗസാധ്യത കൂടുതലാണ്.
രക്തസമ്മര്‍ദ്ദവും പ്രമേഹവും നിയന്ത്രിക്കുക: കൃത്യമായ പരിശോധനയിലൂടെയും മരുന്നുകളിലൂടെയും രക്തസമ്മര്‍ദ്ദവും രക്തത്തിലെ പഞ്ചസാരയുടെ അളവും സാധാരണ നിലയിലാക്കുക.
ആരോഗ്യകരമായ ഭക്ഷണം: ഉപ്പ്, എണ്ണ, മധുരം, പൂരിത കൊഴുപ്പുകള്‍ (സാറ്റുറേറ്റഡ് ഫാറ്റ്) എന്നിവ കുറച്ച് പഴവര്‍ഗ്ഗങ്ങള്‍, പച്ചക്കറികള്‍, ധാന്യങ്ങള്‍ എന്നിവ ഭക്ഷണത്തില്‍ ഉള്‍പ്പെടുത്തുക.
വ്യായാമം ശീലമാക്കുക: ദൈനംദിന ജീവിതത്തില്‍ വ്യായാമം (നടത്തം, നീന്തല്‍ മുതലായവ) ശീലമാക്കുക.
ലഹരിവര്‍ജ്ജനം: പുകവലി പൂര്‍ണ്ണമായും ഉപേക്ഷിക്കുക അതോടൊപ്പം മദ്യപാനം ഒഴിവാക്കുക.
ശരീരഭാരം നിയന്ത്രിക്കുക: ഉയരത്തിന് അനുയോജ്യമായ ശരീരഭാരം നിലനിര്‍ത്തുക.
ട്രാന്‍സിയന്റ് ഇസ്‌കെമിക് അറ്റാക്ക് എന്നത് സ്ട്രോക്കിന് മുന്‍പായി ശരീരം നല്‍കുന്ന ഏറ്റവും അവസാനത്തെ രക്ഷാസന്ദേശമാണ്. ലക്ഷണങ്ങള്‍ പെട്ടെന്ന് മാറിയാലും അത് അവഗണിക്കാതെ എത്രയും വേഗം വിദഗ്ദ്ധ വൈദ്യസഹായം തേടുകയാണ് ഉചിതം. ചെറിയൊരു ജാഗ്രതയിലൂടെ വലിയൊരു മസ്തിഷ്‌കാഘാതത്തെയും ഭാവിയിലെ വൈകല്യങ്ങളെയും പൂര്‍ണ്ണമായും തടയാന്‍ സാധിക്കും.
Content Highlights :Transient ischemic attacks serve as a last-minute warning of a major impending stroke.
