LIVE TV
ആഗോള എണ്ണവിലയില് ഇടിവ് തുടരുന്നതിനിടെ, ഡീസലിന്റെയും എവിയേഷന് ടര്ബൈന് ഫ്യൂവലിന്റെയും (എടിഎഫ്) കയറ്റുമതിക്കുള്ള വിന്ഡ്ഫോള് നികുതി കേന്ദ്ര സര്ക്കാര് കുറച്ചു. അതേസമയം, ആഭ്യന്തര വിപണിയില് ആവശ്യത്തിന് പെട്രോള് ലഭ്യമാക്കുന്നതിനായി പെട്രോള് കയറ്റുമതി നികുതി വര്ധിപ്പിച്ചു. സര്ക്കാര് ഇത് സംബന്ധിച്ച് ഉത്തരവ് പുറത്തിറക്കി.
പുതിയ നികുതി നിരക്കുകള്
ഡീസല് കയറ്റുമതി നികുതി ലിറ്ററിന് 14 രൂപയില് നിന്ന് 8.50 രൂപയായി കുറച്ചു. ഏവിയേഷന് ടര്ബൈന് ഫ്യൂവല് (എടിഎഫ്) കയറ്റുമതി നികുതി ലിറ്ററിന് 12.50 രൂപയില് നിന്ന് 7.50 ആയി കുറച്ചു. അതേസമയം, പെട്രോള് കയറ്റുമതി നികുതി ലിറ്ററിന് 1.50 രൂപയില് നിന്ന് 4 രൂപയായി ഉയര്ത്തി. പുതിയ നികുതി നിരക്കുകള് ജൂലൈ 1 മുതല് പ്രാബല്യത്തില് വരും.
എണ്ണവിലയിലെ ഇടിവ്
ഒരു ബാരലിന് 126 ഡോളറിന് മുകളിലായിരുന്ന ആഗോള ക്രൂഡ് ഓയില് വില ഇപ്പോള് ഗണ്യമായി കുറഞ്ഞിട്ടുണ്ട്. പശ്ചിമേഷ്യയിലെ സംഘര്ഷാവസ്ഥയില് ആശ്വാസമുണ്ടായതും ഹോര്മുസ് കടലിടുക്കിലൂടെയുള്ള കപ്പല് ഗതാഗതം സാധാരണ നിലയിലായതുമാണ് വിതരണ തടസ്സത്തെക്കുറിച്ചുള്ള ആശങ്കകള് കുറയാന് കാരണമായത്. സാമ്പത്തിക വിദഗ്ധരുടെ വിലയിരുത്തല് പ്രകാരം, ഈ വര്ഷം ബ്രെന്റ് ക്രൂഡ് ഓയില് ശരാശരി ഒരു ബാരലിന് 84.50 ഡോളര് ആയിരിക്കുമെന്നാണ് പ്രതീക്ഷ. കഴിഞ്ഞ മാസം ഇത് 90.44 ഡോളര് ആയിരിക്കുമെന്നായിരുന്നു പ്രവചനം.
അയല്രാജ്യങ്ങള്ക്കുള്ള ഇളവ്
വിന്ഡ്ഫോള് നികുതി ഏര്പ്പെടുത്തിയ സമയത്ത്, പൊതുമേഖലാ എണ്ണക്കമ്പനികള് നേപ്പാള്, ഭൂട്ടാന്, ബംഗ്ലാദേശ്, ശ്രീലങ്ക എന്നിവിടങ്ങളിലേക്ക് നടത്തുന്ന പെട്രോള്, ഡീസല്, എടിഎഫ് കയറ്റുമതിക്ക് നികുതി ഇളവ് അനുവദിച്ചിരുന്നു. ഇപ്പോള് ഈ ഇളവ് മൗറീഷ്യസ്, മാലിദ്വീപ് എന്നീ രാജ്യങ്ങളിലേക്കുള്ള പൊതുമേഖലാ എണ്ണക്കമ്പനികളുടെ കയറ്റുമതികള്ക്കും സര്ക്കാര് വ്യാപിപ്പിച്ചിട്ടുണ്ട്.
Content Highlights: India has reduced export taxes on diesel and aviation turbine fuel while increasing the duty on petrol exports from July 1, aiming to balance domestic fuel availability as global crude oil prices continue to decline
