LIVE TV
പുരുഷന്മാര് എപ്പോഴും ലൈംഗികതയ്ക്ക് തയ്യാറുള്ളവരും അതിയായ താല്പര്യമുള്ളവരുമാണ് എന്നാണ് സമൂഹത്തിന്റെ പൊതുവെയുള്ള ധാരണ. എന്നാല് യാഥാര്ത്ഥ്യം ഇതില് നിന്നും ഏറെ വ്യത്യസ്തമാണ്. പല പുരുഷന്മാരും തങ്ങളുടെ ജീവിതത്തിലെ ഏതെങ്കിലും ഒരു ഘട്ടത്തില് ലൈംഗിക താല്പര്യക്കുറവ് (Loss of Libido) അനുഭവിക്കുന്നവരാണ്.
സമൂഹത്തിന്റെ ഇത്തരം മുന്വിധികളുള്ളതുകൊണ്ട്, പലരും ഇതിനെ തങ്ങളുടെ പൗരുഷത്തിന്റെയോ കഴിവില്ലായ്മയുടെയോ അടയാളമായി തെറ്റിദ്ധരിക്കുന്നു. ഈ അപകര്ഷതാബോധം കാരണം അവര് തങ്ങളുടെ പങ്കാളിയോടോ ഒരു പ്രൊഫഷണലിനോടോ പോലും തുറന്നു പറയാന് തയ്യാറാകാതെ ഉള്ളിലൊതുക്കി വിഷമിക്കുകയാണ് പതിവ്. ഈ മൗനം അവരുടെ മാനസിക സമാധാനം കെടുത്തുക മാത്രമല്ല, താന് ഇനി പങ്കാളിക്ക് സ്വീകാര്യനല്ല എന്ന തോന്നല് ഭാര്യയില് ഉണ്ടാക്കുകയും അത് അവരുടെ ദാമ്പത്യ ബന്ധത്തില് വലിയ വൈകാരിക അകല്ച്ചയ്ക്ക് കാരണമാവുകയും ചെയ്യുന്നു.
ലൈംഗിക താല്പര്യക്കുറവ് ഒരു പുരുഷന്റെ പോരായ്മയല്ല. മറിച്ച് അമിതമായ സ്ട്രെസ്സ്, ശാരീരികമായ ബുദ്ധിമുട്ടുകള്, അല്ലെങ്കില് ബന്ധങ്ങളിലെ വിള്ളലുകള് എന്നിവയുടെ ഒരു ലക്ഷണം മാത്രമാണെന്ന് നാം ആദ്യമേ മനസ്സിലാക്കേണ്ടതുണ്ട്. ഇത് എന്തുകൊണ്ട് സംഭവിക്കുന്നുവെന്നും, പരസ്പരമുള്ള കുറ്റപ്പെടുത്തലുകള്ക്ക് പകരം പങ്കാളികള്ക്ക് എങ്ങനെ ഒരുമിച്ച് ഈ പ്രശ്നത്തെ മറികടക്കാം എന്നും നമുക്ക് പരിശോധിക്കാം.
ലൈംഗിക താല്പര്യക്കുറവിനെക്കുറിച്ച് സംസാരിക്കാന് പല പുരുഷന്മാര്ക്കും മടിയാണ്. സമൂഹത്തിന്റെ മുന്വിധികളുള്ളതുകൊണ്ട്തന്നെ, പലരും ഇതിനെ തങ്ങളുടെ പൗരുഷത്തിന്റെയോ കഴിവില്ലായ്മയുടെയോ അടയാളമായി തെറ്റിദ്ധരിക്കുന്നു.
പഠനങ്ങള് സൂചിപ്പിക്കുന്നത് 5-ല് ഒരാള്ക്ക് (20%) തങ്ങളുടെ ജീവിതത്തിന്റെ ഏതെങ്കിലും ഒരു ഘട്ടത്തില് ലൈംഗിക താല്പര്യക്കുറവ് അനുഭവപ്പെടുന്നുണ്ട് എന്നാണ്. ഇത് തികച്ചും സ്വാഭാവികമാണ്.
