LIVE TV
മൂന്ന് വർഷത്തോളം നീണ്ട ചർച്ചകൾക്കൊടുവിൽ ഇന്ത്യയും യുകെയും തമ്മിലുള്ള സമഗ്ര സാമ്പത്തിക-വ്യാപാര കരാർ പ്രാബല്യത്തിൽ വന്നു. ഇരു രാജ്യങ്ങളും തമ്മിലുള്ള വ്യാപാരം വർധിപ്പിക്കാനും നിക്ഷേപം പ്രോത്സാഹിപ്പിക്കാനും ലക്ഷ്യമിടുന്ന കരാർ ഇന്ത്യയിലെ ഉപഭോക്താക്കൾക്കും കയറ്റുമതിക്കാർക്കും ഒരുപോലെ ഗുണകരമാകുമെന്നാണ് വിലയിരുത്തൽ.
കരാറിന്റെ ഭാഗമായി ബ്രിട്ടനിൽ നിന്ന് ഇന്ത്യയിലേക്ക് എത്തുന്ന നിരവധി ഉൽപ്പന്നങ്ങളുടെ ഇറക്കുമതി തീരുവ ഘട്ടംഘട്ടമായി കുറയ്ക്കും. ഇതോടെ സ്കോച്ച് വിസ്കി, ജിന്ന്, പ്രീമിയം കാറുകൾ, ബ്രാൻഡഡ് വസ്ത്രങ്ങൾ, ചോക്ലേറ്റുകൾ, ചില ഇലക്ട്രോണിക് ഉൽപ്പന്നങ്ങൾ, സൗന്ദര്യവർധക വസ്തുക്കൾ, മെഡിക്കൽ ഉപകരണങ്ങൾ തുടങ്ങിയവയുടെ വിലയിൽ കുറവ് ഉണ്ടാകുമെന്നാണ് പ്രതീക്ഷ. എന്നാൽ എല്ലാ ഉൽപ്പന്നങ്ങൾക്കും വിലക്കുറവ് ഉടൻ ലഭിക്കില്ല. തീരുവ കുറയുന്ന സമയക്രമവും കമ്പനികളുടെ വിലനിർണയ നയവും
അനുസരിച്ചായിരിക്കും വിപണിയിലെ മാറ്റം.
യുകെയിൽ നിർമ്മിക്കുന്ന പ്രീമിയം കാറുകൾക്ക് നിലവിൽ ഉയർന്ന ഇറക്കുമതി തീരുവയാണ് ഇന്ത്യ ഈടാക്കുന്നത്. പുതിയ കരാറിലൂടെ നിശ്ചിത വ്യവസ്ഥകൾക്കും ക്വാട്ടാ സംവിധാനത്തിനും വിധേയമായി ഈ തീരുവ ഘട്ടംഘട്ടമായി കുറയ്ക്കും. അതിനാൽ ചില മോഡലുകളുടെ വില ഭാവിയിൽ കുറയാൻ സാധ്യതയുണ്ട്. എന്നാൽ എല്ലാ ബ്രാൻഡുകൾക്കും ഒരേസമയം വില കുറയണമെന്നില്ല.
ബ്രിട്ടനിൽ നിന്നുള്ള ആഡംബര വാഹനങ്ങളുടെ ഇറക്കുമതി തീരുവ നിലവിലെ 110 ശതമാനത്തിൽ നിന്ന്, നിശ്ചിത ക്വോട്ടയ്ക്ക് വിധേയമായി അടുത്ത അഞ്ച് വർഷത്തിനുള്ളിൽ 10 ശതമാനമായി ഘട്ടംഘട്ടമായി കുറയും. ഇതോടെ ജാഗ്വർ ലാൻഡ് റോവർ, ആസ്റ്റൺ മാർട്ടിൻ, റോൾസ്-റോയ്സ് തുടങ്ങിയ ബ്രിട്ടീഷ് ആഡംബര വാഹനങ്ങളുടെ വിലയിൽ ഗണ്യമായ കുറവ് ഉണ്ടായേക്കുമെന്നാണ് പ്രതീക്ഷ.
അതേസമയം, സ്കോച്ച് വിസ്കിക്ക് ഇന്ത്യയിൽ നിലവിലുള്ള ഉയർന്ന ഇറക്കുമതി തീരുവ വർഷങ്ങളായി ബ്രിട്ടൻ ഉന്നയിച്ച പ്രധാന വിഷയങ്ങളിലൊന്നായിരുന്നു. ബ്രിട്ടനിൽ നിന്ന് ഇറക്കുമതി ചെയ്യുന്ന സ്കോച്ച് വിസ്കിക്കും (ബ്ലെൻഡഡ് സ്കോച്ച് ഉൾപ്പെടെ) ജിന്നിനുമുള്ള ഇറക്കുമതി തീരുവ അടുത്ത 10 വർഷത്തിനുള്ളിൽ 150 ശതമാനത്തിൽ നിന്ന് 40 ശതമാനമായി കുറയ്ക്കും.
