LIVE TV
പ്രേക്ഷകർ ഏറെ പ്രതീക്ഷയോടെ കാത്തിരുന്ന സൂര്യ ചിത്രമായ കറുപ്പിന്റെ തിയേറ്റർ റിലീസിന്റെ പ്രതിസന്ധി തുടരുകയാണ്. ഇന്ന് (മെയ് 14) ചിത്രം തിയേറ്ററുകളിലെത്തുമെന്നായിരുന്നു അണിയറ പ്രവർത്തകർ അറിയിച്ചിരുന്നത്. എന്നാൽ രാവിലെ അപ്രതീക്ഷിതമായി പ്രദർശനം നിർത്തിവെക്കുകയായിരുന്നു.
നേരത്തെ ബുക്ക് ചെയ്ത ആളുകളെല്ലാം തിയേറ്ററുകളിലെത്തിയ ശേഷമാണ് റിലീസ് ഇത്തരത്തിൽ നിർത്തിവെക്കപ്പെട്ടത്. സംഭവത്തിന് പിന്നാലെ പ്രതികരണവുമായി സംവിധായകൻ ആർ ജെ ബാലാജി സമൂഹമാധ്യമങ്ങളിൽ എത്തിയിരുന്നു. ആരാധകരോടെ മാപ്പ് പറഞ്ഞുകൊണ്ട് സംസാരിച്ച ബാലാജി ഇടയ്ക്ക് വിതുമ്പിപ്പോയിരുന്നു. വൈകാതെ തന്നെ പ്രശ്നങ്ങൾ പരിഹരിക്കുമെന്ന പ്രതീക്ഷയും അദ്ദേഹം പങ്കുവെച്ചിരുന്നു.
ഈ വീഡിയോക്ക് താഴെ സിനിമാലോകത്ത് നിന്നും ആരാധകരിൽ നിന്നും നിരവധി പേരാണ് കറുപ്പിനും ബാലാജിക്കും പിന്തുണയും സാന്ത്വനവുമായി എത്തിച്ചേർന്നിരുന്നത്. നിരവധി പേർ കമന്റുകളിലൂടെ തങ്ങളുടെ പിന്തുണ വ്യക്തമാക്കി. അക്കൂട്ടത്തിൽ നടൻ ദുൽഖർ സൽമാനും ഉണ്ടായിരുന്നു. 'എല്ലാം ശരിയാകും ബ്രദർ, എപ്പോഴും നിന്റെ കൂടെയുണ്ടാകും' എന്നാണ് ദുൽഖർ കുറിച്ചത്.
അതേസമയം, ആർ ജെ ബാലാജിയുടെ വീഡിയോ ആരാധകരെയെല്ലാം ഏറെ വിഷമിപ്പിച്ചിരിക്കുകയാണ്. ഈറനണിഞ്ഞുകൊണ്ട് അദ്ദേഹം സംസാരിച്ചത് കാണുമ്പോൾ ഹൃദയം നോവുന്നു എന്ന് വരെ കമന്റുകൾ വരുന്നുണ്ട്. 'എല്ലാ ആരാധകരോടും മാപ്പ് ചോദിക്കുന്നു. ഇത് സംഭവിക്കാൻ പാടുള്ളതായിരുന്നില്ല. സിനിമ കാണാൻ അത്രയും ദൂരം യാത്ര ചെയ്ത് രാവിലെ ഒമ്പത് മണിയ്ക്ക് തിയേറ്ററിൽ എത്തിയ തമിഴ്നാട്, കേരളം, ആന്ധ്ര എന്നിവടങ്ങളിലെ പ്രിയപ്പെട്ടവരോട് ആത്മാർത്ഥമായി ക്ഷമ ചോദിക്കുന്നു.
