LIVE TV
ന്യൂഡൽഹി: പശ്ചിമേഷ്യയിലെ യുദ്ധപ്രതിസന്ധികൾക്കിടയിൽ ഇന്ത്യയുടെ ഊർജ്ജ ഇറക്കുമതി മേഖലയിൽ നിർണ്ണായക അട്ടിമറികള്. ഹോർമൂസ് കടലിടുക്കിലൂടെയുള്ള കപ്പൽ ഗതാഗതം മൂന്ന് മാസമായി തടസ്സപ്പെട്ടതിനെ തുടർന്ന് എണ്ണ വിതരണത്തിനായി ബദൽ മാർഗ്ഗങ്ങൾ സ്വീകരിച്ചതോടെ, സൗദി അറേബ്യയെ മറികടന്ന് യുഎഇ ഇന്ത്യയിലേക്ക് ഏറ്റവും കൂടുതൽ അസംസ്കൃത എണ്ണ കയറ്റി അയക്കുന്ന രണ്ടാമത്തെ വലിയ രാജ്യമായി മാറി.
റഷ്യയാണ് ഈ പട്ടികയിൽ ഒന്നാം സ്ഥാനത്ത് തുടരുന്നത്. ഫെബ്രുവരി 28-ന് ഇറാനിൽ യു.എസ്-ഇസ്രായേൽ ആക്രമണമുണ്ടായതിനെ തുടർന്നാണ് പശ്ചിമേഷ്യൻ മേഖലയിലെ പ്രധാന എണ്ണക്കടത്തു പാതയായ ഹൊർമൂസ് കടലിടുക്കിൽ പ്രതിസന്ധി ആരംഭിച്ചത്. ഇതിനു മുൻപ് ഇന്ത്യയുടെ ആകെ ഊർജ്ജ ഇറക്കുമതിയുടെ 50 ശതമാനവും, അതായത് പ്രതിദിനം 2.5 മുതൽ 2.7 ദശലക്ഷം ബാരൽ വരെ എണ്ണ, ഈ ഇടുങ്ങിയ പാതയിലൂടെയായിരുന്നു കടന്നുപോയിരുന്നത്.
കൊമോഡിറ്റി അനലിറ്റിക്സ് സ്ഥാപനമായ 'കെപ്ലർ' പുറത്തുവിട്ട മെയ് മാസത്തിലെ കണക്കുകൾ പ്രകാരം പ്രതിദിനം 1.9 ദശലക്ഷം ബാരൽ എണ്ണ ഇറക്കുമതിയുമായാണ് റഷ്യ ഒന്നാം സ്ഥാനത്ത് തുടരുന്നത്. ഇത് ഏപ്രിൽ മാസത്തെ അപേക്ഷിച്ച് 23 ശതമാനം കൂടുതലാണ്; മാത്രമല്ല യു.എസ് ഉപരോധത്തിൽ ഇളവ് ലഭിച്ചതോടെ ജനുവരിയിലെ ഇറക്കുമതിയെ അപേക്ഷിച്ച് 73 ശതമാനത്തിന്റെ വൻ വർദ്ധനവാണ് റഷ്യൻ ഇറക്കുമതിയിലുണ്ടായത്.
രണ്ടാം സ്ഥാനത്തേക്ക് ഉയർന്ന യു.എ.ഇയിൽ നിന്ന് പ്രതിദിനം 5,40,000 ബാരൽ എണ്ണയാണ് ഇന്ത്യ വാങ്ങിയത്. ഇത് ഏപ്രിൽ മാസത്തെ അപേക്ഷിച്ച് 5 ശതമാനം കുറവാണെങ്കിലും, മാർച്ച് മാസത്തെ നിരക്കുമായി താരതമ്യം ചെയ്യുമ്പോൾ 166 ശതമാനത്തിന്റെ വൻ വർദ്ധനവാണ് രേഖപ്പെടുത്തിയത്. ഹൊർമൂസ് പാതയിലെ തടസ്സങ്ങൾ കാരണം ഏപ്രിൽ മാസത്തെ അപേക്ഷിച്ച് ഇറക്കുമതിയിൽ 41 ശതമാനത്തിന്റെ ഇടിവ് നേരിട്ട സൗദി അറേബ്യ പ്രതിദിനം 3,98,000 ബാരലുമായി മൂന്നാം സ്ഥാനത്തേക്ക് പിന്തള്ളപ്പെടുകയായിരുന്നു.
