LIVE TV
ഇന്ത്യയിൽ നിർമ്മിക്കുന്ന എകെ-203 അസാൾട്ട് റൈഫിളുകൾക്കാവശ്യമായ വെടിയുണ്ടകൾ വിതരണം ചെയ്യാൻ അദാനി ഡിഫൻസ് ആൻഡ് എയ്റോസ്പേസിന് അഞ്ച് വർഷത്തെ കരാർ. ഇന്ത്യ-റഷ്യ സംയുക്ത സംരംഭമായ ഇൻഡോ-റഷ്യൻ റൈഫിൾസ് പ്രൈവറ്റ് ലിമിറ്റഡുമായാണ് കരാർ. 7.62×39 മില്ലിമീറ്റർ വെടിയുണ്ടകളാണ് അദാനി ഡിഫൻസ് ആഭ്യന്തരമായി നിർമ്മിച്ച് വിതരണം ചെയ്യുക. ഇതോടെ എകെ-203 പദ്ധതിയിൽ റൈഫിളിനൊപ്പം അതിന് ആവശ്യമായ വെടിയുണ്ടകളുടെയും ആഭ്യന്തര ഉൽപ്പാദനം കൂടുതൽ ശക്തമാകും.
റഷ്യൻ സഹകരണത്തോടെ ഇന്ത്യയിൽ നിർമ്മിക്കുന്ന എകെ-203 റൈഫിളുകളുടെ നിർമ്മാണ കേന്ദ്രം ഉത്തർപ്രദേശിലെ അമേഠിയിലാണ്. പദ്ധതിയുടെ ഭാഗമായി ഇന്ത്യയിൽ തന്നെ ഘടകങ്ങളും സാങ്കേതികവിദ്യകളും വികസിപ്പിക്കുന്നതിനുള്ള പ്രവർത്തനങ്ങളും പുരോഗമിക്കുകയാണ്. അദാനി ഡിഫൻസിന് ഇതിനകം തന്നെ ചെറുകാലിബർ വെടിയുണ്ടകൾ നിർമ്മിക്കാനുള്ള ശേഷിയുണ്ട്. പുതിയ കരാർ പ്രതിരോധ മേഖലയിലെ സ്വകാര്യ കമ്പനികളുടെ പങ്കാളിത്തം കൂടുതൽ ശക്തമാക്കുന്നതോടൊപ്പം ഇന്ത്യയുടെ ആഭ്യന്തര പ്രതിരോധ ഉൽപ്പാദന ശേഷിക്കും വലിയ പ്രാധാന്യം നൽകുന്നതാണ്.
വിദേശ ഇറക്കുമതിയിലുള്ള ആശ്രയം കുറച്ച് നിർണായക പ്രതിരോധ സാമഗ്രികൾ ഇന്ത്യയിൽ തന്നെ നിർമ്മിക്കുക എന്ന ‘ആത്മനിർഭർ ഭാരത്’, ‘മേക് ഇൻ ഇന്ത്യ’ ലക്ഷ്യങ്ങളുമായി ഈ നീക്കം ചേർന്നുനിൽക്കുന്നു. എകെ-203 റൈഫിളുകളുടെ പ്രവർത്തന സജ്ജതയ്ക്ക് ആവശ്യമായ വെടിയുണ്ടകളുടെ സ്ഥിരമായ വിതരണം ഉറപ്പാക്കാനും കരാർ സഹായിക്കും.
2021 ഡിസംബറിൽ ഇന്ത്യൻ സായുധസേനയ്ക്കായി 6,01,427 എകെ-203 റൈഫിളുകൾ നിർമ്മിക്കുന്നതിനുള്ള കരാർ ഐആർആർപിഎല്ലിന് ലഭിച്ചിരുന്നു.
അതേസമയം, പുതിയ കരാർ പ്രകാരം എകെ-203യ്ക്ക് ആവശ്യമായ 7.62×39 മില്ലിമീറ്റർ വെടിയുണ്ടകൾ അദാനി ഡിഫൻസ് കാൻപൂരിലെ സ്വന്തം നിർമ്മാണ കേന്ദ്രത്തിൽ നിർമിച്ച് വിതരണം ചെയ്യും. ഇതോടെ റൈഫിളും അതിനുള്ള വെടിയുണ്ടയും ഇന്ത്യയിലെ ആഭ്യന്തര പ്രതിരോധ ഉൽപ്പാദന ശൃംഖലയുമായി കൂടുതൽ ബന്ധപ്പെടുകയാണ്.
Content HIghlights: Adani Defence signs 5-year ammunition deal for India-made AK-203 assault rifles: All you need to know
