LIVE TV
ഒടുവില്‍ പ്രതീക്ഷിച്ചത് തന്നെ സംഭവിച്ചു. അന്താരാഷ്ട്ര ഫുട്‌ബോളില്‍നിന്ന് ക്രിസ്റ്റ്യാനോ റൊണാള്‍ഡോയും വിരമിച്ചു. സാമൂഹിക മാധ്യമങ്ങളില്‍ പങ്കുവെച്ച വിഡിയോയിലൂടെയായിരുന്നു പ്രഖ്യാപനം. ലോകകപ്പിന് ശേഷം ബ്രസീല്‍ താരം നെയ്മറും പിന്നാലെ മെസ്സിയും അന്താരാഷ്ട്ര ഫുട്‌ബോളില്‍നിന്ന് വിരമിച്ചിരുന്നു. ഇതിന് ശേഷമാണ് ഇതിഹാസ താരമായ ക്രിസ്റ്റിയാനോയും വിരമിക്കുന്നത്. നേരത്തെ, യുവേഫ നേഷന്‍സ് ലീഗ് ഫുട്‌ബോളില്‍ കോച്ചുമായിയുണ്ടായ അഭിപ്രായ ഭിന്നതകള്‍ക്ക് പിന്നാലെ ക്രിസ്റ്റ്യാനോ ടീം ക്യാമ്പ് വിട്ടത് വലിയ വിവാദമായിരുന്നു. ഇതോടെ താരത്തിനെതിരെ അച്ചടക്ക നടപടി സ്വീകരിച്ചു. ഒരുമാസത്തോളം വിലക്കേര്‍പ്പെടുത്തിയെങ്കിലും നവംബര്‍ വിന്‍ഡോയിലെ മത്സരങ്ങളിലേക്ക് എത്താനാകുമായിരുന്നു. 30 ദിവസത്തെ വിലക്കും 255 യൂറോ പിഴയുമാണ് ചുമത്തിയിരുന്നത്. ഇതിന് പിന്നാലെയാണ് വിരമിക്കല്‍ പ്രഖ്യാപനം എന്നത് ശ്രദ്ധേയമാണ്.
നീണ്ട കരിയറിന് വിരാമം
ദേശീയ ടീമിനായുള്ള തന്റെ 23 വര്‍ഷം നീണ്ട പ്രതാപപൂര്‍ണമായ കരിയറിനാണ് അദ്ദേഹം ഇതോടെ തിരശ്ശീലയിട്ടത്. ഈ കാലയളവില്‍ ഫുട്‌ബോള്‍ ചരിത്രത്തിലെ തന്നെ ഏറ്റവും മികച്ച കളിക്കാരില്‍ ഒരാളായി താരം സ്വയം അടയാളപ്പെടുത്തിയിരുന്നു. 2003 ഓഗസ്റ്റില്‍ കസാഖിസ്ഥാനെതിരായ മത്സരത്തില്‍ സബ്സ്റ്റിറ്റിയൂട്ടായി എത്തിയ നിരയിലാണ് ക്രിസ്റ്റ്യാനോ അന്താരാഷ്ട്ര അരങ്ങേറ്റം കുറിച്ചത്. ഇന്‍സ്റ്റാഗ്രാമില്‍ പങ്കുവെച്ച വീഡിയോ സന്ദേശത്തിലൂടെയാണ് താരം വിരമിക്കല്‍ തീരുമാനം അറിയിച്ചത്. പോര്‍ച്ചുഗലിനൊപ്പമുള്ള തന്റെ യാത്രയെ അനുസ്മരിച്ച അദ്ദേഹം, മാതൃരാജ്യത്തെ പ്രതിനിധീകരിക്കാന്‍ ലഭിച്ച അവസരത്തിന് നന്ദിയും രേഖപ്പെടുത്തി.
