LIVE TV
തിരുവനന്തപുരം: സില്വര് ലൈനിന് ബദലായി ഡിഎംആര്സി മുന് ഉപദേഷ്ടാവ് ഇ ശ്രീധരന് മുന്നോട്ടുവെച്ച അതിവേഗ റെയില് പദ്ധതി നടപ്പിലാക്കാന് സര്ക്കാര് ആലോചിക്കുന്നതായി സൂചന. ഇന്ന് സെക്രട്ടേറിയറ്റില് മുഖ്യമന്ത്രി സതീശനും ഇ ശ്രീധരനും തമ്മില് കൂടിക്കാഴ്ച നടത്തിയിരുന്നു. പൊന്നാനി എംഎല്എ കെ പി നൗഷാദലിയും ഇ കൂടിക്കാഴ്ചയില് പങ്കെടുത്തിരുന്നു.
അതിവേഗ റെയില് പദ്ധതി നടപ്പിലാക്കുന്നതില് മുഖ്യമന്ത്രി വി ഡി സതീശന് അനുകൂല നിലപാടാണെന്നാണ് വിവരം. ഇക്കാര്യം നൗഷാദലി സൂചിപ്പിക്കുകയും ചെയ്തു. സില്വര് ലൈനിനെ അപേക്ഷിച്ച് അതിവേഗ റെയില്പാത പദ്ധതിക്കായി സ്ഥലമേറ്റെടുപ്പ് പ്രതിസന്ധി സൃഷ്ടിക്കില്ലെന്നായിരുന്നു ഇ ശ്രീധരന്റെ വാദം. ഇതാകാം പദ്ധതിയോട് മുഖ്യമന്ത്രി അനുകൂല സമീപനം സ്വീകരിച്ചതെന്നാണ് സൂചന. സില്വര് ലൈന് ബദലായി ഇ ശ്രീധരന് മുന്നോട്ടുവെച്ച അതിവേഗ റെയില് പദ്ധതി സംബന്ധിച്ച സര്ക്കാരിന്റെ ഔദ്യോഗിക തീരുമാനം രണ്ട് ആഴ്ചക്കുള്ളില് അറിയിക്കാമെന്നാണ് സതീശന് മറുപടി നല്കിയിരിക്കുന്നതെന്നാണ് പുറത്ത് വരുന്ന സൂചന.
ഇക്കഴിഞ്ഞ ജനുവരി 24ന് വാര്ത്താസമ്മേളനം വിളിച്ചായിരുന്നു തിരുവനന്തപുരം-കണ്ണൂര് അതിവേഗ റെയില് പദ്ധതി ഇ ശ്രീധരന് അവതരിപ്പിച്ചത്. സ്റ്റേഷനുകള് അടക്കം വിശദമായ പ്ലാന് ആയിരുന്നു ഇ ശ്രീധരന് അവതരിപ്പിച്ചത്. പതിനാല് സ്റ്റേഷനായിരിക്കും ആദ്യ പ്ലാനെന്നായിരുന്നു ശ്രീധരന് പറഞ്ഞത്. അത് പിന്നീട് 22 ആയി ഉയര്ത്തുമെന്നും ആദ്യ സ്റ്റോപ്പ് തിരുവനന്തപുത്തായിരിക്കുമെന്നും ഇ ശ്രീധരന് പറഞ്ഞിരുന്നു. തിരുവനന്തപുരം എയര്പോര്ട്ട്, വര്ക്കല, കൊല്ലം, കൊട്ടാരക്കര, അടൂര്, ചെങ്ങന്നൂര്, കോട്ടയം, എറണാകുളം, ആലുവ, തൃശൂര്, കുന്നംകുളം, എടപ്പാള്, തിരൂര്, മലപ്പുറം(കരിപ്പൂര്), കോഴിക്കോട്, കൊയിലാണ്ടി, വടകര, തലശ്ശേരി, കണ്ണൂര് എന്നിങ്ങനെയായിരിക്കും സ്റ്റേഷനുകള്. എറണാകുളത്ത് ബൈപ്പാസിനോട് അടുപ്പിച്ചായിരിക്കും സ്റ്റേഷന് വരിക. കാസര്കോട് നിന്ന് യാത്രക്കാര് കുറവാണെന്നാണ് പഠനം കണ്ടെത്തിയതെന്നും അതുകൊണ്ട് കാസര്കോട് ഒഴിവാക്കിയതെന്നും ശ്രീധരന് വിശദീകരിച്ചിരുന്നു.
പാലം തൂണുകളുടെ പണി കഴിഞ്ഞാല് ആ സ്ഥലം പിന്നീട് ആവശ്യമുണ്ടാകില്ലെന്നും മുഴുവന് തുക നല്കിയാണ് ജനങ്ങളില് നിന്ന് ഭൂമി ഏറ്റെടുക്കുകയെന്നും ശ്രീധരന് പറഞ്ഞിരുന്നു. പണി പൂര്ത്തിയായാല് റെയില്വേക്ക് ആ ഭൂമി ആവശ്യമില്ല. അത് ഉടമയ്ക്ക് വ്യവസ്ഥകളോടെ തിരികെ നല്കും. ചെറിയ തുക വര്ഷം തോറും റെയില്വേക്ക് നല്കേണ്ടി വരും. 70 ശതമാനം എലിവേറ്റഡാകും പാത. 20 ശതമാനം ടണലായിരിക്കും. അതുകൊണ്ട് ആവശ്യത്തിന് മാത്രമായിരിക്കും സ്ഥലം ഏറ്റെടുപ്പ്. ടണല് ആണെങ്കിലും ജനങ്ങള് പേടിക്കേണ്ടതില്ലെന്നും ശ്രീധരന് പറഞ്ഞിരുന്നു. സ്ഥലം ഏറ്റെടുക്കുന്ന ചുമതല സംസ്ഥാനത്തിനായിരിക്കും. ആകെ 430 കിലോമീറ്ററായിരിക്കും ദൂരം. നാല് ചീഫ് എന്ജിനീയര്മാരെ ചുമതലപ്പെടുത്തി ഒരേ സമയം പ്രവര്ത്തി നടത്തിയാല് അഞ്ച് വര്ഷത്തിനകം പൂര്ത്തീകരിക്കാനാകുമെന്നും ശ്രീധരന് വ്യക്തമാക്കിയിരുന്നു.
Content Highlights- The Kerala government is reportedly considering advancing E Sreedharan’s high speed rail project.
