LIVE TV
വോഡാഫോണ് ഐഡിയയില് നിക്ഷേപം നടത്താന് ആലോചിച്ച് JSW ഗ്രൂപ്പ്. ടെലികോം കമ്പനിയെ വീണ്ടും ശക്തമാക്കാന് സര്ക്കാര് നിക്ഷേപകനെ തിരയുന്ന സാഹചര്യത്തിലാണ് ഈ നീക്കം. നിലവില് വലിയ കടബാധ്യതയും സാമ്പത്തിക പ്രശ്നങ്ങളും നേരിടുകയാണ് വോഡാഫോണ് ഐഡിയ. കമ്പനി നിലനിര്ത്തണമെങ്കില് വലിയ നിക്ഷേപം ആവശ്യമാണ്.
നിലവിലെ ചര്ച്ചകള് പ്രാഥമിക ഘട്ടത്തിലാണ്. ഏകദേശം 45,000 കോടി രൂപ മുതല് 60,000 കോടി രൂപ വരെ നിക്ഷേപം ഉണ്ടാകാമെന്നാണ് വിലയിരുത്തല്. എന്നാല് ഇതുവരെ ഔദ്യോഗികമായ തീരുമാനം അറിയിച്ചിട്ടില്ല. വോഡാഫോണ് ഐഡിയയിലെ ഏറ്റവും വലിയ ഓഹരിയുടമ ഇപ്പോള് കേന്ദ്ര സര്ക്കാര് ആണ്. ഏകദേശം 48.99% ഓഹരിയാണ് സര്ക്കാര് വഹിക്കുന്നത്.
2025 മാര്ച്ചില് സ്പെക്ട്രം കുടിശികകള് ഓഹരികളാക്കി മാറ്റിയതിനെത്തുടര്ന്നാണ് സര്ക്കാര് ഏറ്റവും വലിയ ഓഹരിയുടമയായത്. ഇപ്പോള് കമ്പനിയുടെ പ്രമോട്ടര് ഗ്രൂപ്പായ ആദിത്യ ബിര്ള ഗ്രൂപ്പും വോഡഫോണ് കമ്പനിയും ചേര്ന്ന് ഏകദേശം 25.57% ഓഹരി കൈവശം വെക്കുന്നു. ശേഷിക്കുന്ന ഓഹരികള് പൊതുജന നിക്ഷേപകരുടേതാണ്.
നിലവിലെ വിഐയുടെ പ്രതിസന്ധിയെ മറികടക്കാനായില്ലെങ്കില് ഇന്ത്യയിലെ ടെലികോം വിപണി രണ്ട് സ്വകാര്യ കമ്പനികളിലേക്കായി മാത്രം ചുരുങ്ങും എന്നതാണ് പ്രധാന ആശങ്ക. ഭാരതി എയര്ടെലും റിലയന്സ് ജിയോയുമാണ് നിലവില് ടെലികോം വിപണിയിലെ രണ്ട് പ്രധാന കമ്പനികള്. ലോകത്തിലെ ഏറ്റവും വലിയ ടെലികോം വിപണികളിലൊന്നായ ഇന്ത്യയില് മത്സരം കുറയുമെന്ന ആശങ്കയും ഉയരുകയാണ്.
കഴിഞ്ഞ കുറച്ച് വര്ഷങ്ങളായി നിലവിലെ പ്രമോട്ടര്മാര് കമ്പനിയില് വലിയ തോതില് പണം നിക്ഷേപിക്കാത്തതും, കൂടാതെ കമ്പനി നേരിടുന്ന വലിയ നിയമപരമായ ബാധ്യതകളും വിഐക്ക് തിരിച്ചടിയാണ്. നെറ്റ്വര്ക്ക് വികസനത്തിനുള്ള ചെലവുകളും കമ്പനിയുടെ തിരിച്ചുവരവിനെ ബാധിച്ചിട്ടുണ്ട്.
നിലവില് നടക്കുന്ന ചര്ച്ച വിജയിക്കുകയാണെങ്കില് വോഡാഫോണ് ഐഡിയ പുതിയ ഓഹരികള് പുറത്തിറക്കി അവ JSW ഗ്രൂപ്പുമായി ബന്ധപ്പെട്ട സ്ഥാപനങ്ങള്ക്കു നല്കിയേക്കും. ഇതിലൂടെ JSW ഗ്രൂപ്പ് കമ്പനിയിലെ പ്രധാന ഓഹരിയുടമയായി മാറും. അതോടെ നിലവിലുള്ള ഓഹരിയുടമകളുടെ ഓഹരി വിഹിതം കുറയാനും സാധ്യതയുണ്ട്.
Content Highlights: Reports suggest that the JSW Group is considering a major investment to help revive Vodafone Idea.