തന്റെ വൈകാരികമായ വിടവാങ്ങല്‍ സന്ദേശത്തില്‍, ഐക്കണിക് ആയ 7-ാം നമ്പര്‍ ജേഴ്‌സി അടുത്ത തലമുറയ്ക്ക് കൈമാറാന്‍ സമയമായെന്ന് പോര്‍ച്ചുഗീസ് ക്യാപ്റ്റന്‍ പറഞ്ഞു. തന്റെ അന്താരാഷ്ട്ര കരിയര്‍ ജീവിതത്തെ എന്നും മാറ്റിയെഴുതിയ ഒന്നായിരുന്നുവെന്ന് അദ്ദേഹം വിശേഷിപ്പിച്ചു.
'പോര്‍ച്ചുഗീസുകാരായ ജനങ്ങളോട് എനിക്ക് പറയാനുള്ളത്, നമ്മുടെ ദേശീയ ടീമിന്റെ 7-ാം നമ്പര്‍ ജേഴ്‌സി തിരിച്ചേല്‍പ്പിക്കാനുള്ള ദിവസം വന്നെത്തിയിരിക്കുന്നു. അത് എനിക്ക് മാത്രം അവകാശപ്പെട്ടതാണെന്ന് ഞാന്‍ ഒരിക്കലും കരുതിയിട്ടില്ല. എന്നാല്‍ 23 വര്‍ഷക്കാലം, അത് അണിയാനും, അതിനായി പോരാടാനും, ലോകമെമ്പാടുമുള്ള സ്റ്റേഡിയങ്ങളിലേക്ക് അത് ധരിച്ചുകൊണ്ട് ഇറങ്ങാനുമുള്ള ഭാഗ്യവും ഉത്തരവാദിത്തവും എനിക്കുണ്ടായിരുന്നു. ഇന്ന്, അത് വരുംതലമുറയ്ക്ക് കൈമാറാനുള്ള സമയം ആയിരിക്കുന്നു, ഇതൊരു എളുപ്പമുള്ള തീരുമാനമായിരുന്നില്ല, കാരണം ചില തീരുമാനങ്ങള്‍ ബുദ്ധി കൊണ്ടുമാത്രം എടുക്കുന്നതല്ല, ഹൃദയം കൊണ്ട് എടുക്കുന്നവയാണ്. 2003 ഓഗസ്റ്റില്‍ ആരംഭിക്കുകയും എന്റെ ജീവിതം എന്നെന്നേക്കുമായി മാറ്റുകയും ചെയ്ത ഒരു യാത്രയ്ക്ക് ഇവിടെ അവസാനമാകുന്നു' -ക്രിസ്റ്റ്യാനോ പറഞ്ഞു.
പോര്‍ച്ചുഗലിനായി 234 മത്സരങ്ങളില്‍ നിന്ന് 146 ഗോളുകളോടെ എക്കാലത്തെയും മികച്ച ഗോള്‍വേട്ടക്കാരനായ ക്രിസ്റ്റ്യാനോ റൊണാള്‍ഡോ, ദേശീയ ടീമിനൊപ്പമുള്ള തന്റെ യാത്ര ഗോളുകള്‍ക്കും റെക്കോര്‍ഡുകള്‍ക്കും ട്രോഫികള്‍ക്കും അപ്പുറമായിരുന്നുവെന്നും ലോകമെമ്പാടുമുള്ള ആരാധകരുമായി പങ്കുവെച്ച വൈകാരിക ബന്ധമാണ് പ്രധാനമെന്നും പറഞ്ഞു. വിജയിക്കാനും ചരിത്രം സൃഷ്ടിക്കാനും ദേശീയ ടീമിനായി ഏറ്റവും മികച്ചത് നല്‍കാനും താന്‍ എപ്പോഴും കഴിവിന്റെ പരമാവധി ശ്രമിച്ചിട്ടുണ്ടെന്ന് അദ്ദേഹം കൂട്ടിച്ചേര്‍ത്തു. 