LIVE TV
ഏഷ്യൻ ഗെയിംസിൽ നിന്ന് ഇക്കുറി ഇന്ത്യ മടങ്ങുന്നത് നേരിയ നിരാശയോടെയാണ്. നാലാം സ്ഥാനം നിലനിർത്തിയെങ്കിലും, മെഡലുകളുടെ എണ്ണം കുറഞ്ഞു. നാല് വർഷം മുൻപ് നൂറ് മെഡൽ നേടിയ ഇന്ത്യയ്ക്ക് ഇക്കുറി പല ഇനങ്ങളിലും പിഴച്ചു. അതേസമയം പുതിയ ചില ഇനങ്ങളിൽ
ചരിത്രത്തിലാദ്യമായി മെഡൽ നേടിയ ഇന്ത്യൻ താരങ്ങൾ പുതിയ അവസരങ്ങൾ തുറന്നിട്ടുണ്ട്.
21 സ്വർണവും 27 വെള്ളിയും 37 വെങ്കലവുമടക്കം 85 മെഡലുകൾ. 2022-ൽ ഹാങ്ഷുവിൽ നേടിയ 106 മെഡലുകളിൽ നിന്ന് കുറഞ്ഞത് 21 മെഡലുകൾ. കൈവിട്ടത് ഏഴ് സ്വർണം. ഷൂട്ടിങ് റേഞ്ചിൽ തെറ്റിയ ഉന്നമാണ് തിരിച്ചടിയായത്. ഹാങ്ഷുവിൽ ഏഴ് സ്വർണം സമ്മാനിച്ചവർക്ക് ഇത്തവണ നൽകാനായത് മൂന്ന് സ്വർണം മാത്രം. പക്ഷേ ഇന്ത്യയ്ക്ക് ആദ്യ മെഡൽ സമ്മാനിച്ച വനിതാ ടീമിൽ മലയാളി വിദർശ കെ വിനോദും ഉണ്ടായിരുന്നു.
കഴിഞ്ഞ തവണ സ്വർണമില്ലാതിരുന്ന ഇടിക്കൂട്ടിൽ മൂന്നും ഗോദയിൽ രണ്ടും സ്വർണം ഇക്കുറി നേടി. കനത്ത മഴ അത്‌ലറ്റിക്സിൽ തിരിച്ചടിയായി.
അഞ്ച് മെഡൽ കുറഞ്ഞു. വനിതകളുടെ 4x400 റിലേയിൽ ഇന്ത്യ പൊന്നണിഞ്ഞു. ലോങ് ജംപിൽ ശ്രീശങ്കറും ആൻസി സോജനും നേടിയ വെള്ളിയും റിലേയിൽ ടി എസ് മനുവിന്റെ വെള്ളിയും വെങ്കലവും അത്ലറ്റിക്സിലെ മലയാളി സാന്നിധ്യമായി.
കബഡി-ക്രിക്കറ്റ്-ഹോക്കി എന്നിവയിൽ പുരുഷ വനിതാ സ്വർണമെഡലുകൾ ഇന്ത്യക്കായി. മലയാളി സാന്നിധ്യമായി ക്രിക്കറ്റ് ടീമിൽ സഞ്ജു സാംസണുണ്ടായിരുന്നു. 44 വർഷത്തെ കാത്തിരിപ്പ് അവസാനിപ്പിച്ചാണ് ഇന്ത്യൻ വനിതകൾ ഹോക്കിയിൽ സ്വർണമണിഞ്ഞത്.
അമ്പെയ്ത്ത് വ്യക്തിഗത ഇനത്തിലെ സ്വർണം നഷ്ടമായെങ്കിലും ടീമിനത്തിൽ മൂന്ന് സ്വർണം നിലനിർത്തി. കർണം മല്ലേശ്വരിക്ക് ശേഷം ഏഷ്യൻഗെയിംസിൽ ഭാരോദ്വഹനത്തിൽ മെഡൽ നേടുന്ന താരമായി മിരാബായ് ചാനു.
മാർഷ്യൽ ആർട്സിൽ സുചിക തരിയലും, സോഫ്റ്റ് ടെന്നീസിൽ ജയ് മീണയും ഏഷ്യൻ ഗെയിംസ് ചരിത്രത്തിലെ ഇന്ത്യയുടെ ആദ്യ മെഡൽ ജേതാക്കളായി.
സെയിലിങിൽ വെള്ളി നേടിയ പ്രിൻസ് കുരിശിങ്കൽ, മനു ഫ്രാൻസിസ് എന്നിവരും ഏഷ്യൻ ഗെയിംസിൽ മലയാളത്തിന്റെ അഭിമാനമുയർത്തി.
content highlights: asian games india fourth place medal tally decline unexpected achievements