ലൈംഗിക താല്പര്യക്കുറവ് ഒരു പുരുഷന്റെ വ്യക്തിപരമായ പോരായ്മയല്ല (character flaw). മറിച്ച്, നിങ്ങളുടെ ശരീരത്തിലോ മനസ്സിലോ ശ്രദ്ധ നല്കേണ്ട എന്തോ ഒരു പ്രശ്നമുണ്ട് എന്ന് ശരീരം കാണിച്ചുതരുന്ന ഒരു ലക്ഷണം (symptom) മാത്രമാണിത്.
ഈ പ്രശ്നത്തെ പ്രധാനമായും മൂന്നായി തിരിക്കാം:
ശാരീരിക കാരണങ്ങള് (Biological Factors)
ടെസ്റ്റോസ്റ്റിറോണ് (Testosterone) ഹോര്മോണിന്റെ കുറവ്, പ്രമേഹം പോലുള്ള ജീവിതശൈലീ രോഗങ്ങള്, സ്ഥിരമായുള്ള ശാരീരിക ക്ഷീണം. കൂടാതെ, രക്തസമ്മര്ദ്ദത്തിനും (BP) വിഷാദരോഗത്തിനും (SSRIs) കഴിക്കുന്ന ചില മരുന്നുകളുടെ പാര്ശ്വഫലമായും ഇത് സംഭവിക്കാം.
മാനസിക കാരണങ്ങള് (Psychological & Emotional Factors)
അമിതമായ ജോലിഭാരം, സ്ട്രെസ്സ്, ഉത്കണ്ഠ (Anxiety), വിഷാദം എന്നിവ. ഒരു വ്യക്തി നിരന്തരം സ്ട്രെസ്സില് ആയിരിക്കുമ്പോള് (Fight or Flight mode), ശരീരം അതിജീവിക്കാന് ശ്രമിക്കുകയും പ്രത്യുല്പാദന വ്യവസ്ഥയുടെ പ്രവര്ത്തനങ്ങളെ സ്വാഭാവികമായും മന്ദഗതിയിലാക്കുകയും ചെയ്യുന്നു. കൂടാതെ, മികച്ച പ്രകടനം കാഴ്ചവെക്കാന് സാധിക്കുമോ എന്ന പേടിയും (Performance anxiety) ഈ താല്പര്യക്കുറവിന് കാരണമാകാം.
ബന്ധങ്ങളിലെ വിള്ളലുകള് (Relational Friction)
പങ്കാളികള് തമ്മിലുള്ള പരിഹരിക്കപ്പെടാത്ത വഴക്കുകള്, വൈകാരികമായ അകല്ച്ച, പരസ്പര വിശ്വാസമില്ലായ്മ എന്നിവയും ലൈംഗിക താല്പര്യത്തെ ഇല്ലാതാക്കുന്നു.
ദാമ്പത്യത്തില് ഈ പ്രശ്നം ഏറ്റവും കൂടുതല് ബാധിക്കുന്നത് ഇവരുടെ പങ്കാളിയെയാണ്. പലപ്പോഴും പുരുഷന്മാര് ഇതിനെക്കുറിച്ച് സംസാരിക്കാതെ പിന്മാറുമ്പോള്, ഭാര്യമാര് അത് തങ്ങളോടുള്ള തിരസ്കരണമായി മാത്രം (Rejection) കണക്കാക്കുന്നു.