നിലവിൽ ഹോർമൂസ് പാത പൂർണ്ണമായും ഒഴിവാക്കി, കരമാർഗ്ഗമുള്ള പൈപ്പ്ലൈനുകൾ വഴിയാണ് യുഎഇയും സൗദിയും ഇന്ത്യയിലേക്ക് എണ്ണ എത്തിക്കുന്നത്. യു.എ.ഇ തങ്ങളുടെ 360 കിലോമീറ്റർ നീളമുള്ള 'ഹബ്ഷാൻ-ഫുജൈറ' പൈപ്പ്ലൈൻ വഴി ഒമാൻ ഉൾക്കടലിലേക്ക് നേരിട്ട് എണ്ണ എത്തിക്കുമ്പോൾ, സൗദി അറേബ്യ 1200 കിലോമീറ്റർ നീളമുള്ള 'ഈസ്റ്റ്-വെസ്റ്റ്' പൈപ്പ്ലൈൻ വഴി ചെങ്കടലിലെ യാൻബു തുറമുഖത്തേക്കാണ് എണ്ണ എത്തിക്കുന്നത്.
ഈ രണ്ട് പൈപ്പ്ലൈനുകളും നിലവിൽ പൂർണ്ണ ശേഷിയിലാണ് പ്രവർത്തിക്കുന്നത്. എങ്കിലും ഹൊർമൂസ് പാത വഴിയുണ്ടായ നഷ്ടം പൂർണ്ണമായി നികത്താൻ ഈ ബദൽ മാർഗ്ഗങ്ങൾക്ക് സാധിക്കുന്നില്ലെന്ന് കെപ്ലറിലെ ലീഡ് റിサーチ അനലിസ്റ്റ് സുമിത് റിതോലിയ വ്യക്തമാക്കുന്നു. ഇതിന്റെ ഭാഗമായി ഹൊർമൂസ് കടലിടുക്കിനെ ആശ്രയിക്കുന്നത് കുറയ്ക്കാൻ യു.എ.ഇയുമായി നേരിട്ട് ഒരു എനർജി പൈപ്പ്ലൈൻ സ്ഥാപിക്കുന്നതിനെക്കുറിച്ചുള്ള സാധ്യതകൾ ഇന്ത്യൻ സർക്കാർ പരിശോധിച്ചുവരികയാണ്.
യുദ്ധബാധിതമായ പശ്ചിമേഷ്യയിലെ പ്രതിസന്ധി ഇന്ത്യയിലെ ഇന്ധനലഭ്യതയെ ബാധിക്കാതിരിക്കാൻ ലോകത്തിന്റെ വിവിധ കോണുകളിൽ നിന്നുള്ള എണ്ണ ഇറക്കുമതി രാജ്യം ശക്തമാക്കിയിട്ടുണ്ട്. മെയ് മാസത്തിൽ വെനസ്വേലയിൽ നിന്ന് 3,03,000 ബാരലും, ബ്രസീലിൽ നിന്ന് 2,90,000 ബാരലും, അമേരിക്കയിൽ നിന്ന് 107 ശതമാനം വർദ്ധനവോടെ 2,09,000 ബാരലും ഇന്ത്യ ഇറക്കുമതി ചെയ്തു.
ഒമാൻ, അംഗോള തുടങ്ങിയ രാജ്യങ്ങളിൽ നിന്നും ഇന്ത്യ വാങ്ങൽ കൂട്ടിയിട്ടുണ്ട്. റഷ്യ, വെനിസ്വേല തുടങ്ങിയ രാജ്യങ്ങളിൽ നിന്നുള്ള വലിയ തോതിലുള്ള വാങ്ങൽ കാരണം ലോകത്തിലെ ഏറ്റവും വലിയ മൂന്നാമത്തെ എണ്ണ ഉപഭോക്താക്കളായ ഇന്ത്യയുടെ ആകെ അസംസ്കൃത എണ്ണ ഇറക്കുമതി മെയ് മാസത്തിൽ 11 ശതമാനം വർദ്ധിച്ച് പ്രതിദിനം 5 ദശലക്ഷം ബാരലായി ഉയർന്നു. ഇത് മുൻവർഷത്തെ അപേക്ഷിച്ച് 4.17 ശതമാനം കൂടുതലാണ്.
Content Highlights: India's crude oil import landscape has changed, with the UAE emerging as the second-largest supplier while Saudi Arabia's share has declined. The shift reflects evolving trade dynamics, pricing strategies, and geopolitical developments affecting global energy markets and India's sourcing decisions.
