LIVE TV
നെഞ്ചുവേദനയില്ലെങ്കില്‍ ഹൃദയത്തിന് പ്രശ്‌നമില്ലെന്ന് കരുതുന്നുണ്ടോ?. ഹൃദ്രോഗങ്ങള്‍ പലപ്പോഴും വ്യക്തമായ ലക്ഷണങ്ങളില്ലാതെയാണ് അപകടാവസ്ഥയിലേക്ക് എത്തുന്നത്. ലോകത്ത് ഓരോ വര്‍ഷവും 1.79 കോടി പേരുടെ മരണത്തിന് കാരണമാകുന്നത് ഹൃദയത്തെയും രക്തക്കുഴലുകളെയും ബാധിക്കുന്ന രോഗങ്ങളാണെന്നാണ് ലോകാരോഗ്യ സംഘടനയുടെ കണക്കുകള്‍ പറയുന്നത്. ഹൃദയാഘാതത്തിന്റെയും പക്ഷാഘാതത്തിന്റെയും ലക്ഷണങ്ങള്‍ തിരിച്ചറിയേണ്ടത് ജീവന്‍ രക്ഷിക്കാന്‍ നിര്‍ണായകമാണ്.
ലോകത്ത് ഏറ്റവും കൂടുതല്‍ മരണങ്ങള്‍ക്ക് കാരണമാകുന്ന രോഗവിഭാഗമാണ് ഹൃദയസംബന്ധമായ രോഗങ്ങള്‍. ഹൃദയത്തെ മാത്രമല്ല ശരീരത്തിന്റെ വിവിധ ഭാഗങ്ങളിലേക്ക് രക്തമെത്തിക്കുന്ന രക്തക്കുഴലുകളെയും ബാധിക്കുന്ന രോഗങ്ങള്‍ ഇതില്‍ ഉള്‍പ്പെടുന്നു. ഉയര്‍ന്ന രക്തസമ്മര്‍ദം, കൊളസ്ട്രോള്‍, പ്രമേഹം, പുകവലി, വ്യായാമക്കുറവ്, അനാരോഗ്യകരമായ ഭക്ഷണശീലം തുടങ്ങിയവ ഹൃദ്രോഗസാധ്യത വര്‍ധിപ്പിക്കാം.
ലോകാരോഗ്യ സംഘടന( WHO)യുടെ കണക്കുകള്‍ പ്രകാരം ഹൃദയസംബന്ധമായ രോഗങ്ങള്‍ മൂലമുള്ള മരണങ്ങളില്‍ മൂന്നിലൊന്ന് 70 വയസ്സിന് താഴെയുള്ളവരിലാണ് സംഭവിക്കുന്നത്. ഹൃദയാഘാതവും പക്ഷാഘാതവുമാണ് ഈ മരണങ്ങളില്‍ വലിയൊരു പങ്കിനും കാരണം. രോഗം നേരത്തേ തിരിച്ചറിയുകയും അപകടസാധ്യതകള്‍ നിയന്ത്രിക്കുകയും ചെയ്യുന്നതിലൂടെ പല സംഭവങ്ങളും തടയാനാകും.
ഹൃദയത്തിലേക്ക് രക്തമെത്തിക്കുന്ന ധമനികളില്‍ തടസ്സമുണ്ടാകുമ്പോള്‍ ഹൃദയപേശികള്‍ക്ക് ആവശ്യമായ ഓക്‌സിജന്‍ ലഭിക്കാതെ വരാം. ഇത് ഹൃദയാഘാതത്തിലേക്ക് നയിച്ചേക്കാം. താഴെ പറയുന്ന ലക്ഷണങ്ങള്‍ ശ്രദ്ധിക്കണം.
എല്ലാവരിലും ഹൃദയാഘാതം ഒരേ രീതിയിലായിരിക്കണമെന്നില്ല. സ്ത്രീകളില്‍ നെഞ്ചുവേദനയ്‌ക്കൊപ്പം ശ്വാസംമുട്ടല്‍, ഓക്കാനം, പുറംവേദന, താടിയെല്ലിലെ വേദന തുടങ്ങിയ ലക്ഷണങ്ങളും പ്രകടമാകാം. ചിലരില്‍ വ്യക്തമായ നെഞ്ചുവേദനയില്ലാതെയും ഹൃദയാഘാതം സംഭവിക്കാം.
തലച്ചോറിലേക്കുള്ള രക്തപ്രവാഹം തടസ്സപ്പെടുകയോ രക്തക്കുഴല്‍ പൊട്ടുകയോ ചെയ്യുമ്പോള്‍ പക്ഷാഘാതം സംഭവിക്കാം. ഇതിന്റെ പ്രധാന മുന്നറിയിപ്പ് ലക്ഷണങ്ങള്‍ ഇവയാണ്
ഇത്തരം ലക്ഷണങ്ങള്‍ പ്രത്യക്ഷപ്പെട്ടാല്‍ അവ തനിയെ മാറുമെന്ന് കരുതി കാത്തിരിക്കരുത്. ഉടന്‍ അടിയന്തര ചികിത്സ തേടണം. ലക്ഷണങ്ങള്‍ കുറച്ചുസമയത്തിനകം മാറിയാലും വൈദ്യസഹായം തേടേണ്ടത് പ്രധാനമാണ്.
