LIVE TV
നഗര മേഖലകളിലെ ഉപഭോഗം ദുര്ബലമാകുന്നത് കമ്പനികള്ക്ക് വെല്ലുവിളിയാവുമെന്ന് പ്രോക്ടര് ആന്ഡ് ഗാംബിള്. ഗ്രാമീണ ഉപഭോഗം ഇപ്പോഴും നഗര ഉപഭോഗത്തേക്കാള് ശക്തമാണെങ്കിലും, സമീപകാലത്ത് ഉയര്ന്ന പണപ്പെരുപ്പം ആളുകളുടെ ഉപഭോഗം കുറയാന് കാരണമാകുന്നതായി പി&ജി ഹൈജീന് ഹെല്ത്ത്കെയര് & ജില്ലെറ്റ് ഇന്ത്യ ചീഫ് ഫിനാന്ഷ്യല് ഓഫീസറായ ശ്രീവിദ്യ ശ്രീനിവാസന് അഭിപ്രായപ്പെട്ടു. പശ്ചിമേഷ്യയിലെ സംഭവവികാസങ്ങളും കമ്പനി സൂക്ഷ്മമായി നിരീക്ഷിക്കുന്നുണ്ടെന്ന് അവര് വ്യക്തമാക്കി. എണ്ണവിലയില് ഉണ്ടാകുന്ന മാറ്റങ്ങള് അസംസ്കൃത വസ്തുക്കളുടെ ചെലവിനെ നേരിട്ട് ബാധിക്കുന്നുമുണ്ട്.
ക്രൂഡ് ഓയില് വില ഉയരുന്നു
മാര്ച്ചിന് ശേഷം ക്രൂഡ് ഓയില് വില 30% മുതല് 50% വരെ ഉയര്ന്നു. ക്രൂഡുമായി ബന്ധപ്പെട്ട റെസിന്, പ്ലാസ്റ്റിക് തുടങ്ങിയ അസംസ്കൃത വസ്തുക്കളുടെയും വില ഗണ്യമായി വര്ധിച്ചിട്ടുണ്ട്. എന്നാല് ദീര്ഘകാല വിതരണ കരാറുകളും ഉല്പ്പാദനക്ഷമത വര്ധിപ്പിക്കുന്ന പദ്ധതികളും ഉള്ളതിനാല് വിതരണ ശൃംഖലയില് തടസ്സങ്ങളൊന്നും ഉണ്ടായിട്ടില്ലെന്ന് കമ്പനി വ്യക്തമാക്കി.
ലോകത്തിലെ ഏറ്റവും വലിയ ഉപഭോക്തൃ ഉല്പ്പന്ന നിര്മ്മാതാക്കളിലൊന്നായ P&G ഇന്ത്യയില് നാല് കമ്പനികളിലൂടെയാണ് പ്രവര്ത്തിക്കുന്നത്. 2024 സാമ്പത്തിക വര്ഷത്തില് ഇന്ത്യയില് കമ്പനി 2 ബില്യണ് ഡോളറിലധികം വില്പ്പന നേടിയിരുന്നു. പി ആന്ഡ് ജിയുടെ ആഗോള വിപണികളില് ഇന്ത്യ ഇപ്പോള് ആദ്യ 10 വിപണികളിലൊന്നാണ്.
സാനിറ്ററി നാപ്കിനുകളുടെയും ഷേവിംഗ് റേസറുകളുടെയും ഇന്ത്യന് വിപണിയില് കമ്പനിക്ക് 50 ശതമാനത്തിലധികം വിപണി വിഹിതമുണ്ട്. വിപണി നിരീക്ഷിക്കുകയാണെങ്കില് ഉപഭോക്താക്കളുടെ വാങ്ങല് ശൈലി മാറുന്നത് പ്രകടമാണ്. ഉയര്ന്ന ജീവിതച്ചെലവുകള് ഇന്ത്യന് ഉപഭോക്താക്കളുടെ മനോഭാവത്തില് വലിയ മാറ്റം സൃഷ്ടിച്ചിട്ടുണ്ട്. പണം കൈവശമുള്ള ഉപഭോക്താക്കള് പോലും ഇപ്പോള് കൂടുതല് കൃത്യതയോടെയും ആലോചിച്ചും ചെലവഴിക്കുന്നുവെന്ന് കമ്പനി നിരീക്ഷിച്ചു.
