LIVE TV
വാഷിംഗ്ടണ്: ഇറാനിലെ യുദ്ധം അവസാനിപ്പിക്കാന് ആലോചിക്കുന്നതായി അറിയിച്ച് അമേരിക്കന് പ്രസിഡന്റ് ഡോണള്ഡ് ട്രംപ്. സൈനിക നടപടികളിലൂടെ മുന്നില്കണ്ട ലക്ഷ്യങ്ങളെല്ലാം നേടിയെടുത്ത് കഴിഞ്ഞുവെന്ന് അവകാശപ്പെട്ടാണ് ട്രംപ് യുദ്ധം അവസാനിപ്പിച്ചേക്കുമെന്ന സൂചനകള് നല്കിയിരിക്കുന്നത്. ഹോര്മുസ് കടലിടുക്കിലെ പ്രതിസന്ധികള് അത് ഉപയോഗിക്കുന്ന രാജ്യങ്ങള് തന്നെ പരിഹരിക്കണമെന്നും ട്രംപ് ട്രൂത്ത് സോഷ്യലില് പങ്കുവെച്ച പോസ്റ്റില് പറയുന്നുണ്ട്.
'ഇറാനിലെ ഭീകരവാദ അധികാരകേന്ദ്രങ്ങള്ക്കെതിരെയുള്ള സൈനിക നടപടികളിലൂടെ ലക്ഷ്യം വെച്ച കാര്യങ്ങളെല്ലാം ഏകദേശം പൂര്ത്തിയായി കഴിഞ്ഞു. അതുകൊണ്ട് തന്നെ സൈനിക നടപടികള് അവസാനിപ്പിക്കാന് ആലോചിക്കുകയാണ്. ഇറാന്റെ മിസൈലുകളും ലോഞ്ചറുകളും അടക്കമുള്ള എല്ലാ ആയുധശേഖരവും തകര്ക്കുക, ഇറാന്റെ പ്രതിരോധ സംവിധാനങ്ങള് തകര്ക്കുക എന്നിവയായിരുന്നു ചില ലക്ഷ്യങ്ങള്.
ഇറാന് ഒരിക്കലും ആണവായുധ നിര്മാണത്തിന്റെ അരികില് പോലും എത്തില്ലെന്ന് ഉറപ്പാക്കിയിട്ടുണ്ട്. ഇനി എന്നെങ്കിലും മറിച്ച് സംഭവിക്കുകയാണെങ്കിലും അമേരിക്കയ്ക്ക് ആ നീക്കത്തെ അതിവേഗം തടയാനുമാകും. ഇസ്രയേല്, സൗദി അറേബ്യ, ഖത്തര്, യുഎഇ, ബഹ്റൈന്, കുവൈറ്റ് തുടങ്ങി പശ്ചിമേഷ്യയിലെ നമ്മുടെ സഖ്യ രാജ്യങ്ങള്ക്കെല്ലാം ഏറ്റവും മികച്ച രീതിയില് സുരക്ഷ ഉറപ്പ് വരുത്താനായി.
ഹോര്മുസ് കടലിടുക്കിന്റെ സുരക്ഷ ഉറപ്പു വരുത്താനുള്ള നടപടികള് അത് ഉപയോഗിക്കുന്ന രാജ്യങ്ങള് തന്നെ ഉറപ്പ് വരുത്തണം. അമേരിക്ക ഈ കടലിടുക്ക് ഉപയോഗിക്കുന്നില്ല. മറ്റ് രാജ്യങ്ങള് ആവശ്യപ്പെട്ടാല് അവരെ സഹായിക്കാം. ഇറാന്റെ ഭീഷണി അവസാനിച്ചാല് പിന്നെ അതിന്റെ ആവശ്യം വരുമെന്ന് തോന്നുന്നില്ല. ആ രാജ്യങ്ങള്ക്ക് തന്നെ ചെയ്യാവുന്ന മിലിട്ടറി നടപടികളുടെ ആവശ്യമേ ഉണ്ടാകൂ,' ഡോണള്ഡ് ട്രംപിന്റെ പോസ്റ്റില് പറഞ്ഞു.
