ലണ്ടൻ: ഇംഗ്ലീഷ് പ്രീമിയർ ലീഗിൽ വിജയവഴിയിൽ തിരിച്ചെത്തി മാഞ്ചസ്റ്റർ യുണൈറ്റഡ്. ഒന്നിനെതിരെ രണ്ട് ഗോളുകൾക്കാണ് മാഞ്ചസ്റ്റർ യുണൈറ്റഡിന്റെ വിജയം. ഇരട്ട ഗോൾ നേടിയ സ്‌കോട് മക്ടൊമിനെയ് റെഡ് ഡെവിൾസിന് വിജയം നേടി നൽകി. കോൾ പാൽമർ ചെൽസിയുടെ ഏക ഗോൾ നേടി.
നിലവിലെ ചാമ്പ്യന്മാരായ മാഞ്ചസ്റ്റർ സിറ്റി ആസ്റ്റൺ വില്ലയോട് പരാജയപ്പെട്ടു. എതിരില്ലാത്ത ഒരു ഗോളിനാണ് സിറ്റി സംഘത്തിന്റെ തോൽവി. ഷെഫീൽഡ് യുണൈറ്റഡിനെ എതിരില്ലാത്ത രണ്ട് ഗോളിന് തകർത്ത് ലിവർപൂളും വിജയം നേടി. വിര്‍ജിൽ വാൻ ഡൈക്ക് 37-ാം മിനിറ്റിലും ഡൊമിനിക് സോബോസ്‌ലായി 94-ാം മിനിറ്റിലും ലിവർപൂളിനായി വലചലിപ്പിച്ചു.
മറ്റൊരു മത്സരത്തിൽ നോട്ടിങ്ഹാം ഫോറസ്റ്റിനെ മറുപടിയില്ലാത്ത അഞ്ച് ഗോളിന് തകർത്ത് ഫുൾഹാം വിജയം നേടി. ബ്രൈട്ടനെ ഒന്നിനെതിരെ രണ്ട് ഗോളിന് തോൽപ്പിച്ച് ബ്രെൻഡ്ഫോൾഡും വിജയം സ്വന്തമാക്കി. ക്രിസ്റ്റൽ പാലസിനെ മറുപടിയില്ലാത്ത രണ്ട് ഗോളിന് തോൽപ്പിച്ച് ബേണ്‍മൗത്തും വിജയം കുറിച്ചു.
