LIVE TV
വൈദ്യുതി ബില്‍ ഓരോ മാസവും കുടുംബ ബജറ്റിനെ ബാധിക്കുന്നുണ്ടോ? ചില ശീലങ്ങളില്‍ മാറ്റം വരുത്തിയാല്‍ വൈദ്യുതി ഉപഭോഗം കുറയ്ക്കാനും പണം ലാഭിക്കാനും കഴിയും. എസി, ഫ്രിഡ്ജ്, വാഷിങ് മെഷീന്‍, ഫാന്‍ തുടങ്ങിയ ഉപകരണങ്ങള്‍ ഉപയോഗിക്കുന്ന രീതിയില്‍ ചെറിയ മാറ്റങ്ങള്‍ വരുത്തുന്നതിലൂടെ വൈദ്യുതി പാഴാകുന്നത് തടയാം. വീട്ടില്‍ പരീക്ഷിക്കാവുന്ന പത്ത് എളുപ്പവഴികള്‍ ഇതാ.
മുറിയില്‍ ആരുമില്ലെങ്കിലും ഫാനും ലൈറ്റും ഓണാക്കി വയ്ക്കുന്ന ശീലം പല വീടുകളിലുമുണ്ട്. മുറിയില്‍നിന്ന് പുറത്തുപോകുമ്പോള്‍ ഇവയൊക്കെ ഓഫ് ചെയ്യുന്നത് വൈദ്യുതി ലാഭിക്കാന്‍ സഹായിക്കും. ടിവി, കമ്പ്യൂട്ടര്‍, മറ്റ് ഇലക്ട്രോണിക് ഉപകരണങ്ങള്‍ എന്നിവ ഉപയോഗശേഷം സ്റ്റാന്‍ഡ്ബൈ മോഡില്‍ ഇടാതെ പൂര്‍ണമായി ഓഫ് ചെയ്യുന്നത് നല്ലതാണ്.
വീട്ടിലെ പഴയ ബള്‍ബുകള്‍ക്ക് പകരം എല്‍ഇഡി ബള്‍ബുകള്‍ ഉപയോഗിക്കുന്നത് വൈദ്യുതി ഉപഭോഗം കുറയ്ക്കാന്‍ സഹായിക്കും. ഒരേപോലുള്ള പ്രകാശം നല്‍കാന്‍ സാധാരണ ഇന്‍കാന്‍ഡസെന്റ് ബള്‍ബുകളേക്കാള്‍ വളരെ കുറച്ച് വൈദ്യുതി മതി എല്‍ഇഡി ബള്‍ബുകള്‍ക്ക്. കുറേ കാലത്തേക്ക് ഉപയോഗിക്കാനാകുമെന്നതും ഇവയുടെ പ്രത്യേകതയാണ്.
മുറി വേഗത്തില്‍ തണുപ്പിക്കാനായി എസിയുടെ താപനില വളരെ കുറച്ച് വയ്ക്കാറുണ്ടോ?. എങ്കില്‍ ഇങ്ങനെ ചെയ്യുന്നത് വൈദ്യുതി ഉപഭോഗം വര്‍ധിപ്പിക്കാം. 24-26 ഡിഗ്രി സെല്‍ഷ്യസില്‍ എസി ക്രമീകരിക്കുന്നതാണ് എപ്പോഴും നല്ലത്. എസി പ്രവര്‍ത്തിക്കുമ്പോള്‍ വാതിലുകളും ജനലുകളും അടച്ചിടുക. അതുപോലെ കൃത്യമായ ഇടവേളകളില്‍ എസിയുടെ ഫില്‍റ്റര്‍ വൃത്തിയാക്കിവയ്ക്കുന്നത് എസിയുടെ കാര്യക്ഷമത നിലനിര്‍ത്താന്‍ സഹായിക്കും.
ആവശ്യത്തിനായി മാത്രം ഫ്രിഡ്ജ് തുറക്കാന്‍ ശ്രദ്ധിക്കുക. ഫ്രിഡ്ജിന്റെ ഡോര്‍ ദീര്‍ഘനേരം തുറന്നിടുന്നത് ഒഴിവാക്കണം. ഓരോ തവണയും വാതില്‍ തുറക്കുമ്പോള്‍ തണുത്ത വായു പുറത്തുപോകുകയും ഫ്രിഡ്ജിനുള്ളിലെ ആവശ്യമായ താപനില നിലനിര്‍ത്താന്‍ അതിന് കൂടുതല്‍ പ്രവര്‍ത്തിക്കേണ്ടിവരികയും ചെയ്യും. അതുപോലെ ഫ്രിഡ്ജില്‍ സാധനങ്ങള്‍ അമിതമായി നിറയ്ക്കാതിരിക്കുക.