ഭര്ത്താവ് വിചാരിക്കുന്നത് 'എനിക്ക് നല്ല ക്ഷീണവും സ്ട്രെസ്സുമുണ്ട്, അതുകൊണ്ടാണ് താല്പര്യമില്ലാത്തത്' എന്നാകും. എന്നാല് ഭാര്യ ചിന്തിക്കുന്നത് 'അദ്ദേഹത്തിന് ഇപ്പോള് എന്നോട് സ്നേഹമില്ല', അല്ലെങ്കില് എനിക്ക് സൗന്ദര്യം കുറഞ്ഞതുകൊണ്ടാകും എന്നെ അകറ്റുന്നത് എന്നൊക്കെയാകും. ഭര്ത്താവിന് പരസ്ത്രീ ബന്ധം ഉള്ളതുകൊണ്ടാകാം തന്നോട് താല്പര്യക്കുറവ് എന്നുവരെ ചിന്തിക്കുന്നവരുമുണ്ട്.
പങ്കാളി സ്നേഹം പ്രകടിപ്പിക്കാനും അടുക്കാനും ശ്രമിക്കുമ്പോള്, ഭര്ത്താവ് ഒരുതരം സമ്മര്ദ്ദം അനുഭവിച്ച് കൂടുതല് അകലുന്നു. ഈ അകല്ച്ച കാണുമ്പോള് പങ്കാളിക്ക് വീണ്ടും അരക്ഷിതാവസ്ഥ തോന്നുകയും അവര് വീണ്ടും നിര്ബന്ധിക്കുകയും ചെയ്യുന്നു. ഇതൊരു നീണ്ടുപോകുന്ന അവസാനമില്ലാത്ത പ്രശ്നമായി മാറുന്നു.
ആരോഗ്യകരമായ ലൈംഗികബന്ധം കേവലം ശാരീരികമല്ല. അതിലൂടെ ശരീരത്തില് പ്രധാനപ്പെട്ട 4 സന്തോഷ ഹോര്മോണുകള് ഉത്പാദിപ്പിക്കപ്പെടുന്നുണ്ട്
ലൈംഗികബന്ധം ഇല്ലാതാകുമ്പോള് ഈ ഹോര്മോണുകളുടെ ഉത്പാദനം കുറയുന്നു. ഇത് ദമ്പതികളില് സെക്ഷ്വല് ഫ്രസ്ട്രേഷന് ഉണ്ടാക്കുകയും ക്രമേണ അത് ദേഷ്യത്തിനും വഴക്കിനും നിരാശയ്ക്കും കാരണമാവുകയും ചെയ്യുന്നു.നിങ്ങളുടെ പങ്കാളിക്ക് നഷ്ടമാകുന്നത് കേവലം ശാരീരിക ബന്ധം മാത്രമല്ല, മറിച്ച് അതിലൂടെ ലഭിക്കേണ്ട വൈകാരികമായ അടുപ്പവും സുരക്ഷിതത്വവുമാണ്. കാരണം വ്യക്തമാക്കാതെ നിങ്ങള് അവരില് നിന്ന് അകലുമ്പോള്, അവര് സ്വന്തം അരക്ഷിതാവസ്ഥകളുമായി ഒറ്റപ്പെടുകയാണ് ചെയ്യുന്നത്. ഇത് അവരുടെ സാമൂഹിക ജീവിതത്തെ വരെ പ്രതികൂലമായി ബാധിക്കുന്ന ഒന്നാണ്.
ഓര്ക്കുക: ആരോഗ്യകരമായ ലൈംഗികജീവിതം നിങ്ങളുടെയും പങ്കാളിയുടെയും അവകാശമാണ്, അടിസ്ഥാനപരമായ ആവശ്യങ്ങളിലൊന്നാണ്. ഈ കാര്യത്തില് പങ്കാളിയോട് നീതി പുലര്ത്തുക എന്നത് വളരെയധികം പ്രാധാന്യമര്ഹിക്കുന്ന കാര്യമാണ്. ദീര്ഘകാലമായുള്ള ലൈംഗികബന്ധത്തിന്റെ അഭാവം ഇന്ത്യന് വിവാഹനിയമങ്ങള് പ്രകാരം വിവാഹമോചനത്തിനുള്ള സാധുവായ കാരണമായി പരിഗണിക്കപ്പെടാം.