എല്ലാവരും സിനിമ കാണാൻ പോകുന്നത് തന്നെ ജീവിതത്തിലേയും ജോലി സ്ഥലത്തിലേയും ടെൻഷൻ മറക്കാനാണ്. ആ സിനിമ കാണുന്നത് തന്നെ ഒരു സ്ട്രെസ് ആയിമാറിയതിൽ ഞാൻ വീണ്ടും ക്ഷമ ചോദിക്കുന്നു. ഇത് പ്രതീക്ഷിച്ചിരുന്നില്ല. ഇന്ന് വൈകുന്നേരം ആറ് മണിയോട് പ്രശ്നങ്ങളൊക്കെ പരിഹരിക്കപ്പെടുകയും സിനിമ റിലീസ് ചെയ്യാനാകുമെന്നും പ്രതീക്ഷിക്കുന്നു.
സിനിമ ഇന്ന് റിലീസാകും, ബ്ലോക്ബസ്റ്ററാകും എന്ന് ഞാൻ മാനിഫെസ്റ്റ് ചെയ്തിരുന്നു. എന്റെ കണ്ണുകൾ നിറയുന്നുണ്ട്്. വേദനയുണ്ട്. അത് വേറെ ഡിപ്പാർട്ട്മെന്റാണ്. ദൈവം എല്ലാത്തിൽ നിന്നും രക്ഷിച്ചെടുത്ത്, എല്ലാ പ്രശ്നവും പരിഹരിച്ച് വൈകുന്നേരത്തോടെ സിനിമ റിലീസാകുമെന്ന് പ്രതീക്ഷിക്കുന്നു. എല്ലാവരും അതിനായി ശ്രമിക്കുകയാണ്. സൂര്യ സാർ അടക്കം ഒരുപാട് പേർ ഇതിനായി വിട്ടുവീഴ്ചകൾ ചെയ്തിട്ടുണ്ട്.
ഈ കാലതാമസ്സത്തിനും നിങ്ങൾക്ക് നേരിടേണ്ടി വന്ന ബുദ്ധിമുട്ടുകൾക്കും ക്ഷമ ചോദിക്കുന്നു. പക്ഷെ ഇതിനെല്ലാം അർത്ഥമുണ്ടാകും. ഇന്ന് വൈകുന്നേരം സിനിമ എത്തും, അത് ഗംഭീരമായിരിക്കും. നിങ്ങൾക്ക് അത് ഇഷ്ടപ്പെടുമെന്ന് ഞാൻ വിശ്വസിക്കുന്നു. ഞാൻ പറയാറുള്ളതുപോലെ 'കറുപ്പ് വരും'. വഴി മറക്കില്ല. ഇപ്പോഴും ഒരുപാട് പേർ തടസ്സങ്ങൾ ഉണ്ടാക്കുന്നുണ്ട്, ഒരുപാട് കാര്യങ്ങൾ മറയ്ക്കപ്പെടുന്നുണ്ട്. എങ്കിലും എല്ലാത്തിനെയും മറികടന്ന് ഇന്ന് വൈകുന്നേരം സിനിമ എത്തുമെന്ന് ഞാൻ വിശ്വസിക്കുന്നു. ദൈവം കൂടെയുണ്ട്, എല്ലാം ശുഭമായി ഭവിക്കും. സിനിമ നല്ലതായിരിക്കും, നിങ്ങൾക്കത് ഇഷ്ടപ്പെടും. എല്ലാവരെയും ദൈവം അനുഗ്രഹിക്കട്ടെ,നന്ദി,' എന്നാണ് ബാലാജി പറഞ്ഞത്.
അതേസമയം, കറുപ്പ് ഇന്ന് രാത്രിയും തിയേറ്ററുകളിലെത്തില്ലെന്നാണ് പുതിയ റിപ്പോർട്ടുകൾ. വരും ദിവസങ്ങളിൽ പ്രശ്നങ്ങളെല്ലാം പരിഹരിച്ച ശേഷമായിരിക്കും ചിത്രം തിയേറ്ററുകളിലെത്തുക എന്നും ഈ റിപ്പോർട്ടുകളിൽ പറയുന്നു.
Content Highlights: Dulquer Salmaan supports R J Balaji in Karuppu movie release issues. shares his solidarity through a comment under video post
