Get the latest news at
your fingertips!
Download our app now
LIVE TV
Search
മൊബൈല് ഫോണ് ഉപയോഗിക്കുമ്പോള് പല തരത്തിലുള്ള ഗുണദോഷങ്ങളുണ്ട്. അത്തരത്തില് ഫോണ് ഉപയോഗം കൂടുന്നതുകൊണ്ട് ആളുകളെ ബാധിക്കുന്ന ഒരു ശാരീരിക പ്രശ്നമാണ് 'സ്മാര്ട്ട് ഫോണ് പിങ്കി'. പേര് കേള്ക്കുമ്പോള് കൗതുകം തോന്നുമെങ്കിലും കാര്യം അത്ര നിസാരമല്ല. ഫോണ് സ്ക്രോള് ചെയ്യുമ്പോഴോ വീഡിയോകള് കാണുമ്പോഴോ സ്ക്രീന് സമയത്തെക്കുറിച്ച് ആരും ചിന്തിക്കാറില്ല. എത്ര സമയം ഫോണില് കണ്ണുനട്ട് ഇരുന്നുവെന്ന് ആലോചിച്ച് പിന്നീട് ആശങ്കപ്പെട്ടിട്ടുമുണ്ടാവും. എന്നാല് ഈ ഫോണ് പിടിക്കുന്ന നിങ്ങളുടെ വിരലുകളെക്കുറിച്ച് ചിന്തിച്ചിട്ടുണ്ടോ. ഉപയോഗം കഴിഞ്ഞ് തിരികെ ഫോണ് താഴെ വയ്ക്കുമ്പോള് ചെറുവിരലിനുണ്ടാകുന്ന വേദനയും പലരും അവഗണിക്കും.
സ്മാര്ട്ട്ഫോണ് ഉപയോഗംകൊണ്ട് ചെറുവിരലിനെ ബാധിക്കുന്ന ആരോഗ്യ അവസ്ഥയാണ് സ്മാര്ട്ട്ഫോണ് പിങ്കി. ഫോണ് ഉപയോഗിക്കുമ്പോള് തള്ളവിരല് മിക്ക ചലനങ്ങളും കൈകാര്യം ചെയ്യും.അപ്പോള് ഫോണിന്റെ ഭാരം താങ്ങിനിര്ത്തുന്നത് ചെറുവിരലാണ്. ഇത് ചെറുവിരലിലെ മൃദുവായ കോശങ്ങള്, സന്ധികളുടെ ഘടനകള്, പേശികള് എന്നിവയിലേക്ക് സമ്മര്ദ്ദം ചെലുത്താനിടയാക്കും. സ്മാര്ട്ട്ഫോണ് പിങ്കി ഒരു ഔദ്യോഗിക മെഡിക്കല് രോഗനിര്ണയമല്ല. എന്നാല് ഫോണിന്റെ ദീര്ഘനേരത്തെ ഉപയോഗവും ഭാരവും വിരലുകളുടെ ചലനത്തെ നിര്ണയിക്കുന്ന ടെന്ഡോണുകളെയും അവയുടെ വഴക്കത്തെ നിലനിര്ത്തുന്ന ചില സന്ധികളെയും ബാധിച്ചേക്കാം.ക്യൂറിയസില് പ്രസിദ്ധീകരിച്ച ഒരു പഠനത്തില് ദീര്ഘനേരം ഫോണ് ഉപയോഗിക്കുന്നതുകൊണ്ട് ആളുകള് നേരിടുന്ന ഇത്തരം ആരോഗ്യ പ്രശ്നത്തെക്കുറിച്ച് എടുത്ത് പറയുന്നുണ്ട്.
ഈ ഡിജിറ്റല് യുഗത്തില് സ്മാര്ട്ട് ഫോണ് അടക്കമുള്ള ഉപകരണങ്ങളുടെ ഉപയോഗം ഒഴിവാക്കാനാവില്ല. എന്നാല് ചില കാര്യങ്ങളില് ശ്രദ്ധിച്ചാല് ബുദ്ധിമുട്ടുകള് ഒരു പരിധിവരെ ഒഴിവാക്കാം. ഒരു കൈയ്യ് ഉപയോഗിച്ച് ഫോണ് ഉപയോഗിക്കുന്നതിന് പകരം രണ്ട് കൈകളും ഉപയോഗിച്ച് ചെറുവിരലില് ഫോണ് പിടിക്കുന്ന ഭാരം ക്രമീകരിക്കുക. കൂടുതല് സമയം ഫോണ് ഉപയോഗിക്കുന്നതിന് പകരം ഇടയ്ക്കിടയ്ക്ക് ഇടവേളകളെടുക്കാം. വീഡിയോകളും മറ്റും കാണുമ്പോള് ഫോണ് സ്റ്റാന്ഡുകള് ഉപയോഗിക്കാവുന്നതാണ്. കൈവിരലുകള് നിവര്ത്തിയും മടക്കിയും ചെറിയ എക്സര്സൈസുകള് ചെയ്യാവുന്നതാണ്.
Content Highlights :If you are a mobile phone user, you should know about smartphone pinky
