LIVE TV
ഇറാന് കപ്പലുകള്ക്ക് മേല് അമേരിക്ക ഏര്പ്പെടുത്തിയ ഉപരോധം തടസ്സപ്പെടുത്തിയാല് ഒമാനെതിരെ കടുത്ത സൈനിക നടപടി സ്വീകരിക്കുമെന്ന് ഡോണള്ഡ് ട്രംപിന്റെ മുന്നറിയിപ്പ്. ഹോര്മൂസ് കടലിടുക്കിലൂടെ സഞ്ചരിക്കുന്ന ഇറാന് കപ്പലുകള്ക്കാണ് അമേരിക്ക ഉപരോധം ഏര്പ്പെടുത്തിയിരിക്കുന്നത്. ഒമാനെതിരെ ബോംബാക്രമണം നടത്തുമെന്ന് ട്രംപ് ഭീഷണിപ്പെടുത്തിയതായി ഫോക്സ് ന്യൂസ് റിപ്പോര്ട്ട് ചെയ്തു. ഇറാനുമേല് സമ്മര്ദം ചെലുത്തുന്നതിന്റെ ഭാഗമായാണ് ഉപരോധം തുടരുന്നതെന്നും സംഘര്ഷം പരിഹരിക്കാന് തനിക്ക് യാതൊരു തിടുക്കവുമില്ലെന്നും ട്രംപ് പറഞ്ഞു.
യുഎസ്-ഇറാന് യുദ്ധം ഏകദേശം ആറ് മാസമായി തുടരുകയാണ്. സമാധാന ചര്ച്ചകള് തടസ്സപ്പെട്ടിരിക്കെ ഇടയ്ക്കിടെ ഏറ്റുമുട്ടലുകളും തുടരുന്നു. ഇതോടെ നിര്ണായകമായ ഹോര്മൂസ് കടലിടുക്കിലൂടെയുള്ള എണ്ണയുടെയും മറ്റ് പ്രധാന ചരക്കുകളുടെയും ഗതാഗതവും തടസ്സപ്പെട്ടിരിക്കുകയാണ്. ആഗോള ഊര്ജ വിപണിയെ സംബന്ധിച്ചിടത്തോളം ഹോര്മൂസ് കടലിടുക്ക് നിര്ണായകമായ ജലപാതയാണ്. യുദ്ധത്തിന് മുമ്പ് ലോകത്ത് വ്യാപാരം ചെയ്യപ്പെടുന്ന എണ്ണയുടെ ഏകദേശം അഞ്ചിലൊന്ന് ഈ കടലിടുക്കിലൂടെയായിരുന്നു കടന്നുപോയിരുന്നത്.
ഫെബ്രുവരി 28ന് ഇസ്രായേലും അമേരിക്കയും ഇറാനെ ആക്രമിച്ചതിന് പിന്നാലെ ഇറാന് ഈ ജലപാത അടച്ചിരുന്നു. അമേരിക്ക, ഇറാന്റെ തുറമുഖങ്ങള്ക്ക് ഏര്പ്പെടുത്തിയ ഉപരോധം പിന്വലിക്കുന്നതിന് മുമ്പ് വാണിജ്യ കപ്പല് ഗതാഗതം പുനഃസ്ഥാപിക്കുന്നതിനായി ധാരണയിലെത്താന് ശ്രമിച്ചുവരികയാണ്.
ഹോര്മൂസ് കടലിടുക്കിലൂടെയുള്ള കപ്പല് ഗതാഗതം നിയന്ത്രിക്കുന്നതിനുള്ള ഇടക്കാല ധാരണ സംബന്ധിച്ച് ഇറാന് പ്രതിനിധികള് ഒമാനുമായി ചര്ച്ച നടത്തിവരികയാണ്. എന്നാല് ഇതുസംബന്ധിച്ച് കൂടുതല് വിശദാംശങ്ങള് പുറത്തുവിട്ടിട്ടില്ല. നേരത്തെ നടന്ന ചര്ച്ചകള് പ്രകാരം, കപ്പലുകള് ഇറാനോട് ചേര്ന്നുള്ള ഒരു റൂട്ടിലൂടെ ഹോര്മൂസ് കടലിടുക്കില് പ്രവേശിക്കുകയും ഒമാനോട് ചേര്ന്നുള്ള മറ്റൊരു റൂട്ടിലൂടെ പുറത്തുകടക്കുകയും ചെയ്യുമെന്നാണ് കരുതുന്നത്. നിര്ദേശിച്ച ഇടക്കാല ധാരണ പ്രകാരം കടലിടുക്കിലൂടെ സഞ്ചരിക്കുന്ന കപ്പലുകളില് നിന്ന് പ്രത്യേക ഫീസോ ടോളോ ഈടാക്കില്ല.
