LIVE TV
ജനാധിപത്യ സംരക്ഷണത്തിന് എന്ന വാദം ഉയർത്തുന്നുണ്ടെങ്കിലും അമേരിക്കയുടേയും ഇസ്രയേലിന്റേയും ഇറാന് ആക്രമണത്തിന് പിന്നില് 'ക്രൂഡ് ഓയില്' ആണെന്നത് പകല്പോലെ വ്യക്തമാണ്. ഇറാനിലെ എണ്ണശേഖരം ലോകത്തെ ആകെ വ്യക്തമാക്കപ്പെട്ട എണ്ണ നിക്ഷേപത്തിന്റെ 11.82 ശതമാനമാണ്. വെനസ്വേല (17.17%)യും സൗദി അറേബ്യ (15.14%)യും കഴിഞ്ഞ് ലോകത്ത് ഏറ്റവും കൂടുതൽ എണ്ണശേഖരണമുള്ള രാജ്യങ്ങളിൽ മൂന്നാം സ്ഥാനത്ത് ഇറാൻ എന്നത് ആഗോള ഊർജ്ജരാഷ്ട്രീയത്തിൽ ആ രാജ്യത്തിന്റെ പ്രാധാന്യം എത്ര വലുതാണെന്ന് വ്യക്തമാക്കുന്നു. കാനഡ, ഇറാഖ്, യുഎഇ, കുവൈത്ത്, അമേരിക്ക തുടങ്ങിയ രാജ്യങ്ങളും എണ്ണശേഖരത്തിൽ മുൻനിരയിൽ നിൽക്കുന്നുണ്ടെങ്കിലും, പശ്ചിമേഷ്യൻ മേഖലയുടെ കേന്ദ്രീകൃത സ്വാധീനം ഇന്നും നിർണായകമാണ്.
നിലവിലെ യുദ്ധസാഹചര്യവും എണ്ണരാഷ്ട്രീയവും
ഇറാൻ–ഇസ്രായേൽ സംഘർഷവും അതിൽ അമേരിക്കയുടെ ഇടപെടലും ശക്തമാകുന്ന സാഹചര്യത്തിൽ, ആഗോള എണ്ണവിപണിയിൽ വലിയ ആശങ്കയാണ് ഉയരുന്നത്. ഹോർമുസ് കടലിടുക്ക് വഴിയാണ് ലോകത്തിലെ ഏകദേശം അഞ്ചിൽ ഒരു ഭാഗം എണ്ണയാണ് കടന്നുപോകുന്നത്. ഇറാൻ ഈ കടലിടുക്കിന് സമീപം സൈനിക നിയന്ത്രണം ശക്തമാക്കുകയോ ഗതാഗതം തടസപ്പെടുത്തുകയോ ചെയ്താൽ, ആഗോള എണ്ണവിതരണ ശൃംഖലയിൽ വലിയ ആഘാതം ഉണ്ടാകാൻ സാധ്യതയുണ്ട്. ഇതോടെ ക്രൂഡ് ഓയിൽ വില കുത്തനെ ഉയരുകയും, ഇന്ധന വിലവർധനവിലൂടെ ലോക സാമ്പത്തിക വ്യവസ്ഥകളിൽ പണപ്പെരുപ്പ സമ്മർദ്ദം ശക്തമാകുകയും ചെയ്യും.
അമേരിക്കയുടെ തന്ത്രപരമായ ലക്ഷ്യങ്ങൾ
ഇറാനെ നിയന്ത്രണത്തിലാക്കുകയോ അതിന്റെ എണ്ണ കയറ്റുമതിയെ പരിമിതപ്പെടുത്തുകയോ ചെയ്യാൻ അമേരിക്കയ്ക്ക് കഴിഞ്ഞാൽ, വെനസ്വേല (17.17%), ഇറാൻ (11.82%), അമേരിക്ക (4.74%) എന്നീ മൂന്ന് രാജ്യങ്ങളുടെ എണ്ണശേഖരങ്ങൾ ചേർന്ന് ലോകത്തിലെ ഏകദേശം 34 ശതമാനം ക്രൂഡ് ഓയില് നേരിട്ടോ പരോക്ഷമായോ അമേരിക്കൻ സ്വാധീനത്തിലാകുമെന്ന വിലയിരുത്തലുകൾ ഉയരുന്നു. ഇത് ആഗോള എണ്ണവില നിർണയത്തിൽ അമേരിക്കയ്ക്ക് വലിയ നിയന്ത്രണശേഷി നൽകും. കൂടാതെ ചൈന, ഇന്ത്യ പോലുള്ള വലിയ എണ്ണ ഇറക്കുമതി രാജ്യങ്ങളോട് രാഷ്ട്രീയവും സാമ്പത്തികവുമായ സമ്മർദ്ദം ചെലുത്താനുള്ള തന്ത്രപരമായ ആയുധമായും ഇത് മാറാം.
