LIVE TV
കൊല്ലം: കൈക്കൂലിക്കേസില്‍ കുന്നത്തൂര്‍ താലൂക്ക് ഓഫീസിലെ മുന്‍ ഡെപ്യൂട്ടി തഹസില്‍ദാര്‍ക്ക് എട്ട് വര്‍ഷം തടവ് ശിക്ഷ വിധിച്ച് കൊല്ലം വിജിലന്‍സ് കോടതി. വടക്കും തല സ്വദേശി ബാബുവിനാണ് കോടതി ശിക്ഷ വിധിച്ചത്. ഔദ്യോഗിക പദവി ദുരുപയോഗപ്പെടുത്തി 3000 രൂപ കൈക്കൂലിയായി കൈപ്പറ്റി എന്നാണ് ഇയള്‍ക്കെതിരെ തെളിഞ്ഞ കുറ്റം. 2014 ലാണ് കേസിനാസ്പതമായ സംഭവം. കൈക്കൂലി വാങ്ങിയശേഷം പരാതിക്കാരന് അനധികൃതമായി ചെങ്കല്ല് വെട്ടാന്‍ ഒത്താശ ചെയ്തുകൊടുത്തെന്നാണ് ഇയാള്‍ക്കെതിരായ കണ്ടെത്തല്‍.
എന്നാല്‍ അടുത്ത ഗഡു കൈക്കൂലി നല്‍കാത്തതിനെ തുടര്‍ന്ന് കല്ലുവെട്ടിക്കൊണ്ടിരിക്കെ കല്ല് വെട്ട് യന്ത്രം പിടിച്ചെടുത്ത് കുന്നത്തൂര്‍ താലൂക്ക് ഓഫീസില്‍ സൂക്ഷിക്കുകയായിരുന്നു. തുടര്‍ന്ന് മെഷീന്‍ വിട്ടുകൊടുക്കുന്നതിന് മൈനിഗ് ആന്റ് ജിയോളജിക്കലിന് റിപ്പോര്‍ട്ട് കൊടുക്കുന്നതിന് കുന്നത്തൂര്‍ താലൂക്ക് ഓഫീസില്‍വെച്ച് വീണ്ടും 2000 രൂപ ഇയാള്‍ കൈക്കൂലി ചോദിച്ച് വാങ്ങുകയായിരുന്നു. കൂടാതെ ജിയോളജിക്കല്‍ ഡിപ്പാര്‍ട്ട്‌മെന്റില്‍ ഫൈന്‍ അടച്ചശേഷം കല്ല് വെട്ട് യന്ത്രം വിട്ടുനല്‍കുന്നതിനുള്ള അവസാന ഗഡുവായ 5000 രൂപയും ഡെപ്യൂട്ടി തഹസില്‍ദാര്‍ കൈക്കൂലിയായി കൈപ്പറ്റുകയായിരുന്നു. ഇവിടെ വെച്ചാണ് ബാബുവിനെ വിജിലന്‍സ് പിടികൂടുന്നത്.
തടവ് കൂടാതെ ഒരു ലക്ഷം രൂപ പിഴ ഒടുക്കാനും കോടതി ഉത്തരവായിട്ടുണ്ട് കൊല്ലം വിജിലന്‍സ് കോടതി ജഡ്ജ് ഡോ മോഹിത് സി എസ് ആണ് വിധി പുറപ്പെടുവിച്ചത്. വിജിലന്‍സിനുവേണ്ടി പബ്ലിക് പ്രോസിക്യൂട്ടര്‍മാരായ പി എസ് ദിവ്യ, സിജു രാജന്‍ എന്നിവര്‍ ഹാജരായി. കൊല്ലം വിജിലന്‍സ് യുണിറ്റിലെ മുന്‍ ഡെപ്യൂട്ടി പൊലീസ് സൂപ്രണ്ട് റെക്‌സ് ബോബി അരവിനാണ് കേസില്‍ എഫ്‌ഐആര്‍ രജിസ്റ്റര്‍ ചെയ്ത് അന്വേഷണം നടത്തിയത്. തുടര്‍ന്ന് ഡിവൈഎസ്പി ആര്‍ ജയശങ്കര്‍ തുടര്‍ അന്വേഷണം നടത്തി. പിന്നാലെ ഡിവൈഎസ്പി കെ അശോക് കുമാറാണ് കേസിന്റെ അന്വേഷണം പൂര്‍ത്തീകരിച്ച് കുറ്റപത്രം സമര്‍പ്പിച്ചത്.
Content Highlights: A Kollam Vigilance Court has sentenced Babu, a former Deputy Tahsildar at Kunnathur Taluk Office, to eight years in prison in a bribery case. The court found him guilty of misusing his official position to accept a Rs 3,000 bribe in 2014. He was also found to have helped the complainant illegally cut laterite stones after receiving the money. Babu is a native of Vadakkumthala.
