LIVE TV
വിമാന ടിക്കറ്റ് ബുക്കിങില് പുതിയ മാനദണ്ഡങ്ങളുമായി ഒമാന് എയര്. ഇനി മുതല് ടിക്കറ്റ് ബുക്ക് ചെയ്യുമ്പോള് യാത്രക്കാരന്റെ ഇമെയില് വിലാസവും മൊബൈല് ഫോണ് നമ്പറും നല്കണമെന്നാണ് പുതിയ നിര്ദേശം. ട്രാവല് ഏജന്സികളുടേയോ മറ്റ് ഇടനിലക്കാരുടെയോ കോണ്ടാക്ട് വിവരങ്ങള് യാത്രക്കാരന്റെ വ്യക്തിഗത വിവരങ്ങള്ക്ക് പകരമായി നല്കാന് ഇനി കഴിയില്ല. ഓഗസ്റ്റ് പതിനെട്ട് മുതല് പുതിയ മാറ്റം നിലവില് വന്നതായും ടിക്കറ്റ് ബുക്ക് ചെയ്യുമ്പോള് നല്കുന്ന ഫോണ് നമ്പറും ഇമെയില് വിലാസവും യാത്രക്കാരന്റേതോ, യാത്രക്കാരന് നിയോഗിച്ച കോണ്ടാക്ട് വ്യക്തിയുടേയോ ആയിരിക്കണമെന്നും ഒമാന് എയര് അറിയിച്ചു.
വിമാനങ്ങളുടെ വൈകിവരവ്, സര്വീസ് സമയങ്ങളിലെ മാറ്റങ്ങള്, സര്വീസ് റദ്ദാക്കല് തുടങ്ങിയ അടിയന്തര സാഹചര്യങ്ങളില് യാത്രക്കാരെ നേരിട്ട് വിവരങ്ങള് അറിയിക്കുന്നതിന്റെ ഭാഗമായാണ് പുതിയ മാറ്റം. ഇതോടെ എസ്എംഎസ്, വാട്സആപ്പ്, ഇമെയില് തുടങ്ങിയ മാര്ഗങ്ങളിലൂടെ ഒമാന് എയറിനു യാത്രക്കാരുമായി നേരിട്ട് ബന്ധപ്പെടാന് സാധിക്കും. ശരിയായ രാജ്യാന്തര കണ്ട്രി കോഡ് ഇല്ലാത്ത ഫോണ് നമ്പര്, പ്രവര്ത്തന രഹിതമായ ഇമെയില് വിലാസം എന്നിവ നല്കിയാല് പ്രധാന അറിയിപ്പുകള് ലഭിക്കാതെ പോകാന് സാധ്യതയുണ്ട്. അതിനാല് യാത്രക്കാര് തങ്ങളുടെ ബുക്കിങ് വിവരങ്ങള് കൃത്യമാണെന്ന് ഉറപ്പാക്കണമെന്നും ഒമാന് എയര് അധികൃതര് നിര്ദേശിച്ചു.
Content Highlight: Oman Air has introduced updated booking and management features that allow passengers to modify travel details, select services, and manage reservations more conveniently online.