'ദേശീയ ടീമിനൊപ്പം ഞാന്‍ അനുഭവിച്ച കാര്യങ്ങളിലേക്ക് തിരിഞ്ഞുനോക്കുമ്പോള്‍, മത്സരങ്ങള്‍, ഗോളുകള്‍, റെക്കോര്‍ഡുകള്‍, അല്ലെങ്കില്‍ ട്രോഫികള്‍ എന്നിവ മാത്രമല്ല ഞാന്‍ കാണുന്നത്. ഞാന്‍ മനുഷ്യരെയാണ് കാണുന്നത്. വിദേശത്ത് ജീവിക്കുന്ന പോര്‍ച്ചുഗീസുകാര്‍ തൊണ്ണൂറ് മിനിറ്റ് നേരം തങ്ങളുടെ നാടിനോട് കുറച്ചുകൂടി അടുത്ത് നില്‍ക്കുന്നതായി അനുഭവപ്പെടുന്നത് ഞാന്‍ കാണുന്നു. ഞാന്‍ ഇതുവരെ കണ്ടിട്ടില്ലാത്ത, എന്നാല്‍ എന്റെ ജീവിതത്തിന്റെ ഭാഗമായി മാറിയ ദശലക്ഷക്കണക്കിന് പോര്‍ച്ചുഗീസുകാരെ ഞാന്‍ കാണുന്നു. കാരണം, കളിക്കളത്തിനപ്പുറം ഫുട്‌ബോള്‍ എന്നത് ആളുകളെക്കുറിച്ചുള്ള ഒന്നാണ്' -ദേശീയ ടീമിനോടുള്ള തന്റെ പ്രതിബദ്ധതയെക്കുറിച്ച് ഓര്‍മ്മിച്ചുകൊണ്ട്, പോര്‍ച്ചുഗലിനെ പ്രതിനിധീകരിക്കുമ്പോള്‍ ജയിക്കാനും മെച്ചപ്പെടാനും ചരിത്രം സൃഷ്ടിക്കാനുമുള്ള ആഗ്രഹത്താല്‍ താന്‍ എപ്പോഴും സ്വന്തം അതിരുകള്‍ക്കപ്പുറത്തേക്ക് ശ്രമിച്ചതായി ക്രിസ്റ്റ്യാനോ പറഞ്ഞു.
'ദേശീയ ടീമിനൊപ്പമുള്ള എന്റെ കരിയറിലുടനീളം, ഞാന്‍ എപ്പോഴും എന്റെ പരിധികള്‍ക്ക് അപ്പുറത്തേക്ക് സ്വയം തള്ളിവിട്ടിട്ടുണ്ട്. എനിക്ക് ജയിക്കണമായിരുന്നു. എനിക്ക് കൂടുതല്‍ മികച്ചവനാകണമായിരുന്നു. എനിക്ക് ചരിത്രം സൃഷ്ടിക്കണമായിരുന്നു. ഞാന്‍ എപ്പോഴും എന്നില്‍ നിന്ന് പരമാവധി ആവശ്യപ്പെട്ടു. എനിക്ക് എപ്പോഴും കൂടുതല്‍ വേണമായിരുന്നു. നമുക്ക് ഇനിയും മുന്നോട്ട് പോകാന്‍ കഴിയുമെന്ന് ഞാന്‍ എപ്പോഴും വിശ്വസിച്ചു. ഈ ജേഴ്‌സിക്ക് വേണ്ടി എന്റെ കൈവശമുള്ളതെല്ലാം ഞാന്‍ നല്‍കി'- അദ്ദേഹം പറഞ്ഞു. തന്റെ അന്താരാഷ്ട്ര കരിയറിലെ അവിസ്മരണീയമായ വിജയങ്ങളും കടുത്ത തോല്‍വികളും പോര്‍ച്ചുഗീസ് ഇതിഹാസം അനുസ്മരിച്ചു. തിരിച്ചടികള്‍ക്കിടയിലും രാജ്യത്തെ പ്രതിനിധീകരിക്കുന്നതിലെ അഭിമാനം തനിക്ക് ഒരിക്കലും നഷ്ടപ്പെട്ടിട്ടില്ലെന്ന് അദ്ദേഹം പറഞ്ഞു. വ്യക്തിഗത നേട്ടങ്ങളെക്കാളും റെക്കോര്‍ഡുകളെക്കാളും അര്‍ത്ഥവത്തായത് ആരാധകര്‍ക്ക് നല്‍കാന്‍ കഴിഞ്ഞ സന്തോഷമാണെന്നും അദ്ദേഹം കൂട്ടിച്ചേര്‍ത്തു.