ഒമാനുമായുള്ള ചര്ച്ചകള് മന്ദഗതിയിലാണ് മുന്നേറുന്നതെങ്കിലും ഹോര്മൂസ് കടലിടുക്കിലൂടെയുള്ള കപ്പല് ഗതാഗതത്തിനായി നിര്ദേശിച്ച റൂട്ടും സംയുക്ത പ്രസ്താവനയും ഉള്പ്പെടുന്ന പാക്കേജ് അന്തിമമാക്കുകയാണ് ഇറാന്റെ ലക്ഷ്യം. ഇറാന് ആണവായുധം സ്വന്തമാക്കുന്നത് തടയുക എന്നതാണ് അമേരിക്കയുടെ പ്രധാന ലക്ഷ്യമെന്ന് ട്രംപ് വീണ്ടും ആവര്ത്തിച്ചു. വാഷിങ്ടണും ടെഹ്റാനും തമ്മിലുള്ള ചര്ച്ചകള്ക്കായി നിശ്ചയിച്ചിരുന്ന 60 ദിവസത്തെ സമയപരിധി അവസാനിച്ചതിന് പിന്നാലെയാണ് ട്രംപിന്റെ പ്രസ്താവന. ഈ കാലയളവ് നീട്ടുന്നതിനെക്കുറിച്ചോ അഭിപ്രായവ്യത്യാസങ്ങള് പരിഹരിക്കുന്നതിനെക്കുറിച്ചോ ഇരു രാജ്യങ്ങളും ധാരണയിലെത്തിയിട്ടില്ല.
ഇറാനുമായി ബന്ധപ്പെട്ട സംഭവവികാസങ്ങള്ക്കിടെ, ഗാസയിലെ മറ്റൊരു പ്രാദേശിക പ്രതിസന്ധിയുമായി ബന്ധപ്പെട്ട് ട്രംപിന്റെ മരുമകനും യുഎസ് മിഡില് ഈസ്റ്റ് ചര്ച്ചകളിലെ പ്രതിനിധിയുമായ ജറാഡ് കുഷ്നര് ഇസ്രായേല് പ്രധാനമന്ത്രി ബെഞ്ചമിന് നെതന്യാഹുവുമായി ചര്ച്ച നടത്തി. ഞായറാഴ്ച ഈജിപ്തില് ഹമാസ് നേതാവ് ഖലീല് അല്-ഹയ്യയുമായി കൂടിക്കാഴ്ച നടത്തിയ കുഷ്നര്, തിങ്കളാഴ്ച നെതന്യാഹുവുമായും ചര്ച്ച നടത്തി.
ഗാസയില് വെടിനിര്ത്തല് നടപ്പാക്കുന്നതിനായി അമേരിക്ക പിന്തുണച്ചിരുന്ന 15 ഇന റോഡ് മാപ്പ് നെതന്യാഹു നിരസിച്ചതിന് പിന്നാലെയായിരുന്നു ഈ ചര്ച്ചകള്. നിരായുധീകരണം ഉള്പ്പെടെയുള്ള വ്യവസ്ഥകളുള്ള നിര്ദേശിച്ച റോഡ് മാപ്പ് അംഗീകരിക്കുന്നതായി ഹമാസ് വ്യക്തമാക്കിയിട്ടുണ്ട്. ഇസ്രായേല് സേന ഗാസയില് നിന്ന് പിന്മാറുന്നതിന് മുമ്പ് ഹമാസ് പൂര്ണമായും നിരായുധീകരിക്കണമെന്നാണ് ഇസ്രായേലിന്റെ നിലപാട്. ഇത് പ്രകാരം ഗാസയിലെ ചില മേഖലകളില് നിന്ന് ഇസ്രായേല് സൈന്യം പിന്വാങ്ങേണ്ടിവരും.
നിലവില് ഗാസയുടെ ഏകദേശം 60 ശതമാനം പ്രദേശവും ഇസ്രായേല് സേനയുടെ നിയന്ത്രണത്തിലാണ്. സൈനിക നടപടി കൂടുതല് വ്യാപിപ്പിക്കുമെന്ന് നെതന്യാഹു നേരത്തെ മുന്നറിയിപ്പ് നല്കിയിട്ടുമുണ്ട്.
Content Highlights: Trump Threatens Oman Over Strait of Hormuz Blockade as US-Iran Conflict Widens
