LIVE TV
വെസ്റ്റ് ഇൻഡീസ് ഓൾറൗണ്ടറും കൊൽക്കത്ത നൈറ്റ് റൈഡേഴ്സിന്റെ ഇതിഹാസ താരവുമായ ആന്ദ്രേ റസ്സൽ ഇന്ത്യൻ പ്രീമിയർ ലീഗ് മത്സരങ്ങളിൽ നിന്ന് വിരമിക്കൽ പ്രഖ്യാപിച്ചു. 14 സീസൺ നീണ്ട ഐപിഎൽ കരിയറിനാണ് റസ്സൽ വിരാമം കുറിച്ചത്. കൊൽക്കത്ത നൈറ്റ് റൈഡേഴ്സിനൊപ്പം 12 സീസൺ ചെലവഴിച്ച റസ്സൽ മറ്റൊരു ഫ്രാഞ്ചൈസിക്ക് വേണ്ടി ഇനി കളിക്കാനില്ലെന്ന് തീരുമാനിച്ചെന്ന് സോഷ്യൽ മീഡിയയിലൂടെ അറിയിച്ചു.
മറ്റ് ടീമുകളുടെ ജേഴ്‌സിയിൽ തന്നെ കാണുന്നത് വിചിത്രമായി തോന്നിയെന്നും അത് തനിക്ക് ഉറക്കമില്ലാത്ത രാത്രികൾ നൽകിയെന്നും ഓൾറൗണ്ടർ പറഞ്ഞു. അതേസമയം കൊൽക്കത്ത നൈറ്റ് റൈഡേഴ്സിനൊപ്പം അടുത്ത സീസണിൽ പുതിയ റോളിൽ താനെത്തുമെന്നും റസ്സൽ വ്യക്തമാക്കി. വരാനിരിക്കുന്ന ഐപിഎൽ 2026 സീസണിൽ കൊൽക്കത്ത നൈറ്റ് റൈഡേഴ്സിന്റെ പുതിയ പവർ കോച്ചായാണ് റസ്സൽ നിയമിക്കപ്പെട്ടത്.
കഴിഞ്ഞ സീസണിൽ റസ്സലിന് പ്രതീക്ഷയ്ക്കൊത്ത പ്രകടനം പുറത്തെടുക്കാൻ സാധിച്ചിരുന്നില്ല. പിന്നാലെ ഐപിഎൽ 2026 താരലേലത്തിന് മുൻപേ 37കാരനായ റസലിനെ കൊൽക്കത്ത റിലീസ് ചെയ്തിരുന്നു. സൂപ്പർ താരത്തിന് വേണ്ടി നിരവധി ടീമുകൾ രംഗത്തെത്തുമെന്ന് പ്രതീക്ഷിച്ചിരിക്കവേയാണ് അപ്രതീക്ഷിത പ്രഖ്യാപനം.
2012ൽ ഡൽഹി ഡെയർ ഡെവിൾസിലൂടെ ഐപിഎല്ലിൽ അരങ്ങേിയ റസ്സൽ 2014 മുതൽ കൊൽക്കത്ത നൈറ്റ് റൈഡേഴ്സിന്റെ ഭാഗമാണ്. 140 മത്സരങ്ങളിൽ കളിച്ച റസ്സൽ 174 സ്ട്രൈക്ക് റേറ്റിൽ 2651 റൺസ് അടിച്ചെടുത്തു. കൂടെ 123 വിക്കറ്റുകളും സ്വന്തമാക്കി. ഐപിഎല്ലിലെ എക്കാലത്തെയും മികച്ച താരങ്ങളിൽ ഒരാളായാണ് റസ്സലിനെ കണക്കാക്കുന്നത്.
Content Highlights: Andre Russell Announces IPL Retirement, will be KKR’s ‘power coach’