'പൂര്‍ണ്ണത നിറഞ്ഞ ഓര്‍മ്മകളും രാത്രികളും ഉണ്ടായിരുന്നു. എനിക്ക് ഒരിക്കലും മറക്കാന്‍ കഴിയാത്ത വിജയങ്ങള്‍ ഉണ്ടായിരുന്നു. ഓര്‍ക്കുമ്പോള്‍ ഇപ്പോഴും വേദനിപ്പിക്കുന്ന തോല്‍വികള്‍ ഉണ്ടായിരുന്നു. ഞാന്‍ തെറ്റുകള്‍ വരുത്തി. ഞാന്‍ അനുഭവിച്ചു. പോര്‍ച്ചുഗീസുകാര്‍ അത്രയധികം ആഗ്രഹിച്ച കാര്യങ്ങള്‍ എനിക്ക് നല്‍കാന്‍ കഴിയാതെ പോയ നിമിഷങ്ങളും ഉണ്ടായിരുന്നു. എന്നാല്‍ ഞാന്‍ ഒരിക്കലും ഉപേക്ഷിച്ചില്ല. എല്ലാറ്റിലുമുപരി, പോര്‍ച്ചുഗലിനെ പ്രതിനിധീകരിക്കുന്നതില്‍ എനിക്ക് ഒരിക്കലും അഭിമാനം കുറഞ്ഞിട്ടില്ല' 'വര്‍ഷങ്ങള്‍ കൊണ്ട് ഞാന്‍ വളരെ ലളിതമായ ചില കാര്യങ്ങള്‍ പഠിച്ചു: ഗോളുകള്‍ മാഞ്ഞുപോകും, ട്രോഫികള്‍ മ്യൂസിയങ്ങളില്‍ അവസാനിക്കും, റെക്കോര്‍ഡുകള്‍ ഒടുവില്‍ തകര്‍ക്കപ്പെടും. എന്നാല്‍ കാലത്തിന് ഒരിക്കലും മായ്ച്ചുകളയാന്‍ കഴിയാത്ത ഒന്നുണ്ട്: ആളുകളുടെ ഹൃദയങ്ങളില്‍ നമ്മള്‍ വഹിക്കുന്ന സ്ഥാനം. ഞാന്‍ നിങ്ങളെപ്പോഴെങ്കിലും സന്തോഷിപ്പിച്ചിട്ടുണ്ടെങ്കില്‍, എന്റെ ഗോളുകളിലൊന്ന് നിങ്ങളെ ആരൈയങ്കിലും കെട്ടിപ്പിടിക്കാനോ, ഒരു ആശങ്ക മറക്കാനോ, അല്ലെങ്കില്‍ നമ്മുടെ രാജ്യത്തെയോര്‍ത്ത് അഭിമാനിക്കാനോ ഇടയാക്കിയിട്ടുണ്ടെങ്കില്‍, അതെല്ലാം അതിന് അര്‍ഹമായിരുന്നു' തന്റെ തിളങ്ങുന്ന കരിയറില്‍ അഞ്ച് ബാലണ്‍ ഡി ഓര്‍ പുരസ്‌കാരങ്ങള്‍, മൂന്ന് യുവേഫ മെന്‍സ് പ്ലെയര്‍ ഓഫ് ദി ഇയര്‍ പുരസ്‌കാരങ്ങള്‍, നാല് യൂറോപ്യന്‍ ഗോള്‍ഡന്‍ ബൂട്ടുകള്‍ എന്നിവയുള്‍പ്പെടെ നിരവധി പ്രശസ്തമായ വ്യക്തിഗത ബഹുമതികള്‍ ക്രിസ്റ്റ്യാനോ റൊണാള്‍ഡോ നേടിയിട്ടുണ്ട്.
