LIVE TV
കണ്ണൂര്: ധനരാജ് രക്തസാക്ഷി ഫണ്ടിലെ തിരിമറിയുടെ തെളിവ് ഫേസ്ബുക്കിലൂടെ പുറത്തുവിട്ട് വി കുഞ്ഞികൃഷ്ണന്. ഏരിയ സെക്രട്ടറിയുടെ അക്കൗണ്ടിലേക്ക് അഞ്ച് ലക്ഷം രൂപ മാറ്റിയതിന്റെ രേഖകളാണ് കുഞ്ഞികൃഷ്ണന് പുറത്തുവിട്ടിരിക്കുന്നത്. 2018ജൂലായ് ഒമ്പതാം തീയതി പയ്യന്നൂര് റൂറല് ബാങ്കിലെ പേഴ്സണല് അക്കൗണ്ടിലേക്കാണ് അഞ്ച് ലക്ഷം രൂപ മാറ്റിയിരിക്കുന്നതെന്ന് വ്യക്തമാക്കുന്ന രേഖകളാണ് പുറത്തുവന്നിരിക്കുന്നത്. ഈ തെളിവുകളെ ന്യായീകരിക്കാനുള്ള ശ്രമങ്ങള് ഉണ്ടാവുമെന്നും ഇനിയും സംസാരിക്കുന്ന തെളിവുകള് പുറത്തുവരുമെന്നുമാണ് കുഞ്ഞികൃഷ്ണന് ഫേസ്ബുക്ക് കുറിപ്പില് പറയുന്നത്.
ബാങ്കിന്റെ അക്കൗണ്ട് സ്റ്റേറ്റ്മെന്റും, ധനരാജ് രക്തസാക്ഷി ഫണ്ട് ചിലവഴിച്ചതിന്റെ കണക്ക് കമ്മിറ്റിക്ക് മുന്പാകെ കാണിച്ചതിന്റെ പകര്പ്പും കുറിപ്പിനൊപ്പം പോസ്റ്റ് ചെയ്തിട്ടുണ്ട്. എന്നാല് ഇതിനെ പ്രതിരോധിച്ച് സിപിഐഎം രംഗത്തെത്തി.കോവിഡ് കാലത്തായിരുന്നു പണം കൈമാറിയതെന്നും അന്നത്തെ പരിമിതികള് കൊണ്ടാണ് ഏരിയ സെക്രട്ടറിയുടെ അക്കൗണ്ടിലേക്ക് പണം കൈമാറിയതെന്നാണ് സിപിഐഎം കണ്ണൂര് ജില്ല സെക്രട്ടറി പറഞ്ഞത്. എന്നാല് തെളിവുകള് പയ്യന്നൂരിലെ ജനങ്ങള് മനസിലാക്കുമെന്നും അഴിമതിക്കാര് ആരാണെന്ന് ജനം വിലയിരുത്തുമെന്നും കുഞ്ഞിക്കണ്ണന് പോസ്റ്റില് പറയുന്നുണ്ട്.
ഫേസ്ബുക്ക് പോസ്റ്റിന്റെ പൂര്ണരൂപം:
പയ്യന്നൂരില് തിരഞ്ഞെടുപ്പ് പ്രചരണം ആരംഭിച്ചത് മുതല് സിപിഎം കേന്ദ്രങ്ങള് പറഞ്ഞു കൊണ്ടിരിക്കുന്നത് പയ്യന്നൂരില് ഒരു തരത്തിലുമുള്ള ഫണ്ട് തിരിമറിയും നടന്നിട്ടില്ല, പാര്ട്ടിയുടെ ഒരു രൂപ പോലും നഷ്ടപ്പെട്ടിട്ടില്ല എന്നാണ്.