ഈ പ്രശ്നം മറികടക്കാന് കൃത്യവും ശാസ്ത്രീയവുമായ വഴികളുണ്ട്
തുറന്ന ആശയവിനിമയം (Open, Non-Defensive Communication)
പ്രശ്നം തുറന്നു സംസാരിക്കുക എന്നതാണ് ആദ്യ പടി. കുറ്റപ്പെടുത്തലുകള് ഇല്ലാതെ സംസാരിക്കാം. ഉദാഹരണത്തിന്: 'എന്റെ ഈ അകല്ച്ച നിന്നോടുള്ള ഇഷ്ടക്കുറവുകൊണ്ടല്ല. എന്റെ മാനസികവും ശാരീരികവുമായ സമ്മര്ദ്ദങ്ങള് കൊണ്ടാണ് എനിക്ക് താല്പര്യം കുറയുന്നത്. നമുക്കിത് ഒരുമിച്ച് നിന്ന് പരിഹരിക്കണം.' എന്ന് പങ്കാളിയോട് വ്യക്തമാക്കുക.
ലക്ഷ്യങ്ങളില്ലാത്ത സ്പര്ശനങ്ങള് (Rebuild Non-Demand Intimacy)
ലൈംഗിക ബന്ധത്തില് ഏര്പ്പെടണം എന്ന യാതൊരു ലക്ഷ്യവുമില്ലാതെ പരസ്പരം സ്നേഹം പ്രകടിപ്പിക്കുക. കൈകള് ചേര്ത്തുപിടിക്കുക, കെട്ടിപ്പിടിക്കുക, തോളില് ചാരിക്കിടക്കുക തുടങ്ങിയവ ശീലമാക്കുക. ഇത് പങ്കാളിക്ക് വൈകാരിക സുരക്ഷിതത്വം നല്കുകയും പുരുഷനിലെ 'പെര്ഫോമന്സ് ആന്സൈറ്റി' ഇല്ലാതാക്കുകയും ചെയ്യും.
വൈദ്യസഹായം തേടുക (Clinical & Medical Evaluation)
മടിയോ നാണക്കേടോ കൂടാതെ ഒരു ഡോക്ടറെ കണ്ട് ശാരീരിക പരിശോധനകള് നടത്തുക. ഹോര്മോണ് വ്യതിയാനങ്ങള്, ഷുഗര്, ബി.പി മരുന്നുകളുടെ പാര്ശ്വഫലങ്ങള് എന്നിവ ഇല്ല എന്ന് ഉറപ്പുവരുത്തുക.
പ്രൊഫഷണല് കൗണ്സിലിംഗ് (Professional Counselling)
മാനസിക സമ്മര്ദ്ദങ്ങളോ ദാമ്പത്യത്തിലെ മറ്റു പ്രശ്നങ്ങളോ ആണെങ്കില് ഒരു ക്ലിനിക്കല് സൈക്കോളജിസ്റ്റിനെയോ റിലേഷന്ഷിപ്പ് കൗണ്സിലറെയോ സമീപിക്കുക. ഉള്ളിലെ സ്ട്രെസ്സും ഉത്കണ്ഠകളും മാറ്റാനും, ദമ്പതികള് തമ്മിലുള്ള ആശയവിനിമയം കൂടുതല് സുതാര്യമാക്കാനും തെറാപ്പിയിലൂടെ സാധിക്കും.
(ലൈംഗിക താല്പര്യക്കുറവ് ഒരു വലിയ വീഴ്ചയല്ല; ശരിയായ ചികിത്സയിലൂടെയും പങ്കാളിയുടെ പിന്തുണയോടെയും തിരികെ പിടിക്കാവുന്ന ഒന്ന് മാത്രമാണിത്)
Content Highlights :Many men experience a loss of libido at some stage in their lives