തന്റെ വിടവാങ്ങല്‍ സന്ദേശത്തില്‍, യുവ പോര്‍ച്ചുഗീസ് ഫുട്‌ബോള്‍ താരങ്ങളോട് വലിയ സ്വപ്നങ്ങള്‍ കാണാനും ദൃഢനിശ്ചയത്തോടെ തുടരാനും രാജ്യത്തിനായി പുതിയ നാഴികക്കല്ലുകള്‍ സൃഷ്ടിക്കുന്നത് തുടരാനും അദ്ദേഹം അഭ്യര്‍ത്ഥിച്ചു. ടീമംഗങ്ങളുടെ പിന്തുണയ്ക്കും പങ്കുവെച്ച അനുഭവങ്ങള്‍ക്കും അദ്ദേഹം നന്ദി പറഞ്ഞു. 'ഒരു പോര്‍ച്ചുഗീസുകാരനായിരിക്കുക എന്നാല്‍ ഇതാണ്: നമ്മള്‍ ഒന്നിച്ച് സഹിക്കുന്നു, നമ്മള്‍ ഒന്നിച്ച് ഉയര്‍ത്തെഴുന്നേല്‍ക്കുന്നു, നമ്മള്‍ വീണ്ടും വിശ്വസിക്കുന്നു. പോര്‍ച്ചുഗലിന് എപ്പോഴും സ്വപ്നം കാണാന്‍ ധൈര്യമുള്ള യുവാക്കളെ ആവശ്യമുണ്ട്. ഒരിക്കലും വിട്ടുകൊടുക്കാത്ത കളിക്കാരെ. ആരും ഇതുവരെ എത്തിച്ചേരാത്ത ഇടങ്ങളിലേക്ക് പോകാന്‍ സാധിക്കുമെന്ന് വിശ്വസിക്കുന്ന പുതിയ തലമുറകളെ. കാരണം, പുതിയ നായകന്മാരെ സൃഷ്ടിച്ചുകൊണ്ടിരിക്കുന്ന ഒരു രാജ്യം സ്വയം വിശ്വസിക്കുന്നത് ഒരിക്കലും നിര്‍ത്താത്ത രാജ്യമാണ്' 'എന്റെ ടീമംഗങ്ങളോട്, എനിക്ക് പ്രത്യേകമായി എന്തോ പറയാനുണ്ട്. ഓരോ ഓട്ടത്തിനും, ഓരോ ആലിംഗനത്തിനും, ഓരോ വാദപ്രതിവാദങ്ങള്‍ക്കും, കളത്തിലിറങ്ങുന്നതിന് മുമ്പുള്ള ഓരോ നിശബ്ദതകള്‍ക്കും നന്ദി. നമ്മള്‍ ഒന്നിച്ച് ആഘോഷിച്ച ഓരോ വിജയത്തിനും, നമ്മളെ കൂടുതല്‍ ശക്തരാക്കിയ ഓരോ തോല്‍വിക്കും നന്ദി. നിങ്ങളുടെ ക്യാപ്റ്റനാകാനുള്ള ഭാഗ്യം എനിക്കുണ്ടായി, എന്നാല്‍ ഒരു ക്യാപ്റ്റനും തനിയെ നടക്കുന്നില്ല. നിങ്ങള്‍ എപ്പോഴും എന്റെ കഥയുടെ ഭാഗമായിരിക്കും' -ക്രിസ്റ്റിയാനോ കൂട്ടിച്ചേര്‍ത്തു.
