LIVE TV
രാജ്യത്തെ ഏറ്റവും വലിയ കാർ നിർമാതാക്കളായ മാരുതി സുസുക്കി ഇന്ത്യ വാഹനങ്ങളുടെ വില വീണ്ടും ഉയർത്തുന്നു. കമ്പനിയുടെ വിവിധ മോഡലുകൾക്ക് 2026 ഓഗസ്റ്റ് മുതൽ 30,000 വരെ വില വർധിപ്പിക്കുമെന്നാണ് മാരുതിയുടെ പ്രഖ്യാപനം. മോഡലിനും വേരിയന്റിനും അനുസരിച്ചായിരിക്കും വിലവർധന.
കഴിഞ്ഞ രണ്ട് മാസത്തിനിടെ മാരുതി പ്രഖ്യാപിക്കുന്ന രണ്ടാമത്തെ വില വർധന കൂടിയാണിത്. ജൂണിലും കമ്പനി വാഹനങ്ങളുടെ വില ഉയർത്തിയിരുന്നു. അസംസ്കൃത വസ്തുക്കളുടെ വില വർധന, നിർമാണച്ചെലവ്, ലോജിസ്റ്റിക്സ് ചെലവ്, മറ്റ് പ്രവർത്തനച്ചെലവുകൾ എന്നിവ തുടർച്ചയായി ഉയരുന്ന സാഹചര്യത്തിലാണ് പുതിയ വിലപരിഷ്കരണമെന്ന് കമ്പനി വ്യക്തമാക്കിയത്.
വിലക്കയറ്റത്തിന്റെ ആഘാതം പരമാവധി ഏറ്റെടുക്കാൻ ശ്രമിച്ചെങ്കിലും മുഴുവൻ ചെലവും കമ്പനിക്ക് വഹിക്കാൻ കഴിയാത്ത സാഹചര്യത്തിലാണ് അതിന്റെ ഒരു ഭാഗം ഉപഭോക്താക്കളിലേക്ക് കൈമാറുന്നതെന്ന് മാരുതി അറിയിച്ചു.
അൾട്ടോ K10, വാഗൺആർ, സ്വിഫ്റ്റ്, ഡിസയർ, ബ്രെസ, എർട്ടിഗ ഉൾപ്പെടെയുള്ള അറീന മോഡലുകൾക്കും ബലേനോ, ഫ്രോങ്ക്സ്, ഗ്രാൻഡ് വിറ്റാര, XL6, ജിംനി തുടങ്ങിയ നെക്സ ശ്രേണിയിലെ വാഹനങ്ങൾക്കും വിലവർധന ബാധകമാകും. എന്നാൽ ഓരോ മോഡലിനും എത്ര രൂപ വർധിക്കുമെന്നത് കമ്പനി ഇതുവരെ വ്യക്തമാക്കിയിട്ടില്ല.
അസംസ്കൃത വസ്തുക്കളുടെ വിലക്കയറ്റവും വിതരണ ശൃംഖലയിലെ ചെലവുകളും കാരണം രാജ്യത്തെ പല വാഹന നിർമാതാക്കളും അടുത്തിടെ വില വർധിപ്പിച്ചിരുന്നു. അതിന്റെ തുടർച്ചയായാണ് മാരുതിയുടെയും പുതിയ തീരുമാനം. ഓഗസ്റ്റിന് വിലവർധന പ്രാബല്യത്തിൽ വരുംമുൻപ് വാഹനം ബുക്ക് ചെയ്യാൻ ഉപഭോക്താക്കൾക്ക് കമ്പനി സൂചന നൽകിയിരിക്കുകയാണ്.
Content highlights: Maruti Suzuki to hike prices by up to ₹30,000 across models from August
