LIVE TV
മോഹന്ലാല്-ജീത്തു ജോസഫ് ചിത്രം ദൃശ്യം3 330 കോടി നേട്ടത്തിന്റെ തിളക്കത്തില്. ബോക്സ് ഓഫീസ് കളക്ഷന് പുറമേ ഒ.ടി.ടി- സാറ്റ്ലൈറ്റ് ബിസിനസ് ഉള്പ്പെടെയാണ് ചിത്രം 330 കോടി നേടിയത്.സിനിമ തീയേറ്ററിലെത്തി വെറും 58 മണിക്കൂറുകള് കൊണ്ടാണ് 100 കോടി ക്ലബിലെത്തുന്നത്. റീലീസ് ചെയ്ത് 7 ദിവസം കൊണ്ടാണ് ചിത്രം 200 കോടിയുടെ നേട്ടം ഉണ്ടാക്കിയത്. ഇപ്പോഴിതാ 30ാം ദിവസത്തിലേക്ക് എത്തിയപ്പോഴേക്കും 330 കോടി അടിച്ചിരിക്കുകയാണ്. ഏറ്റവും കൂടുതല് ഭാഷകളിലേക്ക് റീമേക്ക് ചെയ്യപ്പെട്ട ചിത്രം കൂടിയാണ് ദൃശ്യം.
നേട്ടം അറിയിച്ചു കൊണ്ടുള്ള പോസ്റ്റര് മോഹന്ലാല് ഫേസ്ബുക്കില് പോസ്റ്റ് ചെയ്തിട്ടുണ്ട്.'അതിരുകള് താണ്ടിയ നാഴികക്കല്ല്', 'മലയാള സിനിമാ ബോക്സ് ഓഫീസില് ചരിത്രം' എന്നിങ്ങനെയാണ് പോസ്റ്ററില് നേട്ടത്തെ വിശേഷിപ്പിച്ചിരിക്കുന്നത്. മോഹന്ലാലിനൊപ്പം നിര്മാതാവ് ആന്റണി പെരുമ്പാവൂരും സംവിധായകന് ജീത്തു ജോസഫുമുള്ളതാണ് പോസ്റ്റര്. 'തലമുറകള് കൈമാറിയത്. കേരളത്തില് നിന്നാരംഭിച്ച കഥ ഭാഷകളും അതിരുകളും ലക്ഷക്കണക്കിന് ഹൃദയങ്ങളും കടന്ന് സഞ്ചരിച്ചു. 13 വര്ഷങ്ങള്ക്കും മൂന്ന് അധ്യായങ്ങള്ക്കുമപ്പുറം ചരിത്രം സൃഷ്ടിച്ച് യാത്ര തുടരുന്നു. നിങ്ങളുടെ സ്വന്തമായി ഏറ്റെടുത്തതിന് നന്ദി'-മോഹന്ലാല് കുറിച്ചു.
ദൃശ്യം 3യുടെ ആഗോള തിയേറ്ററിക്കല് റൈറ്റ്സ് ഉള്പ്പെടെ എല്ലാ അവകാശങ്ങളും സിനിമ തീയേറ്ററില് എത്തും മുന്പ് തന്നെ വിറ്റുപോയിരുന്നു. പെന് സ്റ്റുഡിയോസുമായി ചേര്ന്ന് പനോരമ സ്റ്റുഡിയോസ് ആണ് ചിത്രത്തിന്റെ അവകാശങ്ങള് സ്വന്തമാക്കിയത്. 'ദൃശ്യം' പരമ്പര ഹിന്ദിയില് നിര്മിച്ചത് പനോരമയാണ്.
'ദൃശ്യം 3'-യുടെ ഒടിടി സ്ട്രീമിങ് കഴിഞ്ഞദിവസം ആമസോണ് പ്രൈം വീഡിയോ പ്രഖ്യാപിച്ചിരുന്നു. ജൂണ് 18-ന് ചിത്രം ഒടിടിയിലെത്തും. മലയാളത്തിന് പുറമേ, തെലുങ്ക്, തമിഴ്, കന്നഡ ഭാഷകളിലും ചിത്രം ലഭ്യമാവും.
മോഹന്ലാലിനൊപ്പം മീന, എസ്തര് അനില്, അന്സിബ, സിദ്ദിഖ്, ആശാ ശരത്, മുരളി ഗോപി തുടങ്ങിയവരായിരുന്നു ദൃശ്യം 3-യിലെ അഭിനേതാക്കള്. ദൃശ്യത്തിന്റെ മൂന്നാംഭാഗം മികച്ച ദൃശ്യാനുഭവമായി മാറിയെന്നത് ക്ലൈമാക്സിനു ശേഷം തിയറ്ററിലെ പ്രേക്ഷകരുടെ കയ്യടികള് തെളിവാണ്.
Content Highlights: In addition to the box office collection, Drishyam 3 is in the 330 crore club, including OTT-satellite business
