LIVE TV
പശ്ചിമേഷ്യയിലെ വർദ്ധിച്ചുവരുന്ന സൈനിക ഏറ്റുമുട്ടലുകളെ തുടർന്ന് ഗൾഫ് മേഖലയിലാകെ വിമാന സർവീസുകൾ കനത്ത പ്രതിസന്ധിയിൽ. സുരക്ഷാ മുൻകരുതലുകളുടെ ഭാഗമായി കുവൈറ്റ്, സൗദി അറേബ്യ ഉൾപ്പെടെയുള്ള രാജ്യങ്ങളിലേക്കുള്ള നിരവധി സർവീസുകൾ യുഎഇ വിമാനക്കമ്പനികൾ റദ്ദാക്കുകയും സമയക്രമം മാറ്റുകയും ചെയ്തു. മേഖലയിലെ സംഘർഷ സാഹചര്യം കണക്കിലെടുത്ത് മിഡിൽ ഈസ്റ്റിലേക്കുള്ള യാത്രകൾ പുനഃപരിശോധിക്കാൻ അമേരിക്കൻ പൗരന്മാർക്ക് യുഎസ് സ്റ്റേറ്റ് ഡിപ്പാർട്ട്മെന്റ് കർശന യാത്രാ മുന്നറിയിപ്പും നൽകിയിട്ടുണ്ട്.
നിലവിലെ യുദ്ധസാഹചര്യങ്ങൾ മുൻനിർത്തി യുഎഇ വിമാനക്കമ്പനികൾ തങ്ങളുടെ സർവീസുകളിൽ വലിയ ക്രമീകരണങ്ങളാണ് വരുത്തിയിരിക്കുന്നത്. പ്രമുഖ വിമാനക്കമ്പനിയായ എമിറേറ്റ്സ് എയർലൈൻസ് ജൂലൈ 19 വരെയുള്ള ദുബായ്-കുവൈറ്റ് സർവീസുകൾ പൂർണ്ണമായും റദ്ദാക്കി. അബുദാബിയിൽ നിന്നുള്ള കുവൈറ്റ് സർവീസുകൾ എത്തിഹാദ് എയർവേയ്സും താൽക്കാലികമായി നിർത്തിവെച്ചിരിക്കുകയാണ്. ഷാർജ, അബുദാബി എന്നിവിടങ്ങളിൽ നിന്നുള്ള കുവൈറ്റ് സർവീസുകളുടെ വിവരങ്ങൾ എയർ അറേബ്യയും പുതുക്കി നിശ്ചയിച്ചിട്ടുണ്ട്. അതിനാൽ കുവൈറ്റിലേക്ക് യാത്ര തിരിക്കുന്നവർ എയർപോർട്ടിലേക്ക് പോകുന്നതിന് മുൻപ് അതത് വിമാനക്കമ്പനികളുമായി നേരിട്ട് ബന്ധപ്പെട്ട് വിവരങ്ങൾ ഉറപ്പുവരുത്തണമെന്ന് നിർദ്ദേശമുണ്ട്.
യുഎഇക്കും സൗദി അറേബ്യയ്ക്കും ഇടയിലുള്ള വിമാന സർവീസുകളെയും നിലവിലെ സംഘർഷം കാര്യമായി ബാധിച്ചിട്ടുണ്ട്. ദുബായ്-അബഹ, ഷാർജ-അബഹ സർവീസുകൾ ഇപ്പോഴും തടസ്സപ്പെട്ട നിലയിലാണ്. അതേസമയം ഖത്തർ എയർവേയ്സ്, ഒമാൻ എയർ, സലാം എയർ, ഗൾഫ് എയർ, സൗദിയ, കുവൈറ്റ് എയർവേയ്സ് എന്നീ പ്രാദേശിക ഗൾഫ് വിമാനക്കമ്പനികൾ തങ്ങളുടെ സർവീസുകൾ ക്രമേണ പുനഃസ്ഥാപിക്കാനുള്ള ശ്രമങ്ങൾ നടത്തുന്നുണ്ട്. എന്നാൽ എയർ കാനഡ, കെഎൽഎം, ലുഫ്താൻസ, സിംഗപ്പൂർ എയർലൈൻസ് തുടങ്ങിയ പ്രമുഖ അന്താരാഷ്ട്ര കമ്പനികൾ മിഡിൽ ഈസ്റ്റ് റൂട്ടുകളിലൂടെയുള്ള സർവീസുകളുടെ താൽക്കാലിക സസ്പെൻഷൻ ഇപ്പോഴും തുടരുകയാണ്.
മേഖലയിലെ സുരക്ഷാ അന്തരീക്ഷം സങ്കീർണ്ണമായി തുടരുന്ന സാഹചര്യത്തിലാണ് യുഎസ് സ്റ്റേറ്റ് ഡിപ്പാർട്ട്മെന്റ് പൗരന്മാർക്ക് പുതിയ യാത്രാ നിർദ്ദേശം പുറപ്പെടുവിച്ചത്. മിഡിൽ ഈസ്റ്റിലേക്കോ ഈ മേഖലയിലൂടെയോ ഉള്ള യാത്രകൾ പരമാവധി ഒഴിവാക്കാനോ പുനഃപരിശോധിക്കാനോ ആണ് നിർദ്ദേശം. മുൻകൂട്ടി യാതൊരു മുന്നറിയിപ്പുമില്ലാതെ തന്നെ സാഹചര്യങ്ങൾ കൂടുതൽ വഷളാകാൻ സാധ്യതയുണ്ടെന്നും യാത്രക്കാർ അന്താരാഷ്ട്ര വാർത്തകൾ സസൂക്ഷ്മം നിരീക്ഷിക്കണമെന്നും യുഎസ് എംബസിയും പൗരന്മാരോട് അഭ്യർത്ഥിച്ചു.
Content Highlights: The escalating conflict in West Asia has severely affected air travel across the Gulf. Several flights to and from Kuwait and Saudi Arabia have been cancelled or disrupted, prompting airlines to revise schedules and advise passengers to check flight updates before travelling.