പോര്‍ച്ചുഗലിനൊപ്പമുള്ള തന്റെ 23 വര്‍ഷത്തെ യാത്രയില്‍ പ്രധാന പങ്കുവഹിച്ച പരിശീലകര്‍, ഡയറക്ടര്‍മാര്‍, മെഡിക്കല്‍ പ്രൊഫഷണലുകള്‍, ഫിസിയോതെറാപ്പിസ്റ്റുകള്‍, കിറ്റ് മാനേജര്‍മാര്‍, മറ്റ് സപ്പോര്‍ട്ട് സ്റ്റാഫുകള്‍ എന്നിവരുടെ സംഭാവനകളെയും ക്രിസ്റ്റ്യാനോ അംഗീകരിക്കുകയും നന്ദി അറിയിക്കുകയും ചെയ്തു. 'ഈ വര്‍ഷങ്ങളിലുടനീളം എന്നോടൊപ്പം പ്രവര്‍ത്തിച്ച എല്ലാ പരിശീലകര്‍ക്കും, ഡയറക്ടര്‍മാര്‍ക്കും, ഡോക്ടര്‍മാര്‍ക്കും, ഫിസിയോതെറാപ്പിസ്റ്റുകള്‍ക്കും, കിറ്റ് മാനേജര്‍മാര്‍ക്കും, സ്റ്റാഫ് അംഗങ്ങള്‍ക്കും, മറ്റ് നിരവധി പേര്‍ക്കും, നന്ദി. നിങ്ങളില്‍ പലരും ചിത്രങ്ങളില്‍ പ്രത്യക്ഷപ്പെട്ടിട്ടില്ല, എന്നാല്‍ നിങ്ങളില്ലാതെ ആ ചിത്രങ്ങളൊന്നും സാധ്യമാകുമായിരുന്നില്ല'
തന്റെ അന്താരാഷ്ട്ര കരിയറിലുടനീളം തനിക്കൊപ്പം നില്‍ക്കുകയും ത്യാഗങ്ങള്‍ സഹിക്കുകയും ചെയ്ത കുടുംബത്തിനും അദ്ദേഹം നന്ദി രേഖപ്പെടുത്തി. 'എന്റെ കുടുംബത്തിന്… ഈ സ്വപ്നം എന്നോടൊപ്പം പങ്കുവെച്ചതിന് നന്ദി. എന്റെ അഭാവങ്ങളും ത്യാഗങ്ങളും, കൂടാതെ നിങ്ങള്‍ക്ക് അവകാശപ്പെട്ട എന്റെ ജീവിതത്തിലെ സമയം ദേശീയ ടീമിനായി നല്‍കേണ്ടി വന്ന നിമിഷങ്ങളും മനസ്സിലാക്കിയതിന് നന്ദി. ഞാന്‍ ഇത്രയും ദൂരം എത്തിയെങ്കില്‍, അത് നമ്മള്‍ എപ്പോഴും കൈകോര്‍ത്ത് നടന്നതുകൊണ്ടാണ്,' പോര്‍ച്ചുഗലിന്റെ ദേശീയ ഗാനാലാപന സമയത്തെ വൈകാരിക അന്തരീക്ഷത്തെക്കുറിച്ചും ഗാലറിയില്‍ ഒന്നിച്ചുനില്‍ക്കുന്ന ആരാധകരെക്കുറിച്ചും ക്രിസ്റ്റ്യാനോ വികാരഭരിതനായി സംസാരിച്ചു.
'പോര്‍ച്ചുഗലിലെ ജനങ്ങളോട്… ലോകത്ത് നിങ്ങള്‍ എവിടെയായിരുന്നാലും, ഓരോ പോര്‍ച്ചുഗീസുകാരനോടും എനിക്ക് അവസാനമായി ഒരു കാര്യം പറയാനുണ്ട്: എന്റെ ബാക്കി ജീവിതകാലം മുഴുവന്‍ ഞാന്‍ ഒപ്പം കൊണ്ടുനടക്കുന്ന ഒരു ചിത്രമുണ്ട്. നമ്മുടെ ദേശീയ ഗാനം ആരംഭിക്കുന്ന നിമിഷം. ഞാന്‍ ചുറ്റും നോക്കുന്നു. എന്റെ ടീമംഗങ്ങളെ ഞാന്‍ കാണുന്നു. ഞാന്‍ ഗാലറികള്‍ കാണുന്നു. കുട്ടികളെയും അമ്മമാരെയും അച്ഛന്മാരെയും മുത്തശ്ശിമാരെയും ഞാന്‍ കാണുന്നു. ഇവിടെയെത്താന്‍ മാത്രം ദൂരം സഞ്ചരിച്ച പോര്‍ച്ചുഗീസുകാരെ ഞാന്‍ കാണുന്നു. ആ ഏതാനും മിനിറ്റുകള്‍ക്കുള്ളില്‍, നമ്മുടെ വ്യത്യാസങ്ങളെല്ലാം അപ്രത്യക്ഷമാകുന്നു. ക്ലബ്ബുകളില്ല. നിറങ്ങളില്ല. ക്ലാസുകളില്ല. തൊഴിലുകളില്ല. അഭിപ്രായങ്ങളില്ല. ഒരൊറ്റ വികാരം മാത്രം. പോര്‍ച്ചുഗല്‍. എന്റെ ബാക്കി ജീവിതകാലം മുഴുവന്‍ ഞാന്‍ കൊണ്ടുനടക്കുന്ന വികാരം അതാണ്.'