വിപണിയിലെ പ്രതിഫലനങ്ങൾ
നിലവിലെ യുദ്ധഭീഷണി മൂലം ഇതിനകം തന്നെ ക്രൂഡ് ഓയിൽ വിലയിൽ വർധനവ് രേഖപ്പെടുത്തി തുടങ്ങി. സ്വർണവും വെള്ളിയും പോലുള്ള സുരക്ഷിത നിക്ഷേപങ്ങളിലേക്കുള്ള ഒഴുക്ക് തുടർന്നതോടെ ഇവയുടേയും വില ഉയർന്നു. മറുപക്ഷത്ത് ഓഹരിവിപണികള് കനത്ത ഇടിവാണ് നേരിട്ടുകൊണ്ടിരിക്കുന്നത്.
ഇന്ത്യയ്ക്കും ആശങ്ക
എണ്ണവില ഉയരുന്നത് പ്രത്യേകിച്ച് ഇറക്കുമതി ആശ്രിത രാജ്യങ്ങളായ ഇന്ത്യയ്ക്ക് വലിയ സാമ്പത്തിക സമ്മർദ്ദം സൃഷ്ടിക്കും. രൂപയുടെ മൂല്യത്തിലും പണപ്പെരുപ്പ നിരക്കിലും ഇതിന്റെ പ്രതിഫലം കാണാൻ സാധ്യതയുണ്ട്.
അതേസമയം ലോകത്തിലെ 66 ശതമാനം എണ്ണശേഖരങ്ങൾ മറ്റു രാജ്യങ്ങളിലായി ചിതറിക്കിടക്കുന്നതിനാല് ഒരൊറ്റ ശക്തിക്ക് എണ്ണവിപണി പൂർണ്ണമായി നിയന്ത്രിക്കുക എളുപ്പമല്ല. സൗദി അറേബ്യ, റഷ്യ, യുഎഇ, ഇറാഖ് തുടങ്ങിയ രാജ്യങ്ങൾ അവരുടെ ഉത്പാദന നയങ്ങളിലൂടെ വിപണി തുലനം നിലനിർത്താൻ ശ്രമിക്കുമ്പോൾ, ചൈനയും യൂറോപ്യൻ രാജ്യങ്ങളും ഊർജ്ജസുരക്ഷ ഉറപ്പാക്കാൻ മറ്റ് വിതരണ മാർഗങ്ങൾ തേടുകയാണ്. എന്നാല് എണ്ണ വിപണിയിലേയും നിർണ്ണായക ശക്തിയായി മാറാന് അമേരിക്കയ്ക്ക് സാധിക്കും.
ചുരുക്കത്തില് ഇറാനുമായി ബന്ധപ്പെട്ട യുദ്ധസാഹചര്യം പ്രാദേശിക സംഘർഷം മാത്രമല്ല അത് ആഗോള ഊർജ്ജരാഷ്ട്രീയത്തിന്റെ ഭാവിയെ നിർണയിക്കുന്ന നിർണായക ഘടകമായി മാറുകയാണ്. എണ്ണവിതരണ വഴികൾ, വിപണി നിയന്ത്രണം, മഹാശക്തികളുടെ തന്ത്രപരമായ നീക്കങ്ങൾ എന്നിവയുടെ സംഗമസ്ഥാനത്ത് നിൽക്കുന്ന ഈ പ്രതിസന്ധി, അടുത്ത വർഷങ്ങളിലെ ലോക സാമ്പത്തികവും രാഷ്ട്രീയവുമായ സമവാക്യങ്ങളെ രൂപപ്പെടുത്താൻ സാധ്യതയുണ്ട്.
Content Highlights: Escalating tensions involving Venezuela and Iran could shift global oil power dynamics, potentially increasing US influence over crude supply
