LIVE TV
തിരുവനന്തപുരം: വെങ്ങാനൂരില് വന് കഞ്ചാവ് വേട്ട. കാറില് കടത്തിക്കൊണ്ടുവന്ന 21 കിലോ കഞ്ചാവ് നിറഞ്ഞ പായ്ക്കറ്റുകളുമായി അറുപതുവയസ്സുള്ള സ്ത്രീയും മകളും മരുമകനും അടക്കം മൂന്ന് പേരെയാണ് സിറ്റി ഡാന്സാഫ് പിടികൂടിയത്.
തമിഴ്നാട്ടില് നിന്ന് വാങ്ങി നഗരത്തില് വില്ക്കുന്നതിനായാണ് കഞ്ചാവെത്തിച്ചത്. വലിയവേളി പൗണ്ട് കടവ് തൈവിളാകം ഹൗസില് അനനന്തന് എന്ന കാര്ലോസ്(38), ഭാര്യ ബിന്ദു(33), ഭാര്യാമാതാവ് ദമയന്തി(60) എന്നിവരെയാണ് വെങ്ങാനൂരിലെ ക്ഷേത്രത്തിന് സമീപത്ത് നിന്ന് ചൊവ്വാഴ്ച രാത്രി 9.30ഓടെ പിടികൂടിയത്.
മൂന്നുകുട്ടികളും കാറിലുണ്ടായിരുന്നു. തമിഴ്നാട്ടില് നിന്ന് ഉല്ലാസയാത്ര കഴിഞ്ഞുവരികയാണെന്ന് തോന്നിപ്പിക്കാനായിരുന്നു ഇവരുടെ ശ്രമം. പള്ളിച്ചല്-വെങ്ങാനൂര് റൂട്ടിലൂടെ ബൈപ്പാസ് കടന്ന് വലിയവേളിയിലേക്ക് പോകാനായിരുന്നു ശ്രമിച്ചത്.
ബിന്ദുവിനെ നേരത്തെ കഞ്ചാവുമായി ഡാന്സാഫ് സംഘം പിടികൂടിയിട്ടുണ്ട്. അതിന് ശേഷമാണ് വീണ്ടും പിടിയിലാവുന്നത്. കാറിന്റെ ഡിക്കിക്കുള്ളില് സ്യൂട്ട്കെയ്സിനുള്ളില് ഒളിപ്പിച്ച നിലയിലായിരുന്നു കഞ്ചാവ് പൊതികള്. ഇവരെ വിഴിഞ്ഞം പൊലീസിന് കൈമാറും.
Content Highlights: A 60-year-old woman, her daughter, and her son-in-law were arrested for alleged ganja trafficking