ഇതോടെ ഇന്ത്യൻ വിപണിയിൽ ഈ ഉൽപ്പന്നങ്ങളുടെ വില കുറയാൻ സാധ്യതയുണ്ട്. ബ്രാൻഡി, ടെക്വില, റം, വോഡ്ക, കോർഡിയൽ തുടങ്ങിയ മറ്റ് മദ്യവിഭാഗങ്ങൾക്കുള്ള തീരുവയും 150 ശതമാനത്തിൽ നിന്ന് 75 ശതമാനമായി കുറയ്ക്കും.
കരാറിന്റെ മറ്റൊരു പ്രധാന നേട്ടമായി, പ്രതിവർഷം 1,800 ഇന്ത്യൻ പ്രൊഫഷണലുകൾക്ക് താൽക്കാലികമായി ബ്രിട്ടനിൽ ജോലി ചെയ്യാൻ അവസരം ലഭിക്കും. ഇന്ത്യൻ ഷെഫുമാർ, യോഗ പരിശീലകർ, ശാസ്ത്രീയ സംഗീതജ്ഞർ എന്നിവരാണ് ഇതിന്റെ പ്രധാന ഗുണഭോക്താക്കൾ.
ബ്രിട്ടീഷ് ഉൽപ്പന്നങ്ങൾക്ക് ഇന്ത്യയിൽ വിപണി വികസിക്കുന്നതിനൊപ്പം ഇന്ത്യൻ കയറ്റുമതിക്കാർക്കും വലിയ അവസരമാണ് തുറക്കുന്നത്. കരാർ പ്രകാരം ഇന്ത്യയിൽ നിന്നുള്ള ഏകദേശം 99 ശതമാനം ഉൽപ്പന്നങ്ങൾ യുകെയിലേക്ക് തീരുവയില്ലാതെ കയറ്റുമതി ചെയ്യാനാകും. ഇത് ഇന്ത്യൻ ഉൽപ്പന്നങ്ങളുടെ മത്സരശേഷി വർധിപ്പിക്കുമെന്നാണ് പ്രതീക്ഷ.
ഈ മേഖലകളിലെ കയറ്റുമതി വർധിക്കുന്നത് തൊഴിലവസരങ്ങൾ സൃഷ്ടിക്കാനും വിദേശനാണ്യ വരുമാനം ഉയർത്താനും സഹായിക്കുമെന്നാണ് കേന്ദ്ര സർക്കാർ പ്രതീക്ഷിക്കുന്നത്. കരാർ നിലവിൽ വന്നതിന്റെ പിറ്റേന്ന് മുതൽ കടകളിൽ വില കുറയുമെന്ന് പ്രതീക്ഷിക്കേണ്ടതില്ല. ഇറക്കുമതി തീരുവയിലെ മാറ്റം, പുതിയ സ്റ്റോക്ക് എത്തുന്ന സമയം, വിതരണക്കാരുടെ വിലനയം, നികുതി ഘടന എന്നിവയെല്ലാം വിലയെ സ്വാധീനിക്കും. അതിനാൽ പല ഉൽപ്പന്നങ്ങളുടെയും വിലക്കുറവ് അടുത്ത മാസങ്ങളിലോ വർഷങ്ങളിലോ മാത്രമേ പ്രകടമാകൂ.
ഇന്ത്യ-യുകെ സ്വതന്ത്ര വ്യാപാര കരാർ ഇരു രാജ്യങ്ങളും തമ്മിലുള്ള വ്യാപാര-സാമ്പത്തിക ബന്ധം കൂടുതൽ ശക്തമാക്കുന്ന നിർണായക നീക്കമായാണ് വിലയിരുത്തപ്പെടുന്നത്. കയറ്റുമതി, നിക്ഷേപം, സേവനമേഖല, തൊഴിൽ, ഉപഭോക്തൃ വിപണി തുടങ്ങി നിരവധി മേഖലകളിൽ ഈ കരാർ ദീർഘകാല പ്രതിഫലം സൃഷ്ടിക്കുമെന്നാണ് പ്രതീക്ഷിക്കുന്നത്.
Content Highlights: Export boost, cheaper cars & whisky: India-UK trade deal comes into effect - How India will benefit
