LIVE TV
മുംബൈ: കഴിഞ്ഞ ഒരു വർഷമായി സ്വർണ്ണവിലയിലുണ്ടായ വർധനവ് ഇന്ത്യക്കാരുടെ വായ്പയെടുക്കൽ സ്വഭാവത്തിൽ വലിയ മാറ്റം വരുത്തിയതായി സാമ്പത്തിക വിദഗ്ദ്ധർ. പണ്ട് കാലങ്ങളിൽ കുടുംബത്തിൽ എന്തെങ്കിലും അടിയന്തര സാഹചര്യങ്ങളോ ബുദ്ധിമുട്ടുകളോ വരുമ്പോൾ 'അവസാന ആശ്രയം' എന്ന നിലയിലാണ് ആളുകൾ സ്വർണ്ണം പണയം വെച്ചിരുന്നതെങ്കിൽ, ഇന്നത് ബിസിനസ്സ് വളർച്ചയ്ക്കും വിദേശയാത്രകൾക്കും ഉന്നത വിദ്യാഭ്യാസത്തിനുമുള്ള പ്രധാന സാമ്പത്തിക മാർഗ്ഗമായി മാറിയിരിക്കുന്നു. അടുത്ത കാലത്തായി സ്വർണ്ണവിലയിൽ നേരിയ കുറവുണ്ടായിട്ടുണ്ടെങ്കിലും, സ്വർണ്ണപ്പണയ വായ്പകളോടുള്ള താല്പര്യം ഇപ്പോഴും തുടരുകയാണ്.
വായ്പയെടുക്കുന്നവരുടെ ക്രെഡിറ്റ് യോഗ്യതയിൽ (Creditworthiness) വലിയ വർദ്ധനവാണ് ഉണ്ടായിരിക്കുന്നത്. മുൻപ് ഉയർന്ന ക്രെഡിറ്റ് റേറ്റിംഗ് ഉള്ള ഉപഭോക്താക്കൾ സ്വർണ്ണപ്പണയ വായ്പകളിൽ 43% മാത്രമായിരുന്നെങ്കിൽ, ഇന്നത് 52%-ലേക്ക് ഉയർന്നതായി ആനന്ദ് രാഠി ഗ്ലോബൽ ഫിനാൻസ് സി.ഇ.ഒ സിമ്രാൻജീറ്റ് സിങ് വ്യക്തമാക്കുന്നു. ശമ്പള വളർച്ച മന്ദഗതിയിലായ വിപണിയിൽ സ്വർണ്ണത്തെ ഒരു നിക്ഷേപമായി മാത്രം മാറ്റിവെക്കാതെ കൃത്യമായി ഉപയോഗപ്പെടുത്താൻ ജനങ്ങൾ പഠിച്ചതിന്റെ സൂചനയാണിതെന്നും അദ്ദേഹം പറയുന്നു.
ഉയർന്ന സ്വർണ്ണവില ഉപയോഗിച്ച് നിലവിലുള്ള വായ്പക്കാർ വലിയ തുകകൾ വായ്പയെടുക്കാനും പഴയ കടങ്ങൾ പുതുക്കാനും ഉപയോഗിക്കുന്നതായി റിസർവ് ബാങ്ക് ഓഫ് ഇന്ത്യയുടെ ഫിനാൻഷ്യൽ സ്റ്റെബിലിറ്റി റിപ്പോർട്ടും വ്യക്തമാക്കുന്നു. റിസർവ് ബാങ്ക് പുറത്തുവിട്ട ഏറ്റവും പുതിയ കണക്കുകൾ പ്രകാരം സ്വർണ്ണപ്പണയ മേഖലയിൽ അസാധാരണമായ വളർച്ചയാണ് രേഖപ്പെടുത്തിയിരിക്കുന്നത്.
ബാങ്കുകൾ വഴിയുള്ള സ്വർണ്ണപ്പണയ വായ്പകളിൽ 105% എന്ന വമ്പൻ വാർഷിക വളർച്ചയാണ് ഉണ്ടായത്. മേയ് മാസത്തെ കണക്കനുസരിച്ച് മൊത്തം 5.1 ലക്ഷം കോടി രൂപയുടെ സ്വർണ്ണ വായ്പകളാണ് ബാങ്കുകൾ നൽകിയിട്ടുള്ളത്. രണ്ട് വർഷം മുൻപ് ബാങ്കുകളുടെ ആകെ വായ്പകളിൽ 0.64% മാത്രമായിരുന്ന സ്വർണ്ണ വായ്പകൾ ഇപ്പോൾ 2.4% ആയി ഉയർന്നു. എൻബിഎഫ്സികൾ വഴി സ്വർണ്ണാഭരണങ്ങൾക്ക്മേൽ നൽകിയ വായ്പകളിൽ 70% വാർഷിക വളർച്ചയുണ്ടായി. ഇത് നിലവിൽ 3.3 ലക്ഷം കോടി രൂപയായി ഉയർന്നു.
മൊത്തം വായ്പകളിൽ സ്വർണ്ണപ്പണയത്തിന്റെ പങ്ക് 2022 മാർച്ചിൽ 5.9% ആയിരുന്നത് 2025 ഡിസംബറോടെ 11.1%-ലേക്ക് കുതിച്ചുയർന്നു. ഭവന വായ്പകൾക്ക് തൊട്ടുപിന്നിൽ രാജ്യത്ത് ഏറ്റവും കൂടുതൽ ആളുകൾ ആശ്രയിക്കുന്ന വായ്പയായി സ്വർണ്ണപ്പണയം മാറി കഴിഞ്ഞു. സ്വർണ്ണപ്പണയം കൂടുന്നതിനനുസരിച്ച് ആളുകൾ പേഴ്സണൽ ലോണുകൾ എടുക്കുന്നത് കുറയുന്നതായും ആർബിഐ നിരീക്ഷിക്കുന്നു.
ആഗോളതലത്തിൽ സ്വർണ്ണവില ഒരു ഔൺസിന് 5,500 ഡോളർ എന്ന എക്കാലത്തെയും ഉയർന്ന നിരക്കിലെത്തിയ ശേഷമാണ് ഈ കുതിച്ചുചാട്ടമുണ്ടായത്. എന്നാൽ ഇപ്പോൾ വില ഏകദേശം 4,000 ഡോളർ നിരക്കിലേക്ക് കുറഞ്ഞിട്ടുണ്ട്. സ്വർണ്ണവിലയിലുണ്ടാകുന്ന ഈ വലിയ ചാഞ്ചാട്ടം തുടർച്ചയായ നിരീക്ഷണം അർഹിക്കുന്ന ഒന്നാണെന്ന് റിസർവ് ബാങ്ക് മുന്നറിയിപ്പ് നൽകുന്നു. സ്വർണ്ണവിലയിൽ ദീർഘകാലത്തേക്ക് ഇടിവുണ്ടായാൽ അത് വായ്പ നൽകിയ സ്ഥാപനങ്ങളുടെ സുരക്ഷിതത്വത്തെ ബാധിക്കുകയും, വായ്പ തിരിച്ചടവിൽ കുടിശ്ശിക വരുത്താൻ (Delinquencies) കാരണമാകുകയും ചെയ്തേക്കാം.
Content Highlights: Gold loans are increasingly becoming a mainstream borrowing option rather than a last resort, as higher gold prices allow borrowers to access larger amounts of secured credit. At the same time, demand for personal loans has slowed, reflecting a shift towards gold-backed lending due to easier access, lower interest rates, and changing borrowing preferences.
