LIVE TV
മഴക്കാറ് ഇല്ലെങ്കില്‍ ആകാശത്തിന് നീലനിറമാണല്ലേ സാധാരണയായി കാണപ്പെടുന്നത്. എന്നാല്‍ ആകാശത്തിന് യഥാര്‍ഥത്തില്‍ നീല നിറമാണോ?. സൂര്യപ്രകാശം വെള്ളനിറത്തിലല്ലേ? പിന്നെ ആകാശം മാത്രം എങ്ങനെ നീലയായി മാറുന്നു? ഇതിന് പിന്നില്‍ വളരെ ലളിതമായ ഒരു ശാസ്ത്രമുണ്ട്.
സൂര്യപ്രകാശം വെളുത്തതാണെങ്കിലും…
സൂര്യനില്‍ നിന്ന് ഭൂമിയിലേക്ക് എത്തുന്ന പ്രകാശം നമുക്ക് വെളുത്തതായി തോന്നും. എന്നാല്‍ ഈ വെളുത്ത പ്രകാശത്തില്‍ പല നിറങ്ങളുണ്ട്. മഴവില്ലില്‍ കാണുന്ന ചുവപ്പ്, ഓറഞ്ച്, മഞ്ഞ, പച്ച, നീല, വയലറ്റ് തുടങ്ങിയ നിറങ്ങളെല്ലാം സൂര്യപ്രകാശത്തിലുണ്ട്.ഈ പ്രകാശം ഭൂമിയുടെ അന്തരീക്ഷത്തിലേക്ക് പ്രവേശിക്കുമ്പോഴാണ് കാര്യങ്ങള്‍ മാറുന്നത്.
ഭൂമിയുടെ അന്തരീക്ഷത്തില്‍ പ്രധാനമായും നൈട്രജന്‍, ഓക്‌സിജന്‍ തുടങ്ങിയ വാതകങ്ങളാണ് ഉള്ളത്. സൂര്യപ്രകാശം അന്തരീക്ഷത്തിലൂടെ കടന്നുപോകുമ്പോള്‍ ഈ വാതക തന്മാത്രകളുമായി ഇടപെടുന്നു. അപ്പോള്‍ പ്രകാശത്തിന്റെ ഒരു ഭാഗം പല ദിശകളിലേക്കായി ചിതറിപ്പോകുന്നു. ഇതിനെ Rayleigh scattering (റേലി സ്‌കാറ്ററിംഗ്) എന്നാണ് വിളിക്കുന്നത്.
പ്രകാശത്തിലെ ഓരോ നിറത്തിനും വ്യത്യസ്ത തരംഗദൈര്‍ഘ്യമുണ്ട്. നീലയും വയലറ്റും പോലുള്ള നിറങ്ങള്‍ക്ക് ചുവപ്പ് നിറത്തേക്കാള്‍ കുറഞ്ഞ തരംഗദൈര്‍ഘ്യമാണ്. അന്തരീക്ഷത്തിലെ ചെറിയ വാതക തന്മാത്രകള്‍ കുറഞ്ഞ തരംഗദൈര്‍ഘ്യമുള്ള നീല പ്രകാശത്തെ മറ്റ് നിറങ്ങളെക്കാള്‍ കൂടുതല്‍ ചിതറിക്കുന്നു. ഈ നീലപ്രകാശം അന്തരീക്ഷത്തിലൂടെ പല ദിശകളിലേക്കും വ്യാപിക്കുന്നു. അതുകൊണ്ടാണ് നമ്മള്‍ ആകാശത്തേക്ക് നോക്കുമ്പോള്‍ കൂടുതലായി നീല നിറം കാണുന്നത്.
നീലയേക്കാള്‍ കൂടുതല്‍ പ്രതിഫലിക്കുന്നത് വയലറ്റ് പ്രകാശമാണ്. എന്നിട്ടും ആകാശം വയലറ്റായി കാണാത്തത് എന്തുകൊണ്ടാണെന്ന സംശയം സ്വാഭാവികമാണ്. ഇതിന് പ്രധാന കാരണം നമ്മുടെ കണ്ണുകള്‍ നീല പ്രകാശത്തോട് വയലറ്റിനേക്കാള്‍ കൂടുതല്‍ സംവേദനക്ഷമമാണ് എന്നതാണ്. കൂടാതെ അന്തരീക്ഷത്തിലുള്ള ചില വയലറ്റ് പ്രകാശം ആഗിരണം ചെയ്യപ്പെടുകയും ചെയ്യുന്നു. അതുകൊണ്ടാണ് നമ്മുടെ കണ്ണുകള്‍ക്ക് ആകാശം പ്രധാനമായും നീലയായി തോന്നുന്നത്.
പകല്‍ സമയത്ത് സൂര്യന്‍ നമ്മുടെ മുകളിലായിരിക്കുമ്പോള്‍ പ്രകാശത്തിന് അന്തരീക്ഷത്തിലൂടെ താരതമ്യേന കുറഞ്ഞ ദൂരം സഞ്ചരിച്ചാല്‍ മതി. എന്നാല്‍ സൂര്യന്‍ അസ്തമയത്തിലേക്ക് താഴുമ്പോള്‍ പ്രകാശത്തിന് നമ്മുടെ കണ്ണുകളിലെത്താന്‍ അന്തരീക്ഷത്തിലൂടെ കൂടുതല്‍ ദൂരം സഞ്ചരിക്കണം. ഈ നീണ്ട യാത്രയ്ക്കിടെ നീലയും വയലറ്റും കൂടുതല്‍ ചിതറിപ്പോകുന്നു. അതോടെ ചുവപ്പ്, ഓറഞ്ച്, മഞ്ഞ തുടങ്ങിയ നീളം കൂടിയ തരംഗദൈര്‍ഘ്യമുള്ള നിറങ്ങള്‍ കൂടുതല്‍ നമ്മുടെ കണ്ണുകളിലെത്തുന്നു. അതുകൊണ്ടാണ് സൂര്യാസ്തമയ സമയത്ത് ആകാശം ചുവപ്പോ ഓറഞ്ചോ പിങ്കോ നിറങ്ങളില്‍ കാണുന്നത്.
അന്തരീക്ഷത്തിലെ പൊടി, പുക, മലിനീകരണം തുടങ്ങിയ കണങ്ങളുടെ അളവും ആകാശത്തിന്റെ നിറത്തെ സ്വാധീനിക്കും. അതുകൊണ്ടുതന്നെ ചില ദിവസങ്ങളില്‍ സൂര്യാസ്തമയം കൂടുതല്‍ ചുവപ്പോ ഓറഞ്ചോ നിറത്തില്‍ മനോഹരമായി കാണാം. അന്തരീക്ഷത്തിലെ കണങ്ങളുടെ അളവ് കൂടുമ്പോള്‍ പ്രകാശത്തിന്റെ പ്രതിഫലനത്തിലും മാറ്റമുണ്ടാകും.
Content Highlights :Do you know why the sky appears blue? The blue color of the sky is related to sunlight and the Earth's atmosphere