തന്റെ വിടവാങ്ങല്‍ സന്ദേശം അവസാനിപ്പിച്ചുകൊണ്ട്, പോര്‍ച്ചുഗലിനൊപ്പം കളിക്കളത്തിലെ തന്റെ യാത്ര തലയുയര്‍ത്തിപ്പിടിച്ച് അവസാനിപ്പിക്കുകയാണെന്നും മാതൃരാജ്യത്തെ പ്രതിനിധീകരിക്കാന്‍ കഴിഞ്ഞതാണ് തന്റെ കരിയറിലെ ഏറ്റവും വലിയ നേട്ടമെന്നും ക്രിസ്റ്റ്യാനോ പറഞ്ഞു. അന്താരാഷ്ട്ര ഫുട്‌ബോളില്‍ നിന്ന് പിന്മാറിയെങ്കിലും ദേശീയ ടീമിനെ വീണ്ടും പിന്തുണയ്ക്കുന്നത് തുടരുമെന്ന് അദ്ദേഹം ആരാധകര്‍ക്ക് ഉറപ്പ് നല്‍കി.
'ഇന്ന്, ദേശീയ ടീമിനൊപ്പമുള്ള കളിക്കളത്തിലെ എന്റെ യാത്ര അവസാനിക്കുന്നു. ഞാന്‍ നടന്നുവന്ന വഴികളില്‍ അഭിമാനിച്ചുകൊണ്ട്, പോര്‍ച്ചുഗലിനായി എന്റെ കൈവശമുള്ളതെല്ലാം നല്‍കി എന്ന ബോധ്യത്തോടെ തലയുയര്‍ത്തിപ്പിടിച്ചാണ് ഞാന്‍ മടങ്ങുന്നത്. എന്നാല്‍ ഞാന്‍ നിങ്ങളിലൊരാളല്ലാതായി തീരില്ല. ഞാന്‍ തുടര്‍ന്നും സഹിക്കുകയും, ആര്‍ത്തുവിളിക്കുകയും, ഓരോ പോര്‍ച്ചുഗീസ് വിജയങ്ങളും ആഘോഷിക്കുകയും ചെയ്യും' 'ലോകത്തിലെ ഏറ്റവും മികച്ച കളിക്കാരനാകാന്‍ ഞാന്‍ എന്റെ ജീവിതം മാറ്റിവെച്ചു. ഇന്ന്, ലോകത്തിലെ ഏറ്റവും മികച്ച രാജ്യത്തെ പ്രതിനിധീകരിക്കാനുള്ള ബഹുമതി നേടിയതാണ് എന്റെ ഏറ്റവും വലിയ വിജയമെന്ന് ഞാന്‍ തിരിച്ചറിയുന്നു. ഈ 23 വര്‍ഷങ്ങള്‍ക്ക് നന്ദി. എന്നില്‍ വിശ്വസിച്ചതിന് നന്ദി. മദേരയില്‍ ഒരു ചെറിയ കുട്ടിയായി പന്തിന് പിന്നാലെ ഓടിയപ്പോള്‍ തുടങ്ങിയ ഒരു സ്വപ്നം ജീവിക്കാന്‍ എന്നെ അനുവദിച്ചതിന് നന്ദി. 7-ാം നമ്പര്‍ ജേഴ്‌സി അവിടെത്തന്നെയുണ്ടാകും; അത് അണിഞ്ഞതിലെ അഭിമാനം എന്നും എന്റേതായിരിക്കും. പോര്‍ച്ചുഗല്‍ എപ്പോഴും എന്റെ ഭാഗമായിരിക്കും. എന്നും എപ്പോഴും' -ഇങ്ങനെയാണ് , ക്രിസ്റ്റ്യാനോ റൊണാള്‍ഡോ സന്ദേശം അവസാനിപ്പിച്ചത്.
content highlights: Portugal football legend Cristiano Ronaldo announces retirement from international football
