Get the latest news at
your fingertips!
Download our app now
LIVE TV
Search
വിനീത് ശ്രീനിവാസൻ സംവിധാനത്തിൽ നോബിൾ ബാബു നായകനായി അഭിനയിച്ച 'കരം' ഇന്ന് തിയേറ്ററുകളിലെത്തി. ചിത്രം കണ്ടിറങ്ങിയ സുചിത്ര മോഹൻലാലിന്റെ വാക്കുകളാണ് ഇപ്പോൾ സോഷ്യൽ മീഡിയയിൽ ട്രെൻഡിങ്ങായി മാറിയിരിക്കുന്നത്. വിനീതിന് ഫീൽ ഗുഡ് മാത്രമല്ല ഇങ്ങനെയും സിനിമ എടുക്കാമെന്ന് തെളിയിച്ചുവെന്നും കരം വളരെ നന്നായിട്ടുണ്ടെന്നും സുചിത്ര പറഞ്ഞു.
'വിനീതിന് ഫീൽ ഗുഡ് മാത്രമല്ല ഇങ്ങനെയും സിനിമ എടുക്കാമെന്ന് തെളിയിച്ചു. നമ്മൾ ഒട്ടും പ്രതീക്ഷിച്ചില്ല ഇങ്ങനെ ഒരു ചിത്രം, വളരെ നന്നായിട്ടുണ്ട്', സുചിത്ര മോഹൻലാൽ പറഞ്ഞു. പക്ഷേ സോഷ്യൽ മീഡിയയിൽ ചിത്രത്തിന് സമ്മിശ്ര പ്രതികരണങ്ങളാണ് ലഭിക്കുന്നത്. നോബിൾ ബാബുവിന്റെ ആക്ഷൻ രംഗങ്ങൾ അടിപൊളിയാണെന്നും വിനീത് ഒരു ഗൗതം മേനോൻ സ്റ്റൈലിൽ ആണ് കരം ഒരുക്കിയിരിക്കുന്നതെന്നും ചിലർ അഭിപ്രായപ്പെടുന്നു.
വർഷങ്ങൾക്ക് ശേഷം എന്ന ചിത്രത്തിന് ശേഷം വിനീത് ട്രാക്ക് മാറ്റി ചെയ്ത സിനിമ ആയതിനാൽ പ്രതീക്ഷയ്ക്ക് ഒപ്പം എത്താൻ സാധിച്ചിട്ടില്ല എന്നാണ് ഓൺലൈൻ പോർട്ടലുകൾ പറയുന്നത്. വരും ദിവസങ്ങളിൽ ഈ പ്രേക്ഷകരുടെ പ്രതികരണം മാറാൻ സാധ്യതയുണ്ടെന്നാണ് സോഷ്യൽ മീഡിയയിലെ അഭിപ്രായം.
വലിയ ബജറ്റില്‍ ഒരുങ്ങുന്ന കരം ജോര്‍ജിയ, റഷ്യയുടെയും അസര്‍ബൈജാന്റെയും അതിര്‍ത്തികള്‍ എന്നിവിടങ്ങളിലായാണ് ഷൂട്ടിങ് പൂര്‍ത്തിയായിരിക്കുന്നത്. ജോമോന്‍ ടി. ജോണ്‍ ഛായാഗ്രഹണം നിര്‍വഹിക്കുന്ന സിനിമയില്‍ ഷാന്‍ റഹ്‌മാനാണ് സംഗീതം. തട്ടത്തിന്‍ മറയത്ത്, തിര, ജേക്കബിന്റെ സ്വര്‍ഗരാജ്യം എന്നീ ചിത്രങ്ങള്‍ക്കു ശേഷം വിനീതിനൊപ്പം ജോമോനും ഷാനും വീണ്ടും ഒരുമിക്കുന്ന ചിത്രമാണിത്.
രഞ്ജന്‍ എബ്രഹാമാണ് എഡിറ്റിങ്. ഓഡ്രി മിറിയവും രേഷ്മ സെബാസ്റ്റ്യനുമാണ് നായികമാര്‍. മനോജ് കെ ജയന്‍, കലാഭവന്‍ ഷാജോണ്‍, ബാബുരാജ്, വിഷ്ണു ജി. വാരിയര്‍, ജോണി ആന്റണി എന്നിവരാണ് ചിത്രത്തിലെ മറ്റ് അഭിനേതാക്കള്‍. സിനിമയുടെ ഓവര്‍സീസ് വിതരണ അവകാശം ഫാര്‍സ് ഫിലിംസാണ് സ്വന്തമാക്കിയിരിക്കുന്നത്.
Content Highlights: Suchithra Mohanlal about Karam Movie