നിഷേധിക്കാന് പറ്റാത്ത വിധം തെളിവുകള് സംസാരിക്കട്ടെ എന്നാണെങ്കില്, ആ തെളിവുകള് മുന്നോട്ടു വയ്ക്കാന് കണക്കുകള് പരിശോധിക്കാന് പാര്ട്ടി ചുമതലപ്പെടുത്തിയ, ഫണ്ട് വെട്ടിപ്പ് തെളിവ് സഹിതം കണ്ടെത്തിയ ഞാന് തയ്യാറാണ്.
ഈ തെളിവുകള്ക്കെതിരെയും ആശ്രിതരെ വെച്ച് ന്യായീകരണവുമായി ഈ സംഘം എത്താന് സാധ്യതയുണ്ട്. പക്ഷേ ഏത് ന്യായീകരണങ്ങള്ക്കും മേലെയാണ് സൂര്യനെ പോലെ തിളങ്ങി നില്ക്കുന്ന സത്യം. ആ സത്യത്തെ നിങ്ങള് ഇരുട്ടുകൊണ്ട് മറക്കാനാണ് ശ്രമിക്കുന്നതെങ്കില് ഇനിയും സംസാരിക്കുന്ന തെളിവുകള് പുറത്ത് വരും. ഒന്നുകൊണ്ടും നിങ്ങള് 'ധൈര്യപ്പെടേണ്ട'.
2018 ജൂലൈ മാസം ഒമ്പതാം തീയതി പയ്യന്നൂര് റൂറല് ബാങ്ക് മെയിന് ബ്രാഞ്ചിലുള്ള, ധീര രക്തസാക്ഷി സഖാവ് ധനരാജ് കുടുംബ സഹായനിധിയുടെ അക്കൗണ്ടില് നിന്ന് 5 ലക്ഷം രൂപ അന്നത്തെ ഏരിയ സെക്രട്ടറിയുടെ പേഴ്സണല് അക്കൗണ്ടിലേക്ക് മാറ്റിയതിന്റെ തെളിവ് ഞാന് പൊതുസമക്ഷം വയ്ക്കുകയാണ്.
ബാങ്കിന്റെ അക്കൗണ്ട് സ്റ്റേറ്റ്മെന്റും, ധനരാജ് രക്തസാക്ഷി ഫണ്ട് ചിലവഴിച്ചതിന്റെ കണക്ക് കമ്മിറ്റിക്ക് മുന്പാകെ കാണിച്ചതിന്റെ പകര്പ്പും ഇതിനോടൊപ്പം പോസ്റ്റ് ചെയ്യുന്നു. പയ്യന്നൂരിലെ പാര്ട്ടി നേതൃത്വം ധീര രക്തസാക്ഷി സഖാവ് ധനരാജിന്റെ പേരില് പിരിച്ച ഫണ്ടില് നിന്ന് പോലും പണം അപഹരിച്ചിട്ടുണ്ട് എന്നതിന് ഇതില് കൂടുതല് എന്ത് തെളിവാണ് ഈ പാര്ട്ടിക്കും ഇന്നാട്ടിലെ ജനങ്ങള്ക്കും മാധ്യമങ്ങള്ക്കും ഇനി വേണ്ടത്?
നിങ്ങള് നടത്തിയ ഈ ധനാപഹരണം ഈ പാര്ട്ടിയേയും പാര്ട്ടിയെ വിശ്വസിക്കുന്ന പാര്ട്ടി കുടുംബങ്ങളേയും അനുഭാവികളേയും വഞ്ചിക്കുന്നതല്ല എന്ന് ഇപ്പോഴും നെഞ്ചില് തൊട്ട് പറയാന് സാധിക്കുമോ നിങ്ങള്ക്ക്?
ഈ തെളിവുകള് പയ്യന്നൂരിലെ ജനങ്ങള് മനസ്സിലാക്കും. അഴിമതിക്കാര് ആരാണെന്ന് ജനം വിലയിരുത്തും.
പോരാട്ടം തുടരുകയാണ്…
വി കുഞ്ഞികൃഷ്ണന്
Content Highlights: Former CPM leader V Kunhikrishnan released documentary evidence related to the alleged fraud in the Dhanraj Martyr Fund