രക്തക്കുഴലുകളില്‍ കൊഴുപ്പും മറ്റ് വസ്തുക്കളും അടിഞ്ഞുകൂടി രക്തപ്രവാഹം കുറയുന്ന അവസ്ഥ വര്‍ഷങ്ങളോളം വ്യക്തമായ ലക്ഷണങ്ങളില്ലാതെ തുടരാം. ചിലരില്‍ ഹൃദയാഘാതമോ പക്ഷാഘാതമോ ഉണ്ടാകുമ്പോഴാണ് രോഗം ആദ്യമായി തിരിച്ചറിയുന്നത്. ഉയര്‍ന്ന രക്തസമ്മര്‍ദം, രക്തത്തിലെ പഞ്ചസാരയുടെ അളവ് വര്‍ധിക്കുക, ഉയര്‍ന്ന കൊളസ്ട്രോള്‍, അമിതവണ്ണം തുടങ്ങിയവ ഹൃദ്രോഗസാധ്യതയുടെ പ്രധാന സൂചനകളാണ്. അതിനാല്‍ ലക്ഷണങ്ങള്‍ ഇല്ലെങ്കിലും ആവശ്യമായ ആരോഗ്യപരിശോധനകള്‍ നടത്തുകയും ഡോക്ടറുടെ നിര്‍ദേശപ്രകാരം അപകടസാധ്യതകള്‍ നിയന്ത്രിക്കുകയും വേണം.
ഹൃദയസംബന്ധമായ രോഗങ്ങളുടെ അപകടസാധ്യത കുറയ്ക്കാന്‍ ദൈനംദിന ജീവിതത്തില്‍ ചില മാറ്റങ്ങള്‍ വരുത്താം.
ഉപ്പിന്റെ ഉപയോഗം നിയന്ത്രിക്കുക
ഭക്ഷണത്തില്‍ അമിതമായി ഉപ്പ് ചേര്‍ക്കുന്നത് രക്തസമ്മര്‍ദം വര്‍ധിപ്പിക്കാം. പാക്കറ്റ് ഭക്ഷണങ്ങളിലെയും സംസ്‌കരിച്ച ഭക്ഷണങ്ങളിലെയും ഉപ്പിന്റെ അളവും ശ്രദ്ധിക്കണം.
പഴങ്ങളും പച്ചക്കറികളും കഴിക്കുക
സമീകൃതാഹാരത്തിന്റെ ഭാഗമായി പഴങ്ങള്‍, പച്ചക്കറികള്‍, ധാന്യങ്ങള്‍, ആവശ്യമായ പ്രോട്ടീന്‍ എന്നിവ ഉള്‍പ്പെടുത്തുക. പൂരിത കൊഴുപ്പും അമിത പഞ്ചസാരയും അടങ്ങിയ ഭക്ഷണങ്ങളുടെ ഉപയോഗം കുറയ്ക്കുക.
വ്യായാമം ശീലമാക്കുക
ആരോഗ്യസ്ഥിതിക്ക് അനുയോജ്യമായ ശാരീരിക പ്രവര്‍ത്തനങ്ങള്‍ പതിവാക്കുക. ദീര്‍ഘനേരം ഒരേ ഇരിപ്പില്‍ തുടരുന്നത് ഒഴിവാക്കാനും ശ്രദ്ധിക്കണം.
പുകവലി ഒഴിവാക്കുക
പുകയിലയുടെ ഉപയോഗം ഹൃദയത്തിന്റെയും രക്തക്കുഴലുകളുടെയും ആരോഗ്യത്തെ ബാധിക്കുന്നു. പുകവലി ഉപേക്ഷിക്കുന്നത് ഹൃദ്രോഗസാധ്യത കുറയ്ക്കാന്‍ സഹായിക്കും.
ആരോഗ്യപരിശോധനകള്‍ നടത്തുക
രക്തസമ്മര്‍ദം, രക്തത്തിലെ പഞ്ചസാര, കൊളസ്ട്രോള്‍ തുടങ്ങിയവ ആവശ്യാനുസരണം പരിശോധിക്കുക. പ്രമേഹമോ ഉയര്‍ന്ന രക്തസമ്മര്‍ദമോ ഉള്ളവര്‍ ഡോക്ടറുടെ നിര്‍ദേശപ്രകാരം ചികിത്സയും നിരീക്ഷണവും തുടരുക.
ഹൃദയാഘാതത്തിന്റെയോ പക്ഷാഘാതത്തിന്റെയോ ലക്ഷണങ്ങള്‍ കണ്ടാല്‍ ഉടന്‍ അടിയന്തര വൈദ്യസഹായം തേടണം. സ്വയം രോഗനിര്‍ണയം നടത്തുകയോ സ്വയം ചികിത്സിച്ച് സമയം കളയുകയോ ചെയ്യരുത്. ഹൃദയസംബന്ധമായ രോഗങ്ങള്‍ ഗുരുതരമായ ആരോഗ്യപ്രശ്‌നമാണെങ്കിലും അപകടസാധ്യതകള്‍ നേരത്തേ തിരിച്ചറിയുക, ആരോഗ്യകരമായ ജീവിതശൈലി പിന്തുടരുക, ആവശ്യമായ ചികിത്സ തേടുക എന്നിവയിലൂടെ ആഘാതം കുറയ്ക്കാനാകും.
Content Highlights :Often, there are no symptoms until a heart attack or stroke occurs. Therefore, it is essential to be aware of the warning signs