അതേസമയം, ഉപഭോക്താക്കള് മികച്ച നിലവാരമുള്ള ഉല്പ്പന്നങ്ങള് ആഗ്രഹിക്കുന്നു. ക്വിക്ക് കൊമേഴ്സ്, സോഷ്യല് കൊമേഴ്സ്, ആര്ട്ടിഫിഷ്യല് ഇന്റലിജന്സ് അടിസ്ഥാനമാക്കിയുള്ള ഷോപ്പിങ് എന്നിവ വ്യാപകമായതോടെ വാങ്ങല് കൂടുതല് സെലക്ടീവായി മാറിയതായി പി ആന്ഡ് ജി ചീഫ് എക്സിക്യൂട്ടിവ് വി. കുമാര് പറഞ്ഞു.
സമീപകാല വെല്ലുവിളികള് നിലനില്ക്കുന്നുണ്ടെങ്കിലും ഇന്ത്യയുടെ ദീര്ഘകാല വളര്ച്ചാ സാധ്യതകളില് കമ്പനി ആത്മവിശ്വാസം പ്രകടിപ്പിച്ചു. വിപണി വിഹിതം വര്ധിപ്പിക്കുന്നതിലുപരി പുതിയ ഉപഭോക്താക്കളെ സൃഷ്ടിച്ച് വിപണി വികസിപ്പിക്കുന്നതിലാണ് കമ്പനി കൂടുതല് ശ്രദ്ധ കേന്ദ്രീകരിക്കുന്നതെന്ന് ശ്രീവിദ്യ ശ്രീനിവാസന് പറഞ്ഞു.
പി&ജി ഹൈജീന് ആന്ഡ് ഹെല്ത്ത്കെയറിന്റെ 2026 സാമ്പത്തിക വര്ഷത്തിലെ അവസാന പാദഫലം പരിശോധിക്കുകയാണെങ്കില് നേരിയ സമ്മര്ദം പ്രകടമായിരുന്നു. കമ്പനിയുടെ അറ്റാദായം 2 ശതമാനം കുറഞ്ഞ് 153 കോടി രൂപയായപ്പോള്, പ്രവര്ത്തന വരുമാനം 5 ശതമാനം ഇടിഞ്ഞ് 941 കോടി രൂപയിലെത്തി. എന്നാല് വാര്ഷിക അടിസ്ഥാനത്തില് കമ്പനി മികച്ച പ്രകടനമാണ് കാഴ്ചവെച്ചത്. 2026 സാമ്പത്തിക വര്ഷത്തില് അറ്റാദായം 19 ശതമാനം ഉയര്ന്ന് 857 കോടി രൂപയായി. വില്പ്പനയില് വലിയ വളര്ച്ച രേഖപ്പെടുത്തിയില്ലെങ്കിലും ഉല്പ്പാദനക്ഷമത മെച്ചപ്പെടുത്തിയതും മാര്ജിനുകള് വര്ധിപ്പിച്ചതുമാണ് ലാഭ വര്ധനയ്ക്ക് പ്രധാന കാരണമായത്.
അതേസമയം, ജില്ലെറ്റ് ഇന്ത്യ 2026 സാമ്പത്തിക വര്ഷത്തില് ശക്തമായ വളര്ച്ച രേഖപ്പെടുത്തി. കമ്പനിയുടെ വരുമാനം 8 ശതമാനം ഉയര്ന്ന് 3,100 കോടി രൂപയായപ്പോള്, അറ്റാദായം 23 ശതമാനം വര്ധിച്ച് 654 കോടി രൂപയിലെത്തി. പ്രീമിയം ഉല്പ്പന്നങ്ങളിലേക്കുള്ള ഉപഭോക്തൃ താല്പര്യം വര്ധിച്ചതും വിപണി വ്യാപനവും ചെലവ് നിയന്ത്രണ നടപടികളും മികച്ച സാമ്പത്തിക പ്രകടനത്തിന് പിന്തുണ നല്കിയതായി കമ്പനി അറിയിച്ചു.
Content Highlights: P&G India has reported signs of slowing urban consumption as rising inflation and higher commodity prices weigh on consumer spending. While rural demand remains stronger, the company says Indian consumers are becoming more cautious with their purchases amid increasing living costs
