LIVE TV
തിരുവനന്തപുരം: തിരുവനന്തപുരത്തെ സംഘര്‍ഷത്തിന് പിന്നില്‍ ഗൂഢാലോചനയുണ്ടെന്ന് മന്ത്രിയും യൂത്ത് കോണ്‍ഗ്രസ് സംസ്ഥാന അധ്യക്ഷനുമായ ഒ ജെ ജനീഷ്. പിണറായി വിജയനെ രക്ഷപ്പെടുത്താന്‍ ഡിവൈഎഫ്‌ഐ ആക്രമണം നടത്തുന്നുവെന്നും പിന്നില്‍ പിണറായിയാണെന്നും ജനീഷ് മാധ്യമങ്ങളോട് പറഞ്ഞു. മാസപ്പടിയും ഇ ഡി അന്വേഷണവും മറയ്ക്കാനാണ് ഇതിലൂടെ ശ്രമിക്കുന്നതെന്നും മന്ത്രി ആരോപിച്ചു.
വോട്ടവകാശത്തെ അട്ടിമറിച്ച് അധികാരത്തിലേറിയ സര്‍ക്കാരായി കേന്ദ്രസര്‍ക്കാര്‍ മാറി. അക്കാര്യം ചൂണ്ടിക്കാട്ടി രാജ്യവ്യാപകമായി കോണ്‍ഗ്രസ് പ്രതിഷേധത്തിലാണ്. അതിന്റെ തുടര്‍ച്ചയായാണ് അമിത് ഷായെ കരിങ്കൊടി കാണിച്ചത്. അതിന് പിന്നാലെ ബിജെപി ആക്രമണം അഴിച്ചുവിട്ടു. യുവമോര്‍ച്ച സമരം ചെയ്യുന്നത് എന്തിനാണ്?. യൂണിവേഴ്സിറ്റി കോളേജിന് മുന്നിലൂടെ പോകുമ്പോള്‍ എസ്എഫ്‌ഐ പ്രവര്‍ത്തകര്‍ ബിയര്‍ കുപ്പികളും കല്ലുകളും വലിച്ചെറിഞ്ഞു. യൂത്ത് കോണ്‍ഗ്രസ് പ്രതിഷേധം അലങ്കോലമാക്കാന്‍ ശ്രമം നടന്നു. യൂണിവേഴ്സിറ്റി ഹോസ്റ്റലിലടക്കമുണ്ടായ സംഘര്‍ഷം സുവര്‍ണാവസരമാക്കി മാറ്റാന്‍ പിണറായിയും എം വി ഗോവിന്ദനും ശ്രമിച്ചുവെന്നും അതുകൊണ്ടാണ് കോടിയേരി അനുസ്മരണത്തില്‍ ഇരുവരും പങ്കെടുക്കാത്തതെന്നും ജനീഷ് പറഞ്ഞു.
എസ്എഫ്‌ഐ സംഘര്‍ഷം ആസൂത്രണം ചെയ്തു. 10 സ്ഥലത്ത് തന്റെ വാഹനത്തിന് നേരെ ആക്രമണം നടന്നു. അക്രമത്തിന് നിയമസഭാംഗം തന്നെ നേതൃത്വം നല്‍കുകയാണ്. നിയമസഭാ അംഗം തന്നെ നേതൃത്വം നല്‍കിയാല്‍, ക്രമസമാധാന നില തകരില്ലേയെന്നും എം വിജിനെ ലക്ഷ്യമിട്ട് ജനീഷ് പറഞ്ഞു.
ദേശീയ പതാക തകര്‍ക്കാനാണ് ഡിവൈഎഫ്‌ഐ ശ്രമിച്ചത്. ആരാണ് ബിജെപി, ആരാണ് ഡിവൈഎഫ്‌ഐ എന്ന് തിരിച്ചറിയാന്‍ കഴിയുന്നില്ല. എസ്എഫ്‌ഐക്ക് രാഷ്ട്രീയ വകതിരിവില്ല. കോടിയേരിയെ തിരിച്ചറിയാത്തവര്‍ക്ക് എന്ത് ഗ്യാനേഷ് കുമാര്‍. എസ്എഫ്‌ഐ ആക്രമണം അഴിച്ചുവിട്ടപ്പോള്‍ യൂത്ത്‌കോണ്‍ഗ്രസ് പ്രവര്‍ത്തകര്‍ തിരിച്ചുപ്രതികരിച്ചു. അതാണ് പൊലീസ് റിപ്പോര്‍ട്ടില്‍ ഉള്ളത്. അക്രമം ആരുടെ ഭാഗത്ത് നിന്നും ഉണ്ടാകാന്‍ പാടില്ല. ചില പൊലീസ് ഉദ്യോഗസ്ഥര്‍ ആക്രമണത്തിന് കൂട്ട് നില്‍ക്കുകയാണ്. ഡിവൈഎഫ്‌ഐ പ്രവര്‍ത്തകര്‍ ആക്രമിക്കാന്‍ വരുമ്പോള്‍ പൊലീസുകാരില്‍ ചിലര്‍ കാഴ്ചക്കാരാവുകയാണ്. ചിലയിടങ്ങളില്‍ കൊലപാതക ശ്രമമാണ് ഉണ്ടായത്. അതാണ് സന്ദീപ് വാര്യര്‍ ചൂണ്ടിക്കാട്ടിയത്. ചില പൊലീസ് ഉദ്യോഗസ്ഥര്‍ അക്രമികളെ തടയുമ്പോള്‍ മറ്റ് ചിലര്‍ കാഴ്ചക്കാരായി നിന്നു. ക്രിമിനലുകള്‍ പൊലീസിലുമുണ്ട്. ഇത് ആഭ്യന്തര വകുപ്പിന്റെ വീഴ്ച്ചയല്ലെന്നും അദ്ദേഹം പറഞ്ഞു.
Content Highlights: oj janeesh alleges conspiracy behind thiruvananthapuram clashes