ദിവസങ്ങളായി തുടരുന്ന ആക്രമണത്തില് നിന്നും പിന്മാറാന് ട്രംപ് ഭരണകൂടം തീരുമാനിച്ചതായാണ് ഈ പോസ്റ്റ് നല്കുന്ന സൂചന എന്നാണ് പൊതുവെ വിലയിരുത്തപ്പെടുന്നത്. അതേസമയം, ഹോര്മുസ് കടലിടുക്കിലെ പ്രതിസന്ധി പരിഹരിക്കാന് അമേരിക്കയുടെ ഇടപെടലുകള് ഇനി ഉണ്ടാകില്ലെന്ന് കൂടി ട്രംപിന്റെ പോസ്റ്റിലൂടെ വ്യക്തമാകുന്നുണ്ട്. ഇത് നിലവിലെ സാഹചര്യങ്ങളെ കൂടുതല് സങ്കീര്ണമാക്കുമോ അതോ ഇറാനും മറ്റ് രാജ്യങ്ങളും ചര്ച്ചയിലൂടെ പരിഹരിക്കുമോ എന്ന് കാത്തിരുന്ന് കാണാം.
അതേസമയം, ആഗോള വിപണയില് ക്രൂഡ് ഓയില് വില വര്ധിച്ചതിന് പിന്നാലെ ഇറാനിയന് എണ്ണയ്ക്കുളള ഉപരോധം യുഎസ് നീക്കിയിരുന്നു. നിലവില് കപ്പലുകളിലുളള എണ്ണയ്ക്കുളള ഉപരോധമാണ് താല്ക്കാലികമായി നീക്കിയത്. ആഗോള വിപണിയിലെ എണ്ണവില പിടിച്ച് നിര്ത്താനാണ് നടപടി. ഇതോടെ ആഗോള വിപണിയിലേക്ക് 140 ദശലക്ഷം ബാരല് എണ്ണ എത്തും. വില്പ്പനയില് നിന്നും ഇറാന് സാമ്പത്തിക ലാഭം ഉണ്ടാകില്ലെന്നാണ് യുഎസ് സ്റ്റേറ്റ് സെക്രട്ടറിയുടെ വാക്കുകള്. പുതിയ വാങ്ങലുകള്ക്കോ ഉത്പാദനത്തിനോ അനുമതിയില്ലെന്നും സ്കോട്ട് ബെസന്റ് അറിയിച്ചിട്ടുണ്ട്.
ഗള്ഫ് രാജ്യങ്ങളിലെ അമേരിക്കന് സൈനിക താവളങ്ങളടക്കം ലക്ഷ്യം വെച്ചുള്ള ഇറാന്റെ ആക്രമണം തുടരുന്നുണ്ട്. ട്രംപ് യുദ്ധത്തില് നിന്നും ഏകപക്ഷീയമായി പിന്മാറുകയും ഇസ്രയേല് ആക്രമണം നിര്ത്തുകയും ചെയ്താല് ഒരുപക്ഷെ യുദ്ധം അവസാനത്തോട് അടുത്തേക്കാം. പക്ഷെ ലോകത്തിന്റെ സാമ്പത്തിക ഘടന വലിയ ആഘാതം ഏറ്റുവാങ്ങിയിരിക്കുന്നതിനാല് യുദ്ധം അവസാനിച്ചാലും എണ്ണ പ്രതിസന്ധി അടക്കമുള്ള പല പ്രശ്നങ്ങളും തുടര്ന്നേക്കാം.
Content Highlights: USA is to wind up military operations in Iran says Donald Trump. Asks other countries who uses Hormuz to sort out the problems there