കുറച്ച് വസ്ത്രങ്ങള്‍ക്കായി വാഷിങ് മെഷീന്‍ ആവര്‍ത്തിച്ച് പ്രവര്‍ത്തിപ്പിക്കുന്നതിനുപകരം, അനുയോജ്യമായ അളവില്‍ വസ്ത്രങ്ങള്‍ ഒരുമിച്ച് അലക്കാം. വസ്ത്രങ്ങളുടെ അളവും അഴുക്കിന്റെ തോതും അനുസരിച്ച് വാഷിങ് മോഡ് തിരഞ്ഞെടുക്കാം. അനാവശ്യമായി കൂടുതല്‍ സമയത്തേക്കുള്ള വാഷിങ് സൈക്കിളുകള്‍ ഒഴിവാക്കുന്നതും സഹായകരമാണ്.
മൊബൈല്‍ ഫോണ്‍ ചാര്‍ജ് ചെയ്തശേഷവും ചാര്‍ജര്‍ പ്ലഗില്‍ തന്നെ കണക്ട് ചെയ്തിടുന്ന ശീലം ഒഴിവാക്കുക. ഉപയോഗിക്കാത്ത ചില ഇലക്ട്രോണിക് ഉപകരണങ്ങള്‍ സ്റ്റാന്‍ഡ്ബൈ മോഡില്‍ ചെറിയ അളവില്‍ വൈദ്യുതി ഉപയോഗിച്ചേക്കാം. അതിനാല്‍ ആവശ്യത്തിന് മാത്രം ഉപകരണങ്ങള്‍ പ്രവര്‍ത്തിപ്പിക്കുകയും ഉപയോഗശേഷം സുരക്ഷിതമായി ഓഫ് ചെയ്യുകയും ചെയ്യാം.
പാചകം ചെയ്യുമ്പോള്‍ ആവശ്യത്തിന് വെള്ളവും അനുയോജ്യമായ പാത്രങ്ങളും ഉപയോഗിക്കുന്നത് സമയം ലാഭിക്കാന്‍ സഹായിക്കും. പ്രഷര്‍ കുക്കര്‍ ഉപയോഗിക്കുന്നതിലൂടെ പല വിഭവങ്ങളും വേഗത്തില്‍ പാകം ചെയ്യാം. ഇത് പാചകത്തിനാവശ്യമായ ഇന്ധനവും സമയവും കുറയ്ക്കാന്‍ സഹായിക്കും. വൈദ്യുത ഉപകരണങ്ങള്‍ ഉപയോഗിച്ചുള്ള പാചകരീതികള്‍ പരമാവധി കുറയ്ക്കാന്‍ ശ്രമിക്കുക.
വെള്ളം ചൂടാവാനായി ഗീസര്‍ ദീര്‍ഘനേരം പ്രവര്‍ത്തിപ്പിക്കുന്നത് ഒഴിവാക്കാം. ആവശ്യത്തിന് മുമ്പ് മാത്രം ഓണ്‍ ചെയ്യുകയും വെള്ളം ചൂടായിക്കഴിഞ്ഞാല്‍ ഓഫ് ചെയ്യുകയും ചെയ്യുക. വെള്ളം ചൂടാക്കുന്ന ഉപകരണങ്ങള്‍ ഉപയോഗിക്കുമ്പോള്‍ സുരക്ഷയ്ക്കും മുന്‍ഗണന നല്‍കണം.
പകല്‍സമയത്ത് ആവശ്യത്തിന് സൂര്യപ്രകാശം ലഭിക്കുന്ന മുറികളില്‍ ലൈറ്റുകള്‍ തെളിക്കേണ്ട സാഹചര്യം കുറവായിരിക്കും. ജനലുകളും കര്‍ട്ടനുകളും അനുയോജ്യമായി ക്രമീകരിച്ച് പ്രകൃതിദത്ത വെളിച്ചവും വായുസഞ്ചാരവും ഉപയോഗപ്പെടുത്താം.
പുതിയ ഫ്രിഡ്ജ്, എസി, ഫാന്‍ തുടങ്ങിയവ വാങ്ങുമ്പോള്‍ ബ്യൂറോ ഓഫ് എനര്‍ജി എഫിഷ്യന്‍സി (BEE) സ്റ്റാര്‍ ലേബലും ഉപകരണത്തിന്റെ വൈദ്യുതി ഉപഭോഗ വിവരങ്ങളും പരിശോധിക്കുക. ഉപകരണത്തിന്റെ വില മാത്രം നോക്കാതെ അതിന്റെ വൈദ്യുതി ഉപഭോഗവും കണക്കിലെടുക്കുക.
Content Highlights :You can prevent electricity wastage by making minor adjustments to how you use appliances like air conditioners, refrigerators, washing machines, and fans. Here are ten simple methods you can try at home
